فیروز والا : شیخوپورہ میں ٹریفک کا خوفناک حادثہ پیش آیا ہے جس میں پانچ افراد لقمہ اجل بن گئے، تیز رفتار بس نے وین کو ٹکر مار دی حادثے میں 10 مسافر شدید زخمی ہوگئے۔
تفصیلات کے مطابق فیروز والا کے قریب موٹروے کوٹ عبد المالک انٹرچینج کے قریب بس اور وین میں تصادم ہوگیا۔ حادثہ تیز رفتاری کے باعث پیش آیا۔
اس اندوہناک حادثے میں5افراد جاں بحق اور 10زخمی ہوگئے جنہیں فوری طبی امداد کیلئے قریبی اسپتال منتقل کردیا گیا۔
اطلاع ملنے پر فیروز والا پولیس اور ریسکیو ٹیمیں جائے وقوعہ پر پہنچ گئیں، امدادی ٹیموں نے جاں بحق افراد اور زخمیوں کو ہسپتال منتقل کردیا، زخمیوں میں متعدد کی حالت تشویشناک بتائی جا رہی ہے۔
اس حوالے سے ریسکیو حکام کا کہنا ہے کہ تیز رفتاری کے باعث بس ڈرائیور کے قابو سے باہر ہوگئی اور حادثہ پیش آیا، بد قسمت وین مسافر کوہاٹ سے لاہور جارہے تھے۔
فیروز والا پولیس کے مطابق حادثہ اس قدر شدید تھا کہ پانچوں افراد موقع پر دم توڑ گئے، واقعہ کی مزید تحقیقات شروع کردی گئی ہے۔
