روئے زمین پر چرند پرند، حشرات، نباتات اور انواع و اقسام کے ایسے جان دار بھی موجود ہیں جنھیں ہم عام آنکھ سے دیکھ نہیں سکتے۔ سبزہ و گُل کی بات کی جائے تو پھل دار اور پھول دار پیڑ اور پودے قدرت کی صناعی کا شاہکار ہیں۔
پھولوں کی لاتعداد اقسام میں بعض بہت خوش نما، خوش بُو دار اور کچھ عجیب و غریب شکل کے ایسے پھول بھی ہیں جن کو دیکھ کر ہمارے ذہن میں کسی دوسرے جان دار کی شبیہ ابھرتی ہے۔ ان پھولوں کے نام بھی اسی مشابہت کی بنیاد پر رکھے گئے ہیں۔
Bird of Paradise
یہ پھول ساؤتھ افریقہ میں پایا جاتا ہے۔ اسے دیکھ کر شاید آپ بھی یہ تصوّر کریں کہ کوئی خوب صورت پرندہ اڑان بھر رہا ہے۔
Bleeding Heart Flower
انسانی دل بلکہ ایک زخمی دل سے مشابہ یہ پھول ٹھنڈے اور نمی والے علاقوں میں کِھلتا ہے۔
Hooker’s Lip Flower
ہونٹوں سے مشابہت کی بنیاد پر اس پھول کو یہ نام دیا گیا ہے جب کہ اس کی سرخ رنگت کی وجہ سے اسے عورت سے منسوب کیا جاتا ہے۔ یہ پھول میکسیکو، پوریتو ریکو، پانامہ کے ٹروپیکل جنگلات میں پایا جاتا ہے۔
Ghost Flower
یہ عجیب و غریب پھول ہے جسے اگر شام ڈھلے یا کسی ویران مقام پر دور سے دیکھا جائے تو شاید آپ کے ذہن میں کسی ننھے کفن پوش یا بد روح کا تصوّر ابھرے۔ یہ پھول صرف کیوبا اور جنوبی فلوریڈا میں پایا جاتا ہے جہاں کی آب و ہوا اس کے لیے سازگار ہے۔
Bee Orchid Flower
اس پودے کی پتیوں کے درمیان آپ ایک موٹی سی مکھی نما پھول دیکھ سکتے ہیں۔ یہ پھول یورپ، مشرقِ وسطیٰ اور شمالی افریقہ میں پایا جاتا ہے۔
Beehive Ginger Flower
شہد کے چھتے کی طرح نظر آنے والا یہ پھول چین اور بھارت میں پایا جاتا ہے۔ اس میں بہت سا پانی جمع ہوجاتا ہے اور ادرک کی خوشبو آتی ہے۔
Flying Duck Flower
اس کا پودا آسٹریلیا کے جنگلات میں اگتا ہے جس کا چھوٹا سا پھول ایک بطخ کے مشابہ نظر آتا ہے۔
(تدوین و ترجمہ از عظیم لطیف)