Tag: فیصل آباد

لاہور: پنجاب اسمبلی میں سر عام آئس نشہ فروخت ہونے کے خلاف تحریک التوا جمع کرائی گئی ہے، جس میں لاہور میں آئس نشہ کھلے عام فروخت ہونے پر تشویش کا اظہار کیا گیا۔

تفصیلات کے مطابق لاہور میں آئس نشہ سر عام فروخت ہونے کے مسئلے پر پیپلز پارٹی کے رہنما حسن مرتضیٰ اور مخدوم عثمان محمود نے پنجاب اسمبلی میں تحریک التوا جمع کرائی۔

تحریک التوا کے متن میں کہا گیا ہے کہ لاہور میں آئس نشے کی فروخت عروج پر ہے، جس سے تعلیمی ادارے بھی محفوظ نہیں رہے۔

متن میں کہا گیا ہے کہ شہر میں آئس کا نشہ تیار کرنے والی کئی لیبارٹریاں بھی قائم ہو چکی ہیں، جس پر حکومت اور انتظامیہ کی غفلت سے عوام میں سخت غم وغصہ پایا جاتا ہے۔

دریں اثنا، فیصل آباد ایئر پورٹ پر مسافر سے ایک کلو 850 گرام آئس ہیروئن برآمد کر لی گئی ہے، ملزم عمران کروڑوں روپے کی ہیروئن لے کر مدینہ جا رہا تھا۔

یہ بھی پڑھیں:  اسلام آباد ایئرپورٹ پرمنشیات اسمگلنگ کی کوشش ناکام، ملزم گرفتار

ملزم نے بریف کیس کے خفیہ خانے میں آئس چھپا رکھی تھی، ملزم کو اینٹی نارکوٹکس فورس (اے این ایف) کے حوالے کر کے اس کے خلاف مقدمہ درج کر دیا گیا ہے۔

واضح رہے کہ آئے دن مختلف شہروں میں ایئر پورٹس پر آئس سمیت دیگر نشوں کی اسمگلنگ کے واقعات ناکام بنائے جاتے ہیں، لیکن حیرت کی بات ہے کہ اسمگلنگ میں تا حال کوئی کمی نہیں آئی ہے۔

جمعے کے دن بھی اسلام آباد ایئر پورٹ پر اے ایس ایف نے 2 بڑی کارروائیوں میں بیرون ملک منشیات کی اسمگلنگ کی کوشش نا کام بنا دی تھی، اور مسافر اللہ یار سے 3 کلو 600 گرام اعلیٰ کوالٹی کی ہیروئن برآمد کی تھی۔

مسافر اللہ یار نجی ایئر لائن سے ابوظبی جانا چاہتا تھا، پکڑی گئی ہیروئن کی بین الاقوامی منڈی میں مالیت کروڑوں روپے بتائی گئی تھی۔

دوسری کارروائی میں نجی ایئر لائن کی پرواز سے شارجہ جانے والے مسافر سے 1400 گرام آئس ہیروئن برآمد کی گئی تھی، اے ایس ایف نے دونوں ملزمان کو اے این ایف کے حوالے کر دیا تھا۔

لاہور: فیصل آباد میں جرمن خاتون سے اجتماعی زیادتی کا دوسرا مقدمہ بھی درج کرلیا گیا، ایک ملزم الیاس کو گرفتار کرلیا گیا جبکہ تین ملزمان فرار ہونے میں کامیاب ہوگئے۔

تفصیلات کے مطابق فیصل آباد میں والد کی تلاش میں آئی جرمن خاتون رامونا الزبتھ کو 4 ملزمان نے اجتماعی زیادتی کا نشانہ بنا ڈالا، پولیس نے کارروائی کرتے ہوئے ایک ملزم الیاس کو گرفتار کرلیا، تین ملزمان کی تلاش میں چھاپے مارے جارہے ہیں۔

جرمن خاتون رامونا الزبتھ سے زیادتی کے چاروں ملزمان کے خلاف پہلے فیصل آباد کے تھانہ مدینہ ٹاؤن میں مقدمہ درج کیا گیا تھا۔

گرفتار ملزم الیاس کی طرف سے ستیانہ روڈ پر واقع رفاقت پلازہ میں رامونا الزبتھ سے زیادتی کے اعتراف پر تھانہ مدینہ ٹاؤن میں مقدمہ درج کرکے تھانہ بٹالہ کالونی میں بھی مقدمہ درج کرلیا گیا۔

مزید پڑھیں: خاتون سے جنسی زیادتی کا الزام، عدالت نے مصری شہری پر فرد جرم عائد کردی

زیادتی کا شکار ہونے والی رامونا کلر کہار کے رہائشی عاصم سے شادی کرکے اپنے باپ کو تلاش کرنے پاکستان آئی تھی جو تیس سال قبل جرمنی چھوڑ کر پاکستان آگئے تھے۔

ملزمان الیاس، حیدر اور جاوید نے اسے باپ کا پتا دینے کے بہانے کلر کہار سے بلایا اور دفترمیں لے جاکر اپنی ہوس کا نشانہ بنایا تھا۔

جرمن خاتون کو 4 افراد نے اغوا کیا جبکہ دو نے زیادتی کی، پولیس کی جانب سے متاثرہ خاتون کا میڈیکل کروایا گیا ہے۔

