کراچی : پی ڈی ایم کے سربراہ مولانا فضل الرحمان نے سوئیڈن میں قرآن پاک کی بےحرمتی کیخلاف احتجاج کی کال دیتے ہوئے اپیل کی پوری قوم سڑکوں پر آکر سوئیڈن کیخلاف احتجاجی مظاہرے کرے۔
تفصیلات کے مطابق پی ڈی ایم کے سربراہ مولانا فضل الرحمان نے سوئیڈن میں قرآن پاک کی بےحرمتی کیخلاف احتجاج کی کال دے دی۔
مولانافضل الرحمان نے کہا کہ اتوار کو ملک بھر میں سویڈن کے روئیے کیخلاف احتجاجی مظاہرے ہوں گے، 23 جولائی کو کراچی میں سب بڑا احتجاجی مظاہرہ ہوگا اور سوئیڈن کیخلاف کراچی کے مظاہرے میں بذات خود شریک ہوں گا۔
ان کا کہنا تھا کہ سوئیڈن میں مسلسل قرآن کی بےحرمتی کی جارہی ہے، اس عمل سے امت مسلمہ کے ہر فرد کے دل کو دکھ پہنچ رہا ہے۔
سربراہ پی ڈی ایم نے کہا کہ یہ قرآن کریم سے امت مسلمہ کے تعلق کی فطری علامت ہے ، امت مسلمہ تورات، انجیل سمیت تمام آسمانی کتابوں کا احترام کرتی ہے لیکن مغربی دنیا تنگ نظری کا مظاہرہ کیوں کررہی ہے۔
مولانافضل الرحمان کا کہنا تھا کہ ہم نے ایسی اظہار رائے کو مسترد کرکے قوم سے احتجاج کی اپیل کی ، پوری قوم سڑکوں پر آکر سوئیڈن کیخلاف احتجاجی مظاہرے کرے۔
