Tag: قائد حزب اختلاف سید خورشید شاہ

اسلام آباد: قومی اسمبلی میں قائدِ حزب اختلاف خورشید شاہ نے کہا ہے کہ پی ایس ایل پاکستان کا امیج ہے جس کے ذریعے پاکستانی عوام اور دنیا کومثبت پیغام جانا چاہیے تھا لیکن بدقسمتی سے پی ایس ایل اپنےآغاز میں ہی تنازعات کا شکار ہوگئی۔

اسلام آباد میں میڈیا سے گفتگو کرتے ہوئے انہوں نے کہا کہ پی ایس ایل میں میچ فکسنگ کے حوالے جو بھی خبریں آئی ہیں اس میں کھلاڑیوں کی حرص و ہوس کے ساتھ ساتھ انتظامی کوتاہی بھی شامل ہے۔

انہوں نے سوال اُٹھایا کہ بکیز سے کھلاڑیوں کی ملاقات کاخدشہ تھا تو اس کے سدباب کے لیے پہلے سے انتظامات کیوں نہ اُٹھائے گئے؟ اگر پہلے سے اقدامات اُٹھالیے جاتے تو مشکوک شخص رسائی حاصل نہ کر پاتا آخر کار یہ ملک کی عزت اور وقار کا معاملہ ہے۔

خورشید شاہ نے کہا کہ پی ایس ایل سے پہلے میچ فکسنگ کے مسئلے پر کھلاڑیوں کی اچھی طرح رہنمائی کی جاتی تو کھلاڑی ایسےمسائل سے خود بھی دوچار نہ ہوتے۔

انہوں نے کہا کہ بچوں کو غلطی کا موقع دے کر پکڑنا کوئی کمال نہیں بلکہ عقل مندی کا تقاضا تھا کہ برائی کو کھلاڑیوں تک پہنچنے سے روکا جائے اگر ایسا کرلیا جاتا تو یوں سبکی نہ اُٹھانا پڑتی۔

پیپلز پارٹی کے رہنما نے کہا کہ میچ فکسنگ کوئی نیا مسئلہ نہیں لیکن اب تک ایسے مسائل کےتدارک کے لیےکوئی مستقل حل نہیں نکالا جاسکا جس کے باعث پی ایس ایل میں بھی یہ ناخوشگوار واقعہ رونما ہوا۔

قائد حزب اختلاف نے وزیراعظم پاکستان سے میچ فکسنگ کا نوٹس لیتے ہوئے اس مسئلے کے پائیدار حل کے لیے ضروری اقدامات اٹھانے کی اپیل کی اور کرکٹ میں اعلیٰ عہدوں کی تقسیم میں سیاست کے بجائے میرٹ پر کو ترجیح دینے کا مشورہ بھی دیا۔

سکھر : قومی اسمبلی میں قائد حزب اختلاف خورشید شاہ کا کہنا ہے کہ موجودہ صورت حال میں نہیں لگتا کہ حکومت اپنی مدت پوری کر پائے گی،حکومت مشکل وقت میں پاؤں پڑتی ہے اور اچھے وقت میں گلے پہ پاؤں رکھتی ہے۔

میڈیا سے گفتگو کرتے ہوئے پاکستان پیپلز پارٹی کے رہنماء اور قومی اسمبلی میں اپوزیشن لیڈر خورشید شاہ نے کہا ہے کہ کھلے دل سے حکومت کے ساتھ بیٹھنے کو تیار ہیں جس کے لیے حکومت کو ہمارے پارٹی لیڈربلاول بھٹو کے چارمطالبات پر بات چیت کرنے کے لیے پہل کرنی چاہیے،اگر حکومت بلائے گی توضرور بات چیت کریں گے۔

خورشید شاہ نے کہا کہ موجودہ حالات دیکھ کر نہیں لگتا کہ حکومت 2018ء تک چل نہ پائے گی معاملات کو جمہوری انداز سے چلانے کے لیے باہمی افہام و تفہیم اور بحث و مباحثے کی ضرورت ہوتی ہے،سعد رفیق نے ملاقاات کا پیغام پہنچایا تھا اور اسحاق ڈار صاحب نے بھی جمعرات کو ملاقات کا عندیہ دیا تھا،دیکھنا ہے کہ کب تک عملی طور پرملاقات ہو پاتی ہے۔

انہوں نے حکمراں جماعت کے رویے پر مایوسی کا اظہار کرتے ہوئے شکوہ کیا کہ جب حکومت پر اچھا وقت ہوتا ہے تو مدد کے لیے اپوزیشن کے پاؤں پرجاتی ہے لیکن جب اچھا وقت آتا ہے تو اپوزیشن کے ہی گلے پہ پاؤں رکھ دیتی ہے۔

