کراچی : انٹرنیشنل ائیرٹرانسپورٹ ایسوسی ایشن (ایاٹا) نے خلیجی ممالک میں لیبر ویزے پر فیڈرل ایکسائز ڈیوٹی نظر ثانی کرنے کا مطالبہ کردیا۔
تفصیلات کے مطابق خلیجی ممالک میں لیبر ویزے پر فیڈرل ایکسائز ڈیوٹی کی کمی کے معاملے پر انٹرنیشنل ائیرٹرانسپورٹ ایسوسی ایشن نے چیئرمین ایف بی آر کو ہنگامی خط لکھ دیا۔
جس میں کہا ہے کہ ائیرلائنزکیلئے مخصوص ویزا رکھنے والے مسافروں میں فرق،تصدیق میں مشکلات ہوں گی ، ایئرلائنز کو ٹکٹ کی فروخت میں ان مسافروں کی شناخت مشکل ہے جن کےپاس لیبرویزاہو۔
ایاٹا کا کہنا تھا کہ ایئرلائنز عموماً صرف ان ویزوں کو چیک کرتی ہیں جو چیک ان میں مسافروں کے پاس ہوتے ہیں، ویزا کی قسم کی بنیاد پر مختلف ٹیکس کی رقم کو لاگو کرنے سے مہنگا انتظامی بوجھ پڑے گا۔
خط میں تجویز دی گئی ہے کہ اکنامی کلاس میں فیڈرل ایکسائز ڈیوٹی میں کمی تمام گلف،افریقی ملکوں کیلئےہونی چاہیے، یہ ممکن نہ ہو تو گلف ممالک جانیوالی اکنامی پروازوں میں ایف ای ڈی میں رعایت ہونی چاہیے۔
خط میں مزید کہا گیا کہ ایف ای ڈی میں 7 اگست کو دوبارہ تبدیلی کی گئی اوراس کو10اگست سےنافذ کرنے کا کہا گیا ، ائیرلائنز کے لئے انتہائی مختصروقت میں اس کا نفاذ انتہائی مشکل ہوجائے گا۔
ایاٹا نے کہا کہ حکومت ٹکٹوں کے ٹیکسوں میں کسی قسم کی تبدیلی کیلئے پہلے کم از کم 6 ماہ کا وقت دے۔