Tag: قادر خان

قادر خان اداکار بھی تھے، اور اسکرپٹ رائٹر بھی اور ایسے اسکرپٹ رائٹر جن کے مکالمے بہت مقبول ہوئے۔ آج بولی وڈ کے ڈائیلاگ کنگ کہلانے والے قادر خان کی برسی منائی جارہی ہے۔

اداکار اور اسکرپٹ رائٹر قادر نے تین سو سے زائد فلموں میں کام کیا اور ڈھائی سو سے زیادہ فلموں کے مکالمے لکھے۔ انھوں نے سنہ 1973 میں راجیش کھنہ کی فلم ‘داغ’ سے بولی وڈ میں اپنا کیریئر شروع کیا تھا۔ قادر خان نے 70 کی دہائی میں ہی شہرت حاصل کرلی تھی۔ بولی کی کام یاب ترین فلمیں جن میں خون پسینہ، لاوارث، امر اکبر انتھونی، نصیب، قلی شامل ہیں، ان فلموں کے مکالمے بہت مقبول ہوئے اور یہ قادر خان کے قلم سے نکلے تھے۔

اداکار کی زندگی کے ابتدائی دور کی بات کی جائے تو افغانستان ان کا وطن تھا اور تین بھائیوں کی موت کے بعد قادر خان پیدا ہوئے، تب ان کے ماں باپ نے افغانستان سے انڈیا ہجرت کی۔ لیکن ماں باپ کی طلاق ہوگئی اور قادر خان نے سوتیلے باپ کے ساتھ غربت دیکھی۔ تعلیمی سلسلہ کسی طرح جاری رکھتے ہوئے سول انجیئرنگ کا ڈپلومہ حاصل کیا اور گریجویشن کرکے ممبئی کے ایک کالج میں پڑھانے لگے۔ اس عرصہ میں وہ اسکرپٹ لکھنے کا سلسلہ شروع کرچکے تھے۔ کالج میں ایک تھیٹر کے لیے قادر خان کو بہترین اداکار اور مصنّف کا انعام ملا اور ساتھ ہی ایک فلم کے لیے مکالمے لکھنے کا موقع بھی۔ یہ فلم 1972 میں ریلیز ہوئی اور نام تھا ‘جوانی دیوانی’ جو ہٹ ہوگئی۔ قادر خان کو مزید فلمیں ملنے لگیں۔ لیکن سنہ 1974 میں فلم ‘روٹی’ کے بعد قادر خان کی لکھی فلمیں اور ڈائیلاگ ہٹ ہونے لگے۔

قادر خان 22 اکتوبر 1937 کو پیدا ہوئے تھے۔ انھوں‌ نے عثمانیہ یونیورسٹی سے پوسٹ گریجویٹ تعلیم مکمل کی۔ اس کے بعد عربی زبان کی تربیت کے لئے ایک ادارہ قائم کرنے کا فیصلہ کیا۔ خود عربی سیکھی اور دینی کاموں‌ میں مشغول ہوگئے۔ طبیعت خراب ہونے کے بعد زیادہ تر وقت ان کا کینیڈا میں بچوں کے ساتھ بیتا۔ اور کینیڈا ہی میں 31 دسمبر 2018ء کو وفات پائی۔

سال 1977 میں قادر خان کی خون پسینہ اور پرورش جیسی فلمیں ریلیز ہوئیں اور ان کی کام یابی کے بعد قادر خان کو اچھی فلموں کی پیشکشں شروع ہوگئی۔ ان فلموں میں مقدر کا سکندر، مسٹر نٹور لال، سہاگ، عبداللہ، دواور دو پانچ ، لوٹ مار، قربانی، یارانہ شامل تھیں۔قادر خان نے کامیڈی کردار اور بطور ولن بھی شہرت کی نئی بلندیوں کو چھوا اور فلم انڈسٹری میں اپنی پہنچان بنائی۔ فلم قلی 1983ء میں ریلیز ہوئی تھی جو قادر خان کے کیریئر کی سپرہٹ فلموں میں سے ایک ہے۔ 1990 میں "باپ نمبری بیٹا دس نمبری، بھی ان کی اہم فلموں میں سے ایک ہے اور اس پر قادر خان کو فلم فیئر ایوارڈ سے نوازا گیا۔

ہندوستانی فلموں پر ہونے والی گفتگو اردو زبان اور اس کی تہذیب کے ذکر کے بغیر مکمل نہیں ہوسکتی۔ ہندوستانی فلموں نے اردو کی آغوش میں آنکھیں کھولیں اور اردو زبان کو اپنے اظہار کا ذریعہ بنایا۔

پہلی ہندوستانی فلم ’عالم آرا‘ پر غور کیا جائے تو یہ بات وثوق سے کہی جاسکتی ہے کہ اس کی کہانی، مکالمے، نغمے، برتاؤ وغیرہ سب کے سب اردو کے رنگ میں ہیں۔ اس فلم کے مکالمے کی زبان اردو تھی جسے عوامی سطح پر بے حد مقبولیت حاصل تھی۔ اس فلم کے ہِٹ ہونے میں مکالمے کا اہم رول رہا۔ اس پہلی متکلم فلم ’عالم آرا‘ کے مکالمے منشی ظہیر نے لکھے تھے جو اردو میں تھے۔

