فیصل آباد میں انسداد دہشت گردی کی خصوصی عدالت نے سزائے موت پانے والے دو دہشتگردوں کے بلیک وارنٹ جاری کردیے۔
فیصل آباد جیل کےسپرنٹنڈنٹ نے انسداد دہشتگردی کی عدالت میں درخواست دائرکی تھی کہ فیض اور شریف نامی مجرموں نےننکانہ صاحب میں لانس نائیک محمد طارق کو شہید کر دیا تھا،جس پر دونوں کو سزائے موت سنائی جا چکی ہے۔ مجرموں کی سزائے موت پر عمل درآمد کیلئے بلیک وارنٹ جاری کئے جائیں، عدالت نے درخواست منظور کرتے ہوئے دہشت گرد فیض اور شریف کے بلیک وارنٹ جاری کردیئے۔۔
فیصل آباد : ہائی وے پولیس نے مردہ بھینس کا پانچ سو کلو گرام گوشت برآمد کر کے دو ملزمان کو گرفتار کر لیا۔ تفصیلات کے مطابق ہائی وے پولیس نے امین پور بائی پاس پر ایک وین کو روک کر تلاشی لی تو اس میں سے ذبح کی گئی مردہ بھینس برآمد ہوئی ۔
پولیس نے ملاں پور کے رہائشی ملزمان عباس اور لیاقت کو گرفتار کر کے پانچ سو کلو گرام گوشت اور وین قبضے میں لے لی ۔ملزمان یہ گوشت فیصل آباد کے مختلف ہوٹلوں پر سپلائی کرتے تھے ۔
لائیو اسٹاک عملے نے مدن پورہ کے سلاٹر ہاؤس میں کیمیکل کے ذریعے مردہ بھینس کا گوشت تلف کردیا ۔ ملزمان کافی عرصے سے مردہ اور لاغر جانوروں کا گوشت شہر کے ہوٹلوں اور قصابوں کو فروخت کرنے کا دھندا کر رہے تھے۔
لاہور: کوٹ لکھپت جیل لاہورمیں چار دہشت گردوں کی پھانسی کے انتظامات مکمل کرلیے گئے ہیں، جیل کے اطراف میں سیکیورٹی کاسخت حصار قائم ہے۔
کوٹ لکھپت جیل میں قید چار دہشت گردوں کی پھانسی کے انتظامات کوحتمی شکل دی جارہی ہے،جیل ذرائع کا کہنا ہے ملتان میں حساس ادارے کے دفتر اور چناب آرمی کیمپ پر حملے میں ملوث چاروں دہشت گردوں کامران ، عمر عظیم ، احسان ندیم اور محمد زاہد کے بلیک وارنٹ موصول ہونے کے چوبیس گھنٹے کے اندر اندر پھانسی دے دی جائےگی ۔
کوٹ لکھپت جیل کے اطراف میں دو کلومیٹر تک عام افراد کا داخلہ بند کرکے جیل کی اندرونی سیکورٹی کی ذمہ داری رینجرز کے حوالے کردی گئی ہے مجموعی طور پر جیل اور اطراف کی سیکورٹی کی ذمہ داری فوج کے پاس ہے ۔
ہری پور میں پرویز مشرف حملہ کیس کےماسٹر مائنڈ نیاز محمدکےبھی ڈیتھ وارنٹ جاری کیے جاچکے ہیں جب کہ پھانسی پشاوریا راولپنڈی کے جیل میں دیئے جانے کاامکان ہے۔ سکھر کے سینٹرل جیل ون میں کالعدم لشکرجھنگوی کےمحمد اعظم اور عطااللہ سمیت چار دہشت گردوں کو تئیس دسمبر کو پھانسی دیئےجانے کی توقع ہے۔
فیصل آباد: ڈسڑکٹ جیل میں چار دہشت گردوں کو پھانسی پر لٹکا دیا گیا، تفصیلات کے مطابق مشرف حملہ کیس اور جی ایچ کیو حملہ کیس میں ملوّث ملزمان اپنے انجام کو پہنچ گئے۔
زبیر احمد ، اخلاص عرف روسی ، راشد ٹیپو اور غلام سرورکو تختہ دار پر لٹکا دیا گیا، پھانسی پر لٹکائے جانے والے چاروں افراد کی نعشیں ڈاکٹرز کی جانب سے تصدیق کے بعد ان کے ورثاء کے حوالے کردی جائیں گی۔
پھانسی سے قبل مجرمان کا میڈیکل چیک اپ کیا گیا اس موقع پر ان کے اہلِ خانہ بھی موجود تھے۔
فیصل آباد: سانحہ فیصل آباد کی ایک اور ایکسکلوسو فوٹیج اےآروائی نیوز کو موصول ہوگئی ہے۔ فوٹیج میں دو افراد کو سرعام فائرنگ کرتے ہوئے دیکھا جاسکتا ہے۔
