انگلینڈ کے سابق کپتان اور معروف کمنٹیٹر ناصر حسین قومی ٹیم کے کپتان بابر اعظم کے دفاع میں سامنے آئیں ہیں۔
ناصر حسین نے اسپورٹس ویب سائٹ کو انٹرویو دیتے ہوئے کہا کہ لوگوں کو بابر کے ساتھ تھوڑی نرمی سے پیش آنا چاہیے، وہ اس وقت ایک ایسے مرحلے سے گزر رہے ہیں جہاں ان سے رنز نہیں ہورہے۔
معروف کمنٹیٹر کا کہنا تھا کہ لوگوں کو اندازہ نہیں ہے کہ بابر کس قدر اچھاہے، لوگوں کو اس کی قدر اس وقت ہوگی جب وہ چلا جائے گا کیونکہ اس کے پاس ایک خاص ٹیلنٹ ہے۔
ناصر حسین نے انٹرویو میں کہا کہ پاکستان کو چاہیے کہ وہ اپنے فاسٹ بولرز کو آرام دے اور انہیں وقت کے ساتھ تبدیل کرتا رہے، نسیم اور شاہین دونوں ہی پاکستان کے لیے اہم ترین بولرز ہیں اور انہیں تینوں فارمیٹ کھلانے کے باعث محتاط رہنے کی ضرورت ہے۔
ٹیسٹ میچ سے متعلق ان کا کہنا تھا کہ بابراعظم اچھے کپتان ہیں لیکن وہ اپنے فیلڈرز کو فیلڈ سے دور رکھتے ہیں اور انگلش کپتان بین اسٹوکس کی طرح پارٹ ٹائمرز کا استعمال نہیں کرتے، کپتان کو ہمیشہ سیکھتے رہنا چاہیے۔
واضح رہے کہ انگلینڈ سے ہوم گراؤنڈ پر سیریز میں شکست کے بعد قومی اسکپر بابراعظم کو سوشل میڈیا پر خاصہ تنقید کا نشانہ بنایا جارہا ہے، اس کے علاوہ کچھ افراد کپتان تبدیل کرنے کا بھی مطالبہ کررہے ہیں۔