واشنگٹن : امریکی صدر ڈونلڈ ٹرمپ پر قاتلانہ حملہ روکنے میں ناکامی پر امریکی خفیہ ادارے سیکریٹ سروس کے چھ اہلکاروں کو معطل کر دیا گیا۔
تفصیلات کے مطابق امریکی خفیہ ادارے سیکریٹ سروس نے صدر ڈونلڈ ٹرمپ پر قاتلانہ حملہ روکنے میں ناکامی پر چھ اہلکاروں کو معطل کر دیا۔
ان اہلکاروں کی معطلی دس سے بیالیس دن کی تنخواہ کے بغیر سزا اور محدود ذمہ داریوں پر مشتمل ہیں۔
سیکریٹ سروس نے واقعے کو ناکامی قرار دیا، سیکریٹ سروس کے ڈائریکٹر شان کرن نے کہا کہ ہم نے متعدد اقدامات کیے ہیں تاکہ اس نوعیت کا واقعہ دوبارہ نہ ہو۔
انھوں نے یہ انکشاف بھی کیا کہ ٹرمپ کے فلوریڈا گالف کورس پر بھی ایک اور قاتلانہ حملے کی کوشش کو سیکریٹ سروس نے ناکام بنایا، ریان راؤتھ نامی شخص نے ستمبر 2024ء میں ٹرمپ کو نشانہ بنانے کی منصوبہ بندی کی تھی اور جھاڑیوں میں چھپ کر بندوق سے حملہ کرنے کا ارادہ رکھتا تھا تاہم راؤتھ کو موقع پر موجود سیکریٹ سروس اہلکار نے وقت پر دیکھ لیا اور گرفتاری عمل میں لائی گئی۔
گزشتہ سال ٹرمپ پر صدارتی مہم کے دوران حملہ ہوا تھا ، حملہ آور ایک قریبی عمارت کی چھت پر چڑھ گیا تھا، جہاں سے اس نے ٹرمپ پر گولی چلائی۔
اس حملے میں ایک شخص ہلاک اور ٹرمپ معمولی زخمی ہوئے تھے، جبکہ حملہ آور کو موقع پر ہی گولی مار کر ہلاک کر دیا گیا تھا۔
