شائقین کرکٹ کی انتظار کی گھڑیاں ختم ہوگئیں، لاہور کے قذافی اسٹیڈیم میں پاکستان سپر لیگ کا میلہ آج سجنے کے لیے تیار ہے۔
دنیا بھر کی بہترین لیگ میں سے ایک ایچ بی ایل پاکستان سپر لیگ(پی ایس ایل) سیزن 9 کا پہلا میچ لاہور میں کھیلا جائے گا، افتتاحی میچ قذافی اسٹیڈیم میں 2 بار کی چیمپئن اسلام آباد یونائیٹڈ اور میزبان دفاعی چیمپئین لاہور قلندرز کے مابین کھیلا جائے گا۔
اس سال اس بڑی لیگ میں چھے ٹیمیں مد مقابل آئیں گے جن کے درمیان ایک چمچماتی ٹرافی کے لیے چار میدانوں میں 34 مقابلے ہوں گے۔
میچ سے قبل قذافی اسٹیڈیم لاہور میں رنگا رنگ افتتاحی تقریب بھی ہوگی جس میں عالمی شہرت یافتہ گلوکار علی ظفر، آئمہ بیگ، عارف لوہار اور نوری اپنے سر بکھیریں گے۔ افتتاحی تقریب میں آتش باری اور لیزر شو کا مظاہرہ بھی کیا جائے گا۔
اس کے بعد لاہور قلندرز اور اسلام آباد یونائیٹڈ کی ٹیمیں ایونٹ کے پہلے میچ میں مدمقابل ہوں گی، دونوں ٹیموں کے اسکواڈز میں شامل غیر ملکی کھلاڑیوں نے اپنی اپنی ٹیموں کو جوائن کرلیا ہے۔
پاکستان کرکٹ بورڈ کی جانب سے پی ایس ایل سیزن 9 کا اینتھم گزشتہ دنوں جاری کیا گیا تھا جس میں معروف گلوکار علی ظفر اور آئمہ بیگ نے گلوکاری کے جوہر دکھائے ہیں۔
پی ایس ایل شیڈول کے مطابق پی ایس ایل کا یہ سیزن 17 مارچ تک جاری رہے گا پہلے مرحلے میں میچ لاہور اور ملتان میں کھیلے جائیں گے جبکہ دوسرے مرحلے کے میچز کراچی اور راولپنڈی میں ہوں گے۔
میچ پاکستانی وقت کے مطابق رات 8 بجے شروع ہوگا۔
