Tag: فیض آباد دھرنا

اسلام آباد : رہنما پاکستان تحریک انصاف بابر اعوان نے کہا ہے کہ غیر یقینی صورت حال میں قوم فوری نئے انتخابات چاہتی ہے چنانچہ نااہل حکومت مستعفی ہوکر قبل از وقت انتخابات کے لیے راہموار کرے.

وہ فیض آباد دھرنے کے خلاف ہونے والے آپریشن پر ردعمل دے رہے تھے، بابر اعوان کا کہنا تھا کہ تجربہ کار ٹیم کا دعوی کرنے والے نوازشریف نے اپنی 3 حکومتوں کے بعد بھی ایک معذور ٹیم ہی تیارکی ہے.

انہوں نے احسن اقبال کو تنقید کا نشانہ بناتے ہوئے کہا کہ وزیر داخلہ پاکستان کے لئے پورس کا ہاتھی ثابت ہوا ہے جنہوں نے دھرنا 3 گھنٹے میں ختم کرانے کا کہہ کر پورا ملک ہی 3 دن کے لیے بند کرا دیا اس لیے دھرنے میں ہونے والے املاک کا نقصان احسن اقبال سے وصول کیا جائے.

بابر اعوان کا مزید کہنا تھا کہ مسلم لیگ ( ن) نے عوام کی عدالت کا ٹریلر دیکھ لیا ہے سڑکیں کھل گئی ہیں اور اب لوہے کے چنے ہونے کا دعوی کرنے والے اپنے محفوظ پناہ گاہوں سے باہر نکل آئیں اور عوامی عدالت کا سامنا کریں تو کیا نوازشریف اب بھی عوام کی عدالت میں جانے کو تیارہیں؟

 فیض آباد انٹرچینج پردھرنا ختم‘ نظامِ زندگی بحال

خیال رہے کہ آرمی چیف قمر باجوہ کی ہدایت پر دھرنا مظاہرین سے ہونے والے معاہدے کے بعد حکومت راجہ ظفر الحق کمیٹی کو شائع کرنے اور وفاقی وزیر قانون کے استعفیٰ کے لیے رضامند ہو گئی تھی جس کے بعد 21 دنوں سے جاری دھرنا ختم کرنے کا اعلان کرکے فیض آباد شاہراہ عوام کے لیے کھول دی گئی ہے.

لاہور : وفاقی حکومت کی جانب سے اپنی کابینہ کے 2 وفاقی وزراء سے استعفے لیے جانے کا امکان ہے یہ دونوں وزراء ختم نبوت حلف نامے میں تبدیلی کی تحقیقات کرنے والی پارلیمانی کمیٹی میں بھی شامل تھے جب کہ رانا ثناء اللہ کی جانب سے مستعفی ہونے کا امکان ہے.

تفصیلات کے مطابق وفاق میں آج مصروف ترین دن رہا جہاں آرمی چیف ، وزیراعظم اور وزیراعلیٰ پنجاب کے درمیان ملاقات اور اعلیٰ سطح کے اجلاس کے بعد کئی فیصلے سامنے آئیں ہے جس کے تحت سوشل میڈیا پر پابندی ختم کردی گئی ہے اور ٹی وی چینلز کھول دیئے گئے ہیں.

ذرائع کے مطابق پے در پے اعلیٰ حکام کی ملاقاتوں کے بعد وفاقی حکومت نے اپنی کابینہ سے آئندہ 48 گھنٹے کے دوران دو وزراء سے استعفیٰ لینے کا فیصلہ کر لیا ہے یہ دونوں وزراء راجہ ظفرالحق کی انکوائری کمیٹی میں بھی شامل تھے اور جن کی سبکدوشی کا مطالبہ دھرنا مظاہرین کی جانب سے بھی سامنے آ چکا ہے.

ذرا ئع کا یہ بھی کہنا ہے کہ وزیراعلٰی پنجاب شہباز شریف سے وفاقی وزیر قانون زاہد حامد اور وفاقی وزیر برائے مذہبی امور نے خصوصی ملاقات کی ہے جس میں وفاقی وزیر قانون زاہد حامد نے شہباز شریف کو اپنے مستعفی ہونے کے فیصلے سے آگاہ کیا جس کے بعد آئندہ 48 گھنٹے میں دو وزراء کے مستعفی ہونے کے امکانات روشن ہو گئے ہیں.

تاہم وزارت مذہبی امور کے ترجمان نے وفاقی وزیر کی وزیراعلیٰ پنجاب سے ملاقات کی تردید کرتے ہوئے کہا ہے کہ وفاقی وزیر برائے مذہبی امور سردار یوسف لاہور ہی میں موجود نہیں ہے تو وزیراعلیٰ سے کیسے ملاقات کر سکتے ہیں بلکہ وہ اس وقت مانسہرہ میں موجود ہیں.

