ریاض: سعودی عرب میں سال 2023 کے 2 ماہ میں 80 نئی فیکٹریوں نے کام کا آغاز کردیا، سنہ 2016 سے سعودی وژن 2030 کے آغاز کے بعد سے سعودی عرب میں کارخانوں کی تعداد میں 50 فیصد اضافہ ہوا ہے۔
اردو نیوز کے مطابق سعودی عرب میں فروری 2023 کے مہینے میں 4.3 بلین ریال کی سرمایہ کاری سے تقریباً 80 نئی فیکٹریوں نے مختلف مصنوعات کی تیاری کا آغاز کیا ہے۔
سعودی وزارت صنعت و معدنی وسائل نے رپورٹ میں بتایا ہے کہ جنوری میں کام شروع کرنے والی 164 فیکٹریوں کے مقابلے میں اس تعداد میں 51 فیصد کمی واقع ہوئی ہے۔
رپورٹ کے مطابق فروری میں غیر دھاتی معدنیات کی صنعت میں 30، خوراک کے کاروبار میں 12، تشکیل شدہ معدنیات کے شعبے میں 8، ربڑ اور پلاسٹک کی تجارت میں 5 اور کیمیکلز کی پیداوار میں 4 فیکٹریاں شامل ہیں۔
اسی مہینے کے دوران وزارت صنعت و معدنی وسائل نے 85 صنعتی لائسنس جاری کیے جو جنوری میں جاری کیے گئے جو 124 کے مقابلے میں 31 فیصد کم ہیں۔
فروری میں جاری کیے گئے 85 لائسنسوں میں ملکی صنعت کے لیے 82.3 فیصد کا اجرا ہوا ہے، نئے لائسنسوں میں سرمایہ کاری کا حجم 1.9 بلین ریال تھا۔
مزید برآں لائسنس حاصل کرنے والوں میں چھوٹے کاروباری ادارے سب سے آگے تھے جنہوں نے 85.8 فیصد لائسنس حاصل کیے، اس کے بعد درمیانے درجے کے کاروباری اداروں نے 11.7 فیصد اور انتہائی چھوٹے کاروباری اداروں نے 2.3 فیصد لائسنس حاصل کیے۔
نئے صنعتی لائسنس 9 انتظامی علاقوں میں تقسیم کیے گئے جن میں 37 فیکٹریوں کے ساتھ ریاض ریجن سرفہرست ہے۔
وزارت کی جانب سے ساز و سامان اور مشینری کے علاوہ دیگر سائز کی دھاتی مصنوعات کی تیاری کے لیے 18 لائسنس، خوراک کی پیداوار کے لیے 14 اور ربڑ اور پلاسٹک کی مصنوعات بنانے کے لیے 10 فیکٹریوں کے لائسنس جاری کیے گئے ہیں۔
گزشتہ ماہ صنعت و معدنی وسائل کے نائب وزیر اسامہ بن عبد العزیز الزمل نے بتایا تھا کہ 2016 میں سعودی وژن 2030 کے آغاز کے بعد سے سعودی عرب میں کارخانوں کی تعداد میں 50 فیصد اضافہ ہوا ہے۔