فیصل آباد: پولیس نے کہا ہے کہ منشیات کیس میں گرفتار رانا ثنا اللہ کے 10 ساتھیوں کا کرمنل ریکارڈ اینٹی نارکوٹکس فورس (اے این ایف) کو ارسال کر دیا گیا ہے۔

تفصیلات کے مطابق اے آر وائی نیوز نے اے این ایف کو بھیجی گئی رپورٹ کی کاپی حاصل کر لی، یہ رپورٹ رانا ثنا کے دس ساتھیوں کے کرمنل ریکارڈ پر مشتمل ہے۔

اے این ایف حکام نے پولیس افسر غلام محمود سے ریکارڈ طلب کیا تھا اور منشیات اسمگلنگ میں ملوث ہونے کی تفصیل بھی مانگی گئی تھی۔

رپورٹ کے مطابق ایم پی اے خلیل طاہر سندھو کو کلین چٹ دی گئی ہے، خلیل طاہر کا کوئی کرمنل ریکارڈ نہیں ملا۔

یہ بھی پڑھیں:  منشیات برآمدگی کیس، رانا ثنا اللہ کے خلاف عدالت میں چالان جمع

تاہم رپورٹ میں بتایا گیا ہے کہ 3 افراد رانا اظہر، شمو عرف صابی اور عمران دولت منشیات فروشی میں ملوث ہیں، رانا اظہر 3 تھانوں میں 5 منشیات فروشی، بجلی چوری کے مقدمےمیں چالان یافتہ ہے، جب کہ شمو صابی شراب فروشی اور عمران دولت منشیات فروشی میں ملوث ہے۔

رپورٹ میں کہا گیا کہ 2 سابق یو سی چیئرمین ساجد الیاس اور رانا مظفر کے خلاف بھی کوئی مقدمہ نہیں ہے۔ پرویز جٹ، رانا ارشد، رانا شریف، شیخ عمران کا کرمنل ریکارڈ بھی موجود نہیں۔

خیال رہے کہ آج اینٹی نارکوٹکس فورس نے منشیات برآمدگی کیس میں گرفتار رانا ثنا اللہ کے خلاف چالان عدالت میں جمع کرا دیا ہے۔

منشیات کی روک تھام کے حوالے سے بنائی جانے والی فورس نے عدالت میں 200 صفحات پر مشتمل چالان جمع کرایا جس میں مسلم لیگ ن کے صدر اور رکن قومی اسمبلی رانا ثنا اللہ کو قصور وار قرار دیا گیا جب کہ مسلم لیگ ن کے دیگر 6 رہنماؤں کو بھی نامزد کیا گیا۔

لاہور: مسلم لیگ ن کے رہنما رانا ثنا اللہ کیس میں پولیس افسران کی گرفتاریاں شروع کردی گئیں، اے این ایف نے افسران کی حوالگی کے لیے پنجاب پولیس کو درخواست بھیج دی۔

تفصیلات کے مطابق سابق وزیر قانون اور مسلم لیگ ن کے رہنما رانا ثنا اللہ کیس میں فیصل آباد میں تعینات رہنے والے افسران کے گرد گھیرا تنگ کردیا گیا، ملک خالد ڈی ایس پی ایس پی یو کو گرفتار کرلیا گیا، ملک خالد کا کچھ عرصہ پہلے فیصل آباد سے ایس پی یو تبادلہ کیا گیا تھا۔

ذرائع کے مطابق سابق ایس ایس پی فیصل آباد رائے ضمیر کی گرفتاری کے لیے چھاپے مارے جارہے ہیں۔

نمائندہ اے آر وائی نیوز شاہد انوار کے مطابق رانا ثنا اللہ کے دوران تفتیش اہم انکشافات پر کارروائی عمل میں لائی گئی ہے، رانا ثنا اللہ کی سفارش پر فیصل آباد میں تعینات افسران کی فہرست طلب کرلی گئی ہے۔

فیصل آباد میں رانا ثنا اللہ کی جانب سے قبضوں کی تفصیلات طلب کرلی گئیں، منشیات کیس میں رانا ثنا کے اثاثوں، گاڑیوں کا ریکارڈ بھی طلب کیا گیا ہے۔

مزید پڑھیں: راناثنا اللہ نے تنہائی دور کرنے کیلئے جیل میں کتابیں پڑھنا شروع کردیں

رانا ثنا اللہ کے گھروں، زمین اور مختلف کمپنیوں کا ریکارڈ طلب کیا گیا ہے، انسداد منشیات فورس نے تمام اداروں کو اس سلسلے میں خطوط ارسال کردئیے۔

اے این ایف حکام کا کہنا ہے کہ اثاثوں کی تفتیش کرنا چاہتے ہیں کہ اثاثے منشیات کی رقوم سے تو نہیں بنے۔

یاد رہے کہ مسلم لیگ ن کے رہنما رانا ثنا اللہ کو 15 کلو ہیروئن اسمگلنگ کے کیس میں گرفتار کیا گیا تھا۔

بعد ازاں رانا ثنا کو ضلع کچہری میں جوڈیشل مجسٹریٹ کے سامنے پیش کیا گیا، جہاں عدالت نے رانا ثنا کو منشیات کیس میں 14 روزہ جوڈیشل ریمانڈ پر جیل بھیج دیا تھا۔