تفصیلات کے مطابق گزشتہ روز فیصل آباد میں پاکستان تحریک انصاف کے احتجاجی جلوس پر ہونے والے فائرنگ کے مناظر کی ایک اور فوٹیج اے آر وائی نیوز کو موصول ہوگئی ہے۔ فوٹیج میں دو افراد کو واضح طور پر سرعام گولیاں برساتے ہوئے دیکھا جا سکتا ہے۔
فوٹیج میں نظر آرہا ہے کہ ہجوم میں شامل دو افراد ہاتھ میں اسلحہ تھامے ہوئے ہیں اور فیصل آباد کے یہ گلو بٹ نہتے عوام پر سیدھی گولیاں برسا رہے ہیں۔
اے آر وائی نیوز کو موصول فوٹیج میں ناولٹی چوک پر ملزمان کی سرعام فائرنگ کے دوران پولیس اہلکار کو خاموش تماشائی کا کردار ادا کرتے نظر آرہے ہیں۔ پولیس اہلکاروں نے کارروائی کے بجائے رخ ہی بدل لیا تھا۔
واقعہ میں پی ٹی آئی کا حق نواز جان کی بازی ہارا اور ناولٹی چوک خونی چوک میں تبدیل ہوگیا ہے۔
ادھر پنجاب پولیس نے شاہ سے زیادہ شاہ کی وفادار بننے کے چکر میں دو سال قبل وفات پانے والے شہری کو بھی رانا ثناء اللہ کے ڈیرے پر حملے کے مقدمے میں ملزم نامزد کر دیا ہے۔ فیصل آباد کے علاقے نثار کالونی کے رہائشی محمد اشرف دو ہزار بارہ میں چھہتر سال کی عمر میں وفات پا گئے تھے۔ آٹھ دسمبر کو سمن آباد میں سابق صوبائی وزیر قانون رانا ثناء اللہ کے ڈیرے پر حملے کے الزام میں تھانہ ڈی ٹائپ کالونی میں سب انسپکٹر محمد سفیان کی مدعیت میں درج مقدمے میں دو سال قبل وفات پا جانے والے محمد اشرف کو بھی اس خاندان سے سیاسی مخالفت کی بنا پر نامزد کروا دیا گیا ہے۔
فیصل آباد: تحریک انصاف کی اپیل پر ٹرانسپورٹرز اور کئی تاجر تنظیموں نے کل کاروبار بندرکھنے کا اعلان کردیا،انتظامیہ بھی احتجاج ناکام بنانے کیلئے سرگرم ہوگئی۔
فیصل آباد کے وکلا ،تاجر ،صنعتکار اور اساتذہ نے تحریک انصاف کے احتجاج کی مکمل حمایت کا اعلان کیا ہے، ٹرانسپورٹرز ایسوسی ایشنز ، پاور لوم ایسوسی ایشن ، ڈسٹرکٹ بار ایسوسی ایشن اور مختلف تاجر تنظیموں نے عمران خان کے پلان سی کے تحت فیصل آباد بند کرنے کی حمایت کردی ہے۔
شکیل شہزاد تاجر رہنما ٹرانسپورٹرز کی جانب سے ہڑتال کے اعلان کے بعد انتظامیہ نےجنرل بس اسٹینڈ میں قائم تین ٹرانسپورٹرز کے دفاتر اور پٹرول پمپ سیل کر دیئے، ٹرانسپورٹرز کے احتجاج پر دفاتر اور پٹرول پمپس کو کھولنا پڑا،پرائیویٹ اسکولز ایسوسی ایشنز نے بھی فیصل آباد کے تمام نجی اسکول بند کرنے کا اعلان کیاہے۔
فیصل آباد: پاکستان عوامی تحریک اور مسلم لیگ ق نے فیصل آباد میں پی ٹی آئی کے احتجا ج کی بھر پور حما یت کا اعلان کیا ہے۔
آٹھ دسمبر عمران خا ن کے پلا ن سی کے احتجاج کی بھر پور کامیابی کیلئے پی ٹی آئی پنجاب کے صدر اعجاز چوہدری نے کپتان کی ہدایت پر پاکستانی عوامی تحریک سے رابطہ کیا اور انھیں کل کے احتجاج میں شرکت کی دعوت دی۔
پاکستان عوامی تحریک کے رہنما خرام نواز گنڈا پور کپتان کی آواز پر لبیک کہتے ہو ئے احتجاج کی حمایت کا اعلان کرتے ہوئے کہا کہ دونوں جما عتوں کی منزل ایک ہے ہم مل کر قوم کو موجودہ نظام سے نجات دلائیں گے، ساتھ ساتھ پا کستان مسلم لیگ ق کے رہنما اور سابق اسپیکر پنجاب اسمبلی چوہدری ظہیر نے بھی پی ٹی آئی کی فیصل آباد میں احتجاج کی بھر پور حمایت کی ہے۔