خورشید شاہ نے کہا کہ عمران خان وزیراعظم نواز شریف کے سب سے بڑے حامی ہیں کیونکہ تحریک انصاف کی پالیسیوں سے وزیراعظم کو نقصان کے بجائے الٹا فائدہ ہی ہو رہا ہے اور حکومت مضبوط ہو تی جا رہی ہے۔

قائد حزب اختلاف خورشید شاہ نے وضاحت کی کہ پیپلز پارٹی وکٹوں کے دونوں جانب نہیں کھیلتی،ہم 2 نومبر کو دارالخلافہ بند کرنے کے حق میں نہیں ہیں،تحریک انصاف نے بہت اچھی بساط بچھائی ہے لیکن یہ بساط جلد الٹنے والی ہے،عوام کو مشکل میں نہیں ڈالنا چاہتے کیوں کہ سیاستدانوں کا کام عوام کو ریلیف دینا ہوتا ہے انہیں مشکلات میں ڈالنا نہیں۔

ایک سوال کے جواب میں انہوں نے کہا کہ جس طرف حالات جارہے ہیں ہیں مجھے خوف ہے کہ حکومت نہ مانی اور عمران خان بھی ضد پر اڑے رہے تومعاملہ تصادم کی صورت اختیار کر جائے گا اور اگر حالات خراب ہوئے اور حکومت گئی تو پیپلز پارٹی ذمہ دار نہیں ہو گی۔

قائد حزب اختلاف خورشید شاہ نے مزید کہا کہ ہم نے پھانسیاں دیکھی ہیں، کچھ لوگوں نے تو تھپڑ بھی نہیں دیکھا، پنجاب میں ہماری کامیابیاں سرپرائز ہوں گی۔

ٹنڈو محمد خان : قائد حزب اختلاف خورشید شاہ نے کہا ہے کہ سندھ حکومت کو اختیار حاصل ہے کہ جہاں بہتر سمجھے رینجرز کو اختیارات دے اور ایسا کرنے پر کوئی آئینی انحراف نہ ہو گا۔

تفصیلات کے مطابق قائد حزب اختلاف خورشید شاہ نے ٹنڈو محمد خان میں میڈیا سے بات کرتے ہوئے کہا کہ رینجرز کے‌حوالے سے سندھ حکومت جو بھی اقدام کرے گی وہ آئین میں رہتے ہوئے کرے گی،سندھ حکومت کا آئینی حق ہے کہ جہاں بہتر جانے رینجرز کو اختیار دے،صوبائی حکومت کی کال پر رینجرز اس جگہ امن عامہ کے قیام کے لیے کارروائی کر سکتی ہے۔

انہوں نے وضاحت دی کہ حکومت مخالف تحریکوں کا متحدہ اپوزیشن سے کوئی تعلق نہیں ہے،اگر کوئی حکومت مخالف تحریک کا آغاز کرنا چاہتا ہے تو وہ اُس کی اپنی انفرادی سیاسی حکمت عملی ہو گی،متحدہ اپوزیشن کا اس تحریک سے کوئی تعلق نہیں تا ہم اگر حکومت نے ہٹ دھرمی کی ریت جاری رکھی تو متحدہ اپوزیشن کے پاس بھی کئی آپشن ہیں۔

ایک سوال کے جواب میں اپوزیشن لیڈر کا کہنا تھا کہ پاناما لیکس معاملے پر اب تک تین ممالک کے وزیر اعظم مستعفی ہو چکے ہیں،دنیا بھر میں پانامہ لیکس میں نام آنے والوں کے خلاف عوامی دباؤ بڑھتا جا رہا ہے اس لیے ہم چاہتے ہیں کہ پاکستان میں بھی پاناما لیکس معاملے کا حل نکالا جائے ،اس کاحل نکالنا حکومت کی اخلاقی ذمہ داری ہے۔

انہوں نے مزید کہا کہ پاناما لیکس کے معاملے پر 8میٹنگز ہوچکی ہیں لیکن کوئی نتیجہ نہیں نکلا ،حالیہ میٹنگ میں نئی قانون سازی کرنے کا فیصلہ ہوا ہے حکومت کی سست روی سے یہ معاملہ گھمبیر صورت اختیار کرتا جارہا ہے جس کے سدباب کے لیے فوری اور دیرپا اقدام اُٹھانے کی ضرورت ہے۔

آخر میں اپوزیشن لیڈر اور پاکستان پیپلز پارٹی کے سینیئر رہنما خورشید شاہ نے آزاکشمیر انتخابات میں اُن کی جماعت کی ناکامی پر موقف اپنایا کہ آزاد کشمیر الیکشن میں ہمیشہ وہی جماعت کامیاب ہوتی ہے جو اسلام آباد کی بھی حکمران جماعت ہو۔