عالم آرا سے لے کر اب تک کی تمام ہندوستانی فلمیں اگر کام یابی سے ہم کنار ہوئیں تو اس میں مکالمے کا رول اہم رہا ہے۔ ابتدا میں موسیقی سے لبریز فلمیں شائقین کے لیے لطف اندوزی کا ذریعہ تھیں، مگر سنیما صنعت کی ترقی کے ساتھ رواں دواں زندگی کی پیش کاری کے لیے جہاں کئی ذرائع اظہار استعمال کیے گئے، وہیں جذبات و احساسات کے حسین اور پُر اثر اظہار کے لیے مکالمے کو بہترین آلۂ کار مانا گیا۔ بولتی فلموں کے آغاز سے اب تک مکالمے کی اہمیت برقرار ہے۔ ہزاروں مکالمے پسندیدگی کی سند پا چکے ہیں اور خاص و عام کی زبان پر جاری ہیں۔ جہاں بھی فلموں میں پُر اثر اداکاری کا ذکر ہوتا ہے وہیں مشہور ڈائلاگ برسوں تک شائقین بھول نہیں پاتے۔

آخر مکالمے میں ایسی کیا بات ہے کہ فلموں میں اس کی اتنی اہمیت ہے۔ اس کو تعریف کا جامہ کس طرح عطا کر سکتے ہیں، اس سلسلے میں فلموں سے وابستہ فن کاروں کی رائے سود مند ہو سکتی ہے اور ان نکات پر گفتگو کی جا سکتی ہے جن کی طرف آرٹسٹوں نے توجہ دلائی ہے۔ جناب احسن رضوی جنھوں نے فلم مغلِ اعظم کے کچھ مکالمے لکھے، ان کے مطابق ’’مکالمہ وہ پیرایۂ گفتگو ہے جو کہانی کی تمام ضرورتوں پر حاوی ہو۔‘‘ انھوں نے کہانی اور منظرنامے میں مکالمے کی بنیادی حیثیت کو قبول کیا ہے۔ جدید شاعری کا اہم ترین نام اخترالایمان تقریباً چالیس سال تک فلموں سے وابستہ رہے۔ کہانیاں، شاعری اور مکالمے انھوں نے فلموں کے لیے لکھے۔

فلم کی کام یابی کے لیے جن نکات پر محنت کی جاتی رہی ہے ان میں مکالمہ بھی ایک ہے۔ مکالمے صرف تحریر نہیں کیے جاتے ہیں بلکہ اس کی قرأت کو ریکارڈ کیا جاتا ہے۔ مکالمہ نویس اور اداکار کے درمیان مکالمے پر تبادلۂ خیال کو ضروری تصور کیا جاتا ہے۔ اداکار کو اس بات کے لیے تیّار کیا جاتا ہے کہ مکالمے اس انداز سے ادا کیے جائیں جو اس زبان کی اصلیت کو برقرار رکھے۔ اس کے لیے باضابطہ طور پر آدمی بحال کیے جاتے ہیں۔

اردو زبان کی ہمہ گیری اور مقبولیت کے پیشِ نظر فلموں کے مکالمے میں صرف الفاظ استعمال نہیں ہوتے ہیں بلکہ لہجہ بھی اردو والا ہی ہوا کرتا ہے۔ چند مکالمے ملاحظہ کیجیے اور ان میں اردو کی جلوہ گری محسوس کیجیے۔

’’آج میرے پاس گاڑی ہے، بنگلہ ہے، پیسہ ہے، تمہارے پاس کیا ہے؟‘‘۔۔۔۔ ’’میرے پاس، میرے پاس ماں ہے۔‘‘

’’آپ کے پاؤں بہت حسین ہیں، انھیں زمین پر مت اتاریے گا، میلے ہو جائیں گے۔‘‘ (فلم پاکیزہ)

’’انار کلی، سلیم کی محبّت تمہیں مرنے نہیں دے گی اور ہم تمہیں جینے نہیں دیں گے۔‘‘ (فلم مغلِ اعظم)

’’بڑے بڑے شہروں میں چھوٹی چھوٹی باتیں ہوتی رہتی ہیں۔‘‘ (فلم دل والے دلہنیا لے جائیں گے)

کبھی کبھی کچھ جیتنے کے لیے کچھ ہارنا پڑتا ہے۔ اور ہار کر جیتنے والے کو بازی گر کہتے ہیں۔‘‘ (فلم بازی گر)

یہ وہ مکالمے ہیں جو فلم دیکھنے والے حضرات کو ازبر ہیں۔ عوام میں ان مکالموں کا استعمال روزمرّہ کی طرح ہوتا ہے۔ کسی زبان کی سب سے بڑی خوبی یہ ہوتی ہے کہ اس کو بولنے والے سے اثر انداز ہو کر اس کو جاننے کی سعی کرنا۔ اردو زبان کی خصوصیت ہے کہ دوسری زبانوں کو جاننے والے جب ان الفاظ کو سنتے ہیں تو اس کو سیکھنے کی للک ہوتی ہے۔ ہندی یا دوسری علاقائی زبانوں کو جاننے اور بولنے والے اردو کے الفاظ کا استعمال کرکے خوش ہوتے ہیں اور اس کے حُسن کی تعریف کرتے ہیں۔

ہندوستانی فلموں کی ایک صد سالہ تاریخ کا مطالعہ کرنے سے واضح ہوتا ہے کہ ’عالم آرا‘ سے اب تک کی فلموں میں مکالمے کی حیثیت کلیدی رہی ہے۔ بے حد کام یاب فلمیں یا باکس آفس پر سپر ہٹ ہو نے والی فلموں کی کام یابی کی وجہ اگر تلاش کی جائے تو جہاں دوسرے عناصر کا نام آئے گا وہیں مکالمے کو کسی طور پر نظر انداز نہیں کیا جاسکتا۔

(محمد منور عالم کے مضمون سے انتخاب)