پاکستان تحریک انصاف نے فیصل آباد کے احتجاج میں شرکت کے لیے سنی تحریک جو بھی دعوت دی ہے، اب دیکھنا یہ ہے کپتان فیصل آباد میں اپنہ اننگ کیسے اوپن کر تے ہیں پا کستان کا ما نچسٹر سمجھے جا نے والے فیصل آباد کو پا کستانی سیاست کے چند اہم شہروں میں شما ر کیا جا تا ہے۔
فیصل آباد: گھنٹہ گھر چوک فیصل آباد میں منعقدہ نجی ٹی وی کے پروگرام میں تلخ کلامی کے بعد مسلم لیگ نون اور تحریک انصاف کےکارکنوں میں کشیدگی عروج پر پہنچ گئی۔
دونوں جانب سے نعرے بازی کا زبردست مظاہرہ ہو ا، فیصل آباد کاگھنٹہ گھرچوک مچھلی بازار بن گیا ،تفصیلات کے مطابق نجی ٹی وی کے مذاکرے میں تحریک انصاف کے رکن صوبائی اسمبلی خرم شہزاد اور انجمن تاجران سٹی کے صدر خواجہ شاہد رزاق میں تلخ جملوں کا تبادلہ ہوگیا۔
بس پھر کیا تھا؟ تحریک انصاف کےکارکن گو نواز گو کے نعرے لگانے لگے، جس کے جواب میں نون لیگ کے کارکنوں نے بھی گلے پھاڑ پھاڑ کر عمران خان کے خلاف رو عمران رو کے نعرے لگائے ۔
کشیدگی بڑھی تو انتظامیہ نے پولیس بلالی اس موقع پر مسلم لیگ ن کے رکن قومی اسمبلی رانا افضل اور پی ٹی آئی کے ایم پی اے خرم شہزاد کارکنوں کو نعروں کا مقابلہ کرتے چھوڑ کر چلے گئے ۔
پولیس کی آمد پر بھی نعرے بازی کا مقابلہ نہ رکا بلکہ دونوں جانب سے ایک گھنٹے تک فلک شگاف نعرے لگائے جاتے رہے۔
فیصل آباد : حکومت نے پیر کو فیصل آباد میں پی ٹی آئی کا شٹر ڈائون ناکام بنانے کیلئے اہم فیصلے کرلئے۔ آٹھ دسمبر کو بجلی کی لوڈ شیڈنگ نہیں ہوگی،تاجروں اور صنعت کاروں کو بھی رام کرنے کیلئے حکومت سرگرم ہوگئی ۔
حکومت پنجاب نے تحریک انصاف کاآٹھ دسمبر کو فیصل آباد میں احتجاج روکنے کے لیے حکومتی حکمت عملی تیارکرلی، ذرائع کے مطابق فیصل آباد سے جھنگ، چنیوٹ، لاہور، جڑانوالہ، سمندری اور ستیانہ جانے والی سڑکوں پر پولیس کی بھاری نفری تعینات کی جائے گی۔
آٹھ دسمبر کو فیصل آباد ٹیکسٹائل انڈسٹری کو پیر کے روز بجلی کی لوڈشیڈنگ نہ کرنے کا فیصلہ کیا گیا ہے ، اس اقدام کامقصد ٹیکسٹائل ملز سے مزدوروں کو تحریک انصاف کے احتجاج میں شامل ہونے سے روکنے کے لیے کیا گیا۔
فیصل آباد میں دیگر اضلاع سے پولیس کی بھاری نفری طلب کر لی گئی، جبکہ تاجروں اور فیکٹری مالکان کو احتجاج سے روکنے کے لیے صنعتی تنظمیوں کے صدور سے حکومتی ارکان نے رابطے شروع کر دئے ہیں۔
سابق صوبائی وزیرقانون رانا ثنااللہ ور عابد شیر علی تحریک انصاف کا احتجاج ناکام بنانے کے لیے متحرک ہوگئے ہیں۔
اسلام آباد: پاکستان تحریک انصاف نے فیصل آباد ،قصور اور منڈی بہاؤالدین کے جلسے منسوخ کردئیے، نئی تاریخوں کا اعلان تیس نومبر کو کیا جائے گا۔
تحریک انصاف پنجاب کے صدر اعجاز چوہدری کا کہنا ہے کہ عمران خان کی نجی مصروفیت کے باعث فیصل آباد ،قصور اور منڈی بہاؤالدین کے جلسے منسوخ کردئیے گئے ہیں، جو اب دسمبر کے مہینے میں ہوں گے۔ جلسوں کی نئی تاریخ کا اعلان عمران خان تیس نومبر کے جلسے میں کرینگے۔ ان کہنا تھا کہ گوجرانوالہ میں انیس کی بجائے تئیس نومبر کو پنڈال سجے گا۔ انہوں نے کہا کہ پندرہ نومبر کو ساہیوال اور سولہ نومبر کو جہلم جلسہ ہوگا۔