کراچی: ایڈیشنل ڈسٹرکٹ اینڈ سیشن عدالت غربی نے سائٹ ایریا میں نجی فیکٹری میں زکوۃ کی تقسیم کے دوران بھگدڑ سے ہلاکتوں کے کیس میں فیکٹری مالک سمیت تمام ملزمان کی درخواست ضمانت خارج کردی۔
تفصیلات کے مطابق سائٹ ایریا کی فیکٹری میں زکوٰۃ کی تقسیم کے دوران بھگڈر سے ہلاکتوں کےکیس میں فیکٹری مالک عبد الخالق سمیت دیگر ملزمان کی درخواست ضمانت کی سماعت ہوئی۔
عدالت نے کہا کہ مقدمے کے ابتدائی مرحلے پر ضمانت نہیں دی جاسکتی، چالان کے بعد ملزمان کےکردار کے پیش نظر ضمانت کا فیصلہ کیا جاسکتا ہے۔
وکیل ملزم کا کہنا تھا کہ ہرسال کی طرح فیکٹری مالک فوت ہو جانے والے ملازمین کے اہل خانہ کو رقم دے رہے تھے معاملہ ہر سال اسی طرح ہی ہوتا لیکن اس بار لوگوں کی جانب سے دھاوا بول دیا گیا۔
کراچی میں راشن کی تقسیم کے دوران بھگدڑ مچنے سے 11 افراد جاں بحق
ملزم کے وکیل کا کہنا تھا کہ واقعہ حادثاتی طور پر رونما ہوا میرے موکل کا اس میں کوئی قصور نہیں، جس وقت بھگدڑ ہوئی فیکٹری مالک عبدالخالق موقع پر موجود ہی نہیں تھے۔
جبکہ سرکاری وکیل کا کہنا تھا کہ ملزمان کیخلاف غفلت، لاپرواہی کی دفعات کے تحت مقدمہ درج کیاگیا، ملزمان نے پولیس اور انتظامیہ کو اس حوالے سے آگاہ نہیں کیا تھا، ملزمان کی لاپرواہی کی وجہ سے واقعہ رونما ہوا۔
عدالت نے تمام ملزمان کی درخواست ضمانت خارج کردی۔
واضح رہے کہ کراچی کے علاقے سائٹ ایریا نورس چورنگی پر نجی فیکٹری کی جانب سے زکوۃ کی تقسیم کے دوران بھگدڑ مچنے سے خواتین اور بچوں سمیت 11 افراد جاں بحق اور متعدد افراد زخمی ہوگئے تھے۔
جاں بحق ہونے والوں میں 3 بچے اور 8 خواتین شامل تھے۔ عینی شاہدین کا کہنا تھا کہ زکوٰۃ کی رقم کی تقسیم کیلئے لوگوں کو فیکٹری میں بلایا گیا تھا۔
