Tag: قاضی فائز عیسیٰ

لندن : لندن پولیس نے سابق چیف جسٹس قاضی فائز عیسیٰ کی گاڑی پر حملہ کیس کی انکوائری ناکافی شواہد کے باعث بند کر دی اور کہا موجودہ شواہد پر عدالت میں جرم ثابت نہیں کرواسکیں گے۔

تفصیلات کے مطابق لندن پولیس نے سابق چیف جسٹس قاضی فائزعیسیٰ پرحملےکی تفتیش ختم کردی،ذرائع نے بتایا کہ کراؤن پراسیکیوشن سروس نے کیس کو عدالت لے جانے سے معذرت کی۔

ذرائع کا کہنا تھا کہ سی پی ایس نے پولیس کو بتایا موجودہ شواہد پر عدالت میں جرم ثابت نہیں کرواسکیں گے۔

پاکستان ہائی کمیشن لندن نے پولیس کو واقعےکی شکایت درج کرائی تھی تاہم سابق چیف جسٹس قاضی فائز عیسٰی مقدمےمیں مدعی نہیں بنے تھے۔

ذرائع نے کہا کہ پولیس نےواقعےمیں ملوث افرادکوواچ لسٹ میں ڈال رکھاہے، پولیس نے واقعے میں ملوث کسی بھی شخص کا انٹرویونہیں کیا، ہائی کمیشن نے حکومت پاکستان کی ہدایت پر شکایت درج کروائی تھی۔

مزید پڑھیں : لندن میں جسٹس قاضی فائز عیسیٰ کی گاڑی پر حملے کے معاملے پر اہم پیشرفت

یاد رہے لندن میں پی ٹی آئی کے کارکنوں نے سابق چیف جسٹس کی گاڑی کو روکنے کی کوشش کی تھی ، یہاں تک کہ اس کی کھڑکیوں کو توڑنے کی بھی کوشش کی، انہوں نے قاضی عیسیٰ کی گاڑی دیکھ کر نعرے لگائے اور اس کے ساتھ دوڑ پڑے۔

بعد ازاں وزیر داخلہ محسن نقوی نے بھی لندن میں سابق چیف جسٹس آف پاکستان جسٹس کی گاڑی پر حملے کی شدید مذمت کرتے ہوئے نیشنل ڈیٹا بیس اینڈ رجسٹریشن اتھارٹی (نادرا) کو حملہ آوروں کی شناخت کے لیے فوری اقدامات کرنے کی ہدایت کی تھی۔

خیال رہے کہ لندن میں پاکستانی ہائی کمیشن نے سابق چیف جسٹس آف پاکستان جسٹس ریٹائرڈ قاضی فائز عیسیٰ پر حملے کی باقاعدہ شکایت کسی کا نام لیے بغیر دائر کی تھی۔

لاہور: پنجاب اسمبلی میں سابق چیف جسٹس پاکستان قاضی فائز عیسیٰ کی گاڑی پر حملے کے خلاف قرارداد کو کثرت رائے سے منظور کر لیا گیا۔

پچھلے دنوں لندن میں جسٹس (ر) قاضی فائز عیسیٰ کی گاڑی پر کچھ پاکستانیوں کی طرف سے حملہ کیا گیا تھا جس کی ویڈیوز اور تصاویر بھی سوشل میڈیا کے ذریعے سامنے آئی تھیں۔

آج پنجاب اسمبلی کے اجلاس کے دوران حکومتی رکن احسن رضا نے قاضی فائز عیسیٰ کی گاڑی پر حملے کے خلاف قرارداد پیش کی جس کا متن تھا کہ یہ حملہ سابق چیف جسٹس پر نہیں بلکہ پورے پاکستان پر کیا گیا ہے۔

قراردار میں کہا گیا کہ سوشل میڈیا پلیٹ فارم پر حملہ کی ایک ہفتہ سے کال دی جا رہی تھی، واقعے ملوث افراد کے خلاف سخت قانونی کارروائی کی جائے، برطانیہ سے بات کر کے ذمہ داران کے خلاف مقدمہ درج کروایا جائے۔

اس پر اسپیکر صوبائی اسمبلی ملک محمد احمد خان نے رولنگ دی کہ قرارداد کی کاپی وفاقی حکومت کو بھیجی جائے، برطانیہ کی ڈپلومیٹک پولیس نے پاکستانی ہائی کمیشن کا دورہ کیا ہے، وفاقی حکومت قرارداد کی کاپی برطانیہ کی ڈپلومیٹک پولیس کو بھی بھیجے۔