دوسری جانب ختم نبوت ترمیم کے معاملے پر دھرنے کے خلاف آپریشن کے بعد مسلم لیگ (ن) میں دھڑے بندیاں سامنے آگئی ہیں اور انتشار کی شکار حکمراں جماعت کے کئی ارکان پارلیمنٹ نے اپنی نشستوں سے مستعفی ہونے کا فیصلہ کرلیا ہے جن میں غلام محمد لالی، شیخ اکرام، محمد خان بلوچ، ذوالفقار، راناغلام غوث، وارث کلو، عبدالرزاق اور رحمت اللہ شامل ہیں.

ذرائع کے مطابق مسلم لیگ (ن) کے اراکین صوبائی اسمبلی نے مستعفی ہونے کا فیصلہ حمید الدین سیالوی کے مشورے پرکیا ہے اور حمید الدین سیالوی کے بعد مزید لیگی ارکان صوبائی اور قومی اسمبلی بھی اپنے استعفے وزیراعلیٰ پنجاب شہباز شریف کے ساتھ ہونے والی ملاقات میں پیش کریں گے.

دوسری جانب ذرائع کا یہ بھی کہنا ہے کہ پنجاب کابینہ کے سب سے متحرک رکن اور وزیر قانون رانا ثنا اللہ کے مستعفی ہونے کا امکان ہے جن کے استعفیٰ کے لیے فیصل آباد سے رکن قومی اسمبلی نثار جٹ کا وزیراعلیٰ پنجاب پر سخت دباؤ ہے بہ صورت دیگر نثار جٹ نے اپنی نشست سے مستعفی ہونے کی دھمکی دے دی ہے.

علاوہ ازیں وزیر مملکت میر دوستین ڈومکی نے بھی کل مستعفی ہونے کا اعلان کرتے ہوئے کہنا تھا کہ کل وزارت سےاستعفیٰ دے دوں گا اور دوپہر تین بجے تک وزیراعظم شاہد خاقان کو اپنا استعفیٰ بھیجوا دوں گا تاہم ابھی پارٹی چھوڑنے کا نہیں سوچا ہے۔

انہوں نے کہا کہ وزارت آنی جانی چیز ہے اور عزت سے زیادہ پیاری نہیں ہے، سب جانتے ہیں کہ میں نے این ٹی ایس میں کرپشن کے خلاف نوٹس لیا جب کہ رانا تنویر حسین این ٹی ایس کی کرپشن کو تحفظ دینا چاہتے ہیں جو قابل قبول نہیں ہے۔

اسلام آباد: چیئرمین تحریک انصاف عمران خان نے کہا ہے کہ طاقت کا استعمال کسی معاملے کا حل نہیں ہے اور فیض آباد دھرنا ختم کرانے کے لیے مذاکرات کا راستہ اپنانا چاہیئے تھا.

وہ اسلام آباد دھرنے کے خلاف ہونے والے آپریشن کے بعد پیدا ہونے والی صورت حال پر ردعمل دے رہے تھے، عمران خان کا دھرنا مظاہرین سے پُرامن رہنے کی اپیل کرتے ہوئے کہنا تھا کہ طاقت کا استعمال معاملے کا حل نہیں تھا.

سماجی رابطے کی ویب سائٹ پر اپنے ایک پیغام میں عمران خان نے کہا کہ ختم نبوت ہمارے ایمان کا بنیادی جز ہے ، راجہ ظفرالحق کی کمیٹی کی تحقیقات کی روشنی میں ذمہ داروں کے خلاف کارروائی کر لی جاتی تو معاملہ یہاں تک نہ پہنچتا.

 فیض آباد آپریشن: 145 زخمی، 5 افراد جاں بحق

انہوں نے مزید کہا کہ حکومت کی نا اہلی کی وجہ سے معاملہ یہاں تک پہنچ گیا ہے کہ ریاست کی رٹ ختم ہوتی نظر آرہی ہے اور ملک جل رہا ہے لیکن وزیراعظم شاہد خاقان بجائے حالات کو کنٹرول کرنے کے نااہل نوازشریف کے دربار حاضری دے رہے ہیں.

سربراہ تحریک انصاف نے کہا کہ شاہد خاقان حکومت کا سارا زور شریف خاندان کی کرپشن بچانے پر ہے، حکومت کے اسی طرزعمل کے باعث قبل از وقت انتخابات کا مطالبہ کرتا آیا ہوں اور آج ایک بار پھر یہی مطالبہ کرنے پر مجبور ہو گیا ہوں.