Tag: فیملی ولاگنگ

سوشل میڈیا کے موجودہ دور میں نت نئے رجحانات فروغ پارہے ہیں، ان میں سے ایک فیملی ولاگنگ بھی ہے۔

بظاہر بے ضرر نظر آنے والی ویڈیوز جن میں روزمرہ کی زندگی اور معمولات کو دستاویزی شکل دی جاتی ہے، ان ویڈیوز سے بچوں کی فلاح و بہبود کے حوالے سے سنجیدہ اور سنگین خدشات جنم لے رہے ہیں۔

سوشل میڈیا پر جس طرح مختلف لوگ اپنی ویڈیوز میں اپنے خاندانی اور نجی زندگی کے بارے میں تفصیلات آن لائن شیئر کر رہے ہیں اس کی وجہ سے رازداری اور استحصال کے امکانات سے متعلق سوالات اٹھ رہے ہیں۔

زیرنظر مضمون میں فیملی ولاگنگ کے خطرات، منفی پہلوؤں اور اس کے نقصانات بیان کرتے ہوئے خاص طور پر بچوں کے لیے تحقیق اور حقیقی مثالوں کے ذریعے ان کے اثرات پر روشنی ڈالی گئی ہے تاکہ ممکنہ نتائج کو اجاگر کیا جاسکے۔

فیملی ولاگنگ کے نقصانات اور خدشات

فیملی ولاگنگ جو کہ ایک مشہور رجحان بن چکا ہے جس میں لوگ اپنی روزمرہ کی زندگی اور معاملات کو آن لائن شیئر کرتے ہیں ان ویڈیوز میں اکثر گھر کے بچوں کو نمایاں طور پر دکھایا جاتا ہے۔

تحقیق کار نیشا تلکدار (2020) کے مطابق یہ رجحان بچوں کی ذہنی صحت اور حفاظت کے لیے سنگین خطرات پیدا کر سکتا ہے۔

چھوٹی عمر کے بچے اپنی زندگی کے آن لائن دستاویزی اثرات کو نہیں سمجھ سکتے اور وہ اپنی رضامندی یا اس سے اختلاف نہیں کرسکتے اس لیے یہ ایک اہم اخلاقی مسئلہ بھی ہے۔

کچھ والدین بچوں کی بھلائی کے بجائے ویڈیو پر ملنے والے ویوز اور آمدنی کو ترجیح دیتے ہیں۔ بعض اوقات ویڈیوز میں ایسے مذاق یا شرمناک مناظر بھی دکھائے جاتے ہیں جس کا مقصد ناظرین کی توجہ حاصل کرنا ہوتا ہے لیکن یہ مناظر بچوں کو جذباتی تکلیف بھی پہنچا سکتے ہیں۔

اس کے علاوہ بچوں کے بچپن کو مستقل طور پر آن لائن محفوظ کرلینا ان کی شناخت اور مستقبل پر گہرے اثرات مرتب کر سکتا ہے۔

کیمرے کے سامنے پرفارم کرنے کا دباؤ اور مسلسل ایکسپوزر بچوں میں اضطراب، ڈپریشن اور حتیٰ کہ شناختی مسائل بھی پیدا کرسکتا ہے۔

سوشل میڈیا پر ذاتی معلومات شیئر کرنا بچوں کو ممکنہ خطرات، جیسے آن لائن ہراسانی یا موقع کی تلاش میں رہنے والے جرائم پیشہ عناصر کا نشانہ بنا سکتا ہے۔

مثبت پہلو

اس حوالے سے ایک مثبت پہلو بھی سامنے آیا ہے کہ جس میں اس بات کو تسلیم کیا گیا ہے کہ کچھ خاندان فیملی ولاگنگ کو ذمہ داری سے کرتے ہیں، جس میں وہ اپنے بچوں کی پرائیویسی اور ان کے تحفظ کا مکمل خیال کرتے ہیں۔

فیملی ولاگنگ کرتے ہوئے والدین کو آن لائن شہرت کے بجائے اپنے بچوں کی فلاح کو اولین ترجیح دینی چاہیے جہاں تک ممکن ہوسکے بچوں کی رضامندی سے کام کریں اور انہیں نقصان دہ مواد میں شامل کرنے سے گریز کریں۔

وی لاگنگ میں بچوں کی آن لائن شمولیت کے حوالے سے رضامندی اور راز داری جیسے مسائل پر واضح قوانین متعارف کرانے کی ضرورت ہے۔

اس حوالے سے صارفین کو بھی چاہیے کہ وہ فیملی ولاگنگ کے کانٹینٹ پر تنقیدی نظر ڈالیں اور ایسے چینلز کی اخلاقیات پر سوال اٹھائیں جو بچوں کے استحصال کا سبب بنتے ہیں۔

یاد رہے کہ فیملی ولاگنگ کرنا کوئی بری بات نہیں یہ سوشل میڈیا کی ایک دلچسپ سرگرمی ہے، اپنے تجربات کو آن لائن شیئر ضرور کریں لیکن اس بات کا لازمی خیال رکھیں کہ بچوں کی حفاظت اور ان کی پرائیویسی کو ترجیح دینا بھی ضروری ہے۔

ان ممکنہ خطرات کو سمجھنے کے بعد ذمہ دارانہ رویے کے لیے آواز بلند کر کے ہم بچوں کے لیے ایک صحت مند آن لائن ماحول کو یقینی بنا سکتے ہیں۔