یاد رہے کہ چند روز قبل حملے کے واقعے میں 23 پاکستانیوں کے نام پاسپورٹ کنٹرول لسٹ میں شامل کیے گئے۔ ذرائع نے بتایا تھا کہ پی سی ایل میں لندن میں مظاہروں سے شہرت پانے والے شایان علی کا نام شامل ہے۔

لسٹ میں سعدیہ فہیم، فہیم گلزار، ماہین فیصل، سدرہ طارق، حبہ طارق کا نام بھی شامل ہے جبکہ بہن کے کینسر کا علاج کروانے جانے والی ملائکہ بخاری کا نام بھی پی سی ایل میں شامل ہے۔

ذرائع کے مطابق وقاص چوہان، محسن حیدر، ضمیر اکرم، سردار تیمور، پرویز علی، رخسانہ کوثر ودیگر کا نام بھی لسٹ میں شامل ہے۔

پاسپورٹ کنٹرول لسٹ میں شیخ محمد جمیل، مہران حبیب، زو احمد، رحمان انور، محمد صادق خان، خدیجہ کاشف، محمد نوید افضل، شہزاد قریشی، سلیمان علی شاہ اور بلال انور کے نام بھی شامل ہیں۔

لندن : سابق چیف جسٹس قاضی فائز عیسیٰ کی گاڑی پر حملے کے واقعے پر برطانوی ڈپلومیٹک پولیس لندن میں پاکستانی ہائی کمیشن پہنچ گئیں اور واقعے پر بریفنگ لی۔

تفصیلات کے مطابق پاکستان ہائی کمیشن کی گاڑی کے سامنے احتجاج کے معاملے میں پیشرفت سامنے آئی، لندن میں برطانوی ڈپلومیٹک پولیس نے پاکستان ہائی کمیشن کا دورہ کیا۔

ذرائع نے بتایا کہ پاکستانی ہائی کمیشن لندن کے افسران سے ڈپلومیٹک پولیس کے وفد نے ملاقات کی، پاکستان ہائی کمیشن کے افسران نے واقعہ کے حوالے سے بریفنگ دی۔

ڈپلومیٹک پولیس نے واقعے کی مکمل تحقیقات کی یقین دہانی کراتے ہوئے کہا کہ پولیس ویڈیوز اور سی سی ٹی وی فوٹیج کے ذریعے تفتیش کا عمل آگے بڑھا رہی ہے۔

مزید پڑھیں : لندن میں قاضی فائز عیسیٰ‌ کی گاڑی پر حملے کا واقعہ، 23 پاکستانیوں کے نام پی سی ایل میں شامل

پولیس کو بریفنگ دیتے ہوئے سفارتی عملے نے بتایا کہ جب یہ واقعہ پیش آیا، سابق چیف جسٹس ہائی کمیشن کی گاڑی میں موجود تھے۔

خیال رہے جسٹس قاضی فائز برطانیہ میں کچھ ہفتے قیام کے بعد گزشتہ روز پاکستان روانہ ہوگئے ہیں۔

یاد رہے 29 اکتوبر کو پاکستان ہائی کمیشن کی گاڑی کے سامنے احتجاج کے معاملے پر برطانوی پولیس نے مقدمہ درج کرکے کرائم ریفرنس نمبر جاری کیا تھا۔

بعد ازاں پاسپورٹ حکام نے سابق چیف جسٹس پر حملے کے واقعے میں 23 پاکستانیوں کے نام پاسپورٹ کنٹرول لسٹ میں شامل کیا تھا، جس میں پی سی ایل میں لندن میں مظاہروں سے شہرت پانے والے شایان علی کا نام بھی شامل تھا۔

لندن : برطانوی پولیس نے سابق چیف جسٹس قاضی فائز عیسیٰ کی گاڑی پر حملے کرنے والوں کے خلاف مقدمہ درج کرکے باضابطہ تحقیقات کا آغاز کردیا۔

تفصیلات کے مطابق لندن میں 29 اکتوبر کو پاکستان ہائی کمیشن کی گاڑی کے سامنے احتجاج کے معاملے پر برطانوی پولیس نے مقدمہ درج کرکے کرائم ریفرنس نمبر جاری کر دیا۔

سفارتی ذرائع نے بتایا کہ برطانوی پولیس نے معاملے کی باضابطہ تحقیقات کا آغازکردیا ہے، برطانوی اعلیٰ سفارتی حکام کیساتھ معاملہ اٹھانے پر مقدمہ درج کیا گیا۔

ذرائع کا کہنا تھا کہ سفارتی گاڑی میں سابق چیف جسٹس قاضی فائزعیسیٰ اورانکی اہلیہ سوارتھے،معاملے کی تحقیقات مقامی قوانین کے مطابق کی جائیں گی۔

