فیصل آباد: گورنمنٹ گریجوایٹ کالج فار ویمن کی طالبہ دوسری منزل سے گر کر جاں بحق ہوگئی ، پولیس نے طالبہ کی خودکشی یا قتل کے پہلوؤں پر تفتیش شروع کردی۔

تفصیلات کے مطابق فیصل آباد میں سمندری کے گورنمنٹ گریجویٹ کالج فار ویمن میں افسوسناک واقعہ پیش آیا ، جہاں بی ایس اردو کی 19 سالہ طالبہ دوسری منزل سے گر کر جاں بحق ہو گئی۔

چک 142 کے رہائشی محمد اعظم کی بیٹی ماہم مرجان بی ایس اردو سیکنڈ سمیسٹر کی طالبہ تھی، سوموار کی صبح وہ اردو بلاک کی دوسری منزل سے نیچے گری، جس کے نتیجے میں اس کا سر اور چہرہ بری طرح زخمی ہو گیا۔

ریسکیو ٹیم نے زخمی طالبہ کو فوری طور پر سول اسپتال سمندری منتقل کیا، تاہم وہ دوران علاج دم توڑ گئی۔

ڈی ایس پی سمندری اور ایس ایچ او تھانہ سٹی نے جائے وقوعہ کا معائنہ کر کے شواہد اکٹھے کیے، پولیس کا کہنا ہے کہ تفتیش طالبہ کے اتفاقیہ گرنے، اسے دھکا دیے جانے یا خودکشی کے پہلوؤں کو مدنظر رکھتے ہوئے کی جا رہی ہے۔

فیصل آباد : عمرے کی آڑ میں شہریوں سے منشیات اسمگلنگ کروانے والے گینگ کے مرکزی ملزم شاہ صدام حسین کو گرفتار کرلیا گیا۔

فیصل آباد: ایف آئی اے کمپوزٹ سرکل فیصل آباد نے انسانی اور منشیات اسمگلنگ کے خلاف بڑی کارروائی کرتے ہوئے مرکزی ملزم گرفتار کر لیا۔

ترجمان ایف آئی اے نے بتایا عمرے کی آڑ میں شہریوں سے منشیات اسمگلنگ کروانے والے گینگ کے مرکزی ملزم شاہ صدام حسین کو سپریم کورٹ سے ضمانت قبل از گرفتاری منسوخ ہونے پر گرفتار کیا گیا۔

ترجمان کا کہنا تھا کہ ملزم شاہ صدام حسین نے ساتھیوں کے ساتھ مل کر پانچ افراد پر مشتمل ایک خاندان کو سعودی عرب بھیجا۔ متاثرہ خاندان کو مفت عمرہ کا جھانسہ دیا گیا تاکہ وہ بغیر کسی شک کے سفر کریں۔

مزید پڑھیں : عمرے کی آڑ میں 4 خواتین کی سعودی عرب اسمگلنگ کی کوشش ناکام

ملزم نے خاندان کو ایک بیگ سعودی عرب پہنچانے کے لیے دیا، جس میں منشیات چھپائی گئی تھی۔ سعودی حکام نے بیگ چیک کرکے منشیات برآمد کی اور متاثرہ خاندان کو گرفتار کر لیا۔

ایف آئی اے نے اس کارروائی کو انسانی اور منشیات اسمگلنگ کے خلاف ایک اہم کامیابی قرار دیا ہے اور مزید تحقیقات جاری ہیں۔

فیصل آباد: شوہر اور سسرالیوں نے گھریلوجھگڑے پر خاتون کو زہر پلا کر قتل کردیا، پولیس نے مقتولہ کے شوہر کو گرفتار کرلیا۔

پولیس نے بتایا کہ ڈی ٹائپ کالونی میں بیوی کو زہر دیکر قتل کرنے والے شخص کو گرفتار کرلیا گیا ہے، ملزم کی شناخت فہیم کے نام سے ہوئی ہے، فہیم اور اس کے گھر والوں نے گھریلو جھگڑے پر خاتون کو زہر دیا۔

متاثرہ خاتون 22 جولائی کو اسپتال میں دوران علاج دم توڑگئی تھی، مقدمے میں مقتولہ کا شوہر فہیم، دیور نعیم، نند رخسانہ بطور ملزمان نامزد ہیں۔

پولیس نے کیس کے حوالے سے مزید بتایا کہ قتل ہونے والی خاتون نے شوہر کو نند رخسانہ کی غیراخلاقی حرکات سے آگاہ کیا تھا۔

کچھ مہینوں قبل پنجاب کے شہر دنیاپور میں زہریلا اسپرے پینے سے خاتون جاں بحق ہوگئی تھی، دنیاپور چک 291 ڈبلیو بی میں خاتون کے والد نے بیٹی کی موت کا الزام شوہر اور سسر پر لگایا تھا۔

والد کا کہنا تھا کہ میری بیٹی کو اس کے شوہر اور سسر نے زبردستی زہریلا اسپرے پلایا ہے، تاہم خاتون کی لاش کو اسپتال منتقل کردیا گیا ہے۔

پولیس کا کہنا تھا کہ پوسٹ مارٹم کے بعد لاش ورثا کے حوالےکردی جائے گئی، تھانہ صدر پولیس نے ورثا کی درخواست پر تحقیقات شروع کردی ہیں۔

https://urdu.arynews.tv/death-by-drinking-poisoned-tea-post-mortem-report-of-woman-nazia-bibi/

فیصل آباد : سمن آباد میں پریشر ککر پھٹنے سے گھر میں تباہی مچ گئی ، جس کے نتیجے میں 8 ماہ کا بچہ جاں بحق جبکہ ماں اور ایک بچے شدید زخمی ہیں۔

تفصیلات کے مطابق فیصل آباد میں سمن آباد کے علاقے میں پریشر ککر پھٹنے کے افسوسناک واقعے نے ایک گھر کو سوگوار کر دیا۔

حادثے کے نتیجے میں 8 ماہ کا بچہ جاں بحق ہو گیا، جبکہ ماں، 2 سالہ بیٹا اور ایک کمسن بیٹی جھلس کر شدید زخمی ہوگئے۔

ریسکیو ذرائع نے بتایا کہ اتوار کے روز پریشر ککر پھٹنے کے ساتھ ساتھ گیس لیکج بھی ہوئی، جس کے نتیجے میں گھر میں اچانک آگ بھڑک اٹھی، آگ کی لپیٹ میں آ کر ماں اور اس کے تین بچے جھلس گئے جنہیں فوری طور پر اسپتال منتقل کیا گیا۔

مزید پڑھیں : لاہور: دکان میں سلنڈر پھٹنے سے 5 افراد جاں بحق، متعدد زخمی

متوفی بچے کی شناخت عون کے نام سے ہوئی ہے، جو زخموں کی تاب نہ لاتے ہوئے دم توڑ گیا جبکہ اس کی والدہ اور 2 سالہ بھائی کی حالت تاحال تشویشناک بتائی جا رہی ہے۔

ریسکیو ٹیموں نے بروقت کارروائی کرتے ہوئے آگ پر قابو پایا اور زخمیوں کو اسپتال منتقل کیا۔ واقعے کے بعد علاقے میں کہرام مچ گیا، اہل محلہ غم سے نڈھال دکھائی دیے۔

پولیس اور متعلقہ حکام نے واقعے کی تفتیش شروع کر دی ہے تاکہ یہ معلوم کیا جا سکے کہ پریشر ککر پھٹنے کا سبب تکنیکی خرابی تھی یا کسی اور غفلت کا نتیجہ۔