کراچی : قائدِ حزبِ اختلاف خورشید شاہ کا کہنا ہے کہ گورنر راج لگا تو سندھ نہیں پورے ملک میں لگے گا۔
کراچی میں ایم کیو ایم کے خلاف آپریشن ، متحدہ قومی موومنٹ کی صوبائی حکومت میں شمولیت کا امکانات معدوم، صوبے کی سیاسی صورتحال دلچسپ ہوگئی۔
گورنر راج سے متعلق قیاس آرائیوں پر خورشید شاہ نے دوٹوک کہہ دیا کہ آئینی ترمیم کے مطابق گورنر راج لگنا مشکل ہے اور لگا بھی تو سندھ کی بجائے پورے ملک میں لگے گا۔
اپوزیشن لیڈرنےکہا کہ صولت مرزا کی بات نہیں کروں گا، عزیر بلوچ کا کیس الگ ہے ۔عزیر بلوچ کو لیاری آپریشن کے باعث ملک سے فرار ہونا پڑا۔
گزشتہ روز وزیرِاعلیٰ سندھ قائم علی شاہ نے کہا تھا کہ پیپلز پارٹی نے ایم کیوایم سے مذاکرات موخر کردیئے ہیں۔
وزیراعلیٰ سندھ کا کہنا تھا کہ کراچی میں امن و امان کی صورتحال بہتر ہونے تک ایم کیوایم سے مذاکرات آگے نہیں بڑھیں، حالات بہتر ہونے تک انتظار کریں گے۔
یاد رہے کہ ہمیشہ مفاہمت کی سیاست کی بات کرنے والے آصف علی زرداری نے کچھ روز پہلے ہی پارٹی رہنماؤں کیساتھ اجلاس میں ایم کیوایم کی حکومت میں شمولیت اور مذاکرات کیلئے کمیٹی بنانے کی ہدایت کی تھی مگر نائن زیرو پر چھاپے اور صولت مرزا کے انکشافات کے بعد پیپلز پارٹی نے یکدم ہی پلٹا کھایا۔