یاد رہے سابق چیف جسٹس پاکستان پر حملے میں ملوث افراد کے خلاف کارروائی کرنے کے لیے وزارت خارجہ کی جانب سے پاکستان ہائی کمیشن کو ہدایت جاری کی گئی تھی۔

مزید پڑھیں : قاضی فائز پر حملہ، پاکستانی ہائی کمیشن کو برطانیہ میں قانونی کارروائی کی ہدایت

ذرائع نے بتایا تھا کہ وزارت خارجہ کی جانب سے ملزمان کو سزا دلانے کیلئے قانونی راستہ اختیار کرنے کی ہدایت کی گئی ہے۔

اس سے قبل وفاقی وزیرداخلہ محسن نقوی نے لندن میں سابق چیف جسٹس کی گاڑی پر حملہ کرنے والوں کی شناخت کے لیے اقدامات کا حکم دیا تھا۔

اسلام آباد: رہنما مسلم لیگ (ن) طلال چوہدری نے چیف جسٹس پاکستان قاضی فائز عیسیٰ سے مطالبہ کیا ہے کہ وہ سابق ججز کے خلاف احتساب کا عمل شروع کریں۔

طلال چوہدری نے اپنے ایک بیان میں کہا کہ چیف جسٹس پاکستان قاضی فائز عیسیٰ بھی احتساب عمل شروع کریں، اگر آپ نہیں کریں گے تو کوئی اور کرے گا اور پھر گلامت کیجیے گا۔

(ن) لیگی رہنما نے کہا کہ اہم اور طاقتور ادارے نے احتساب اپنے گھر سے شروع کیا ہے تو باقی اداروں کو بھی کرنا ہوگا کیونکہ احتساب پاکستان کی ضرورت ہے۔

انہوں نے کہا کہ ماضی میں جان بوجھ کر دھرنے دیے گئے، سابق چیف جسٹس پاکستان ثاقب نثار کی قیادت میں ایسے فیصلے کیے گئے جس نے ملک کو آج یہاں تک پہنچا دیا، دھرنے کا اعلان ہوتا تھا پھر فیصلے ہوتے تھے جن کی بنیاد پر بانی پی ٹی آئی کو مسلط کیا گیا، پاکستان کی صرف معیشت نہیں بلکہ استحکام کی بنیادیں ہلا دی گئیں، معیشت کو جان بوجھ کر کمزور اور دوست ممالک کو ناراض کیا گیا۔

ان کا کہنا تھا کہ بہت سے لوگ جو شامل تھے ان کا بھی بے رحم احتساب ہونا چاہیے، سیاسی جماعتوں کو بھی مہروں کے خلاف کارروائی کرنا پڑیں گی، پاکستان میں احتساب 75 سال بعد شروع ہوا ہے، الٹی گنگا دست سمت پر آگئی ہے تو سب اداروں کو احتساب کرنا ہوگا، پاکستان میں امید اور خوشحالی واپس آئے گی لیکن اس کیلیے بے رحم احتساب ہونا چاہیے۔

طلال چوہدری نے کہا کہ رؤف حسن، فیض حمید یا ثاقب نثار کی اہمیت پاکستان سے زیادہ نہیں، حکومت ہر صورت یہ ممکن بنائے گی کہ احتساب ہو کر رہے، سیاسی جماعتوں کو بھی اپنی صفوں میں سے صفائی کرنا ہوگی۔

(ن) لیگی رہنما نے کہا کہ افراتفری اور انتشار کی سیاست میں یہ کارروائیاں کوئی ایک آدمی نہیں کر سکتا، اس کارروائیوں میں اداروں کے سربراہ بالخصوص ثاقب نثار بھی شامل تھے، پہلے بات کرتے تھے تو کہتے تھے فیض جی اور اب کہتے ہیں میں کبھی ان سے ملا ہی نہیں۔

پی ٹی آئی ترجمان کے بارے میں طلال چوہدری نے کہا کہ رؤف حسن بیرونی ملک اینٹی پاکستان صحافیوں سے رابطے میں تھا، وہ اکیلا آدمی نہیں تھا بلکہ یہ پورا ایک پلان تھا، رؤف حسن اینٹی پاکستان صحافیوں کو مواد فراہم کر رہا تھا، ان سے تفتیش اور فیض حمید کی حراست کے بعد تحقیقاتی دائرہ وسیع ہوا، ان کے تانے بانے بانی پی ٹی آئی سے ملتے ہیں یہ ایک منظم پلان تھا۔