اسلام آباد: وزیر داخلہ کے احکامات کے بعد ایف آئی اے نےملک بھرمیں غیرقانونی سمز اور گیٹ ویز کے خلاف کریک ڈاوٴن شروع کردیا۔
ترجمان وزارت داخلہ کےمطابق پہلے مرحلے میں ملک بھر سے چونتیس افراد کو گرفتارکیاگیاہے، ملزمان کےقبضے سے چھ ہزار چار سو سات سمز اور ایک سو آٹھ گیٹ ویز برآمد ہوئے ہیں۔ترجمان کاکہناہے ملزمان گرے ٹریفکنگ کے دھندے سے قومی خزانے کو کروڑوں روپے کا ماہانہ نقصان پہنچا رہے تھے۔
کراچی: پی ٹی اے نے تین ماہ سے غیر استعمال شدہ سمز بند کرنے کا فیصلہ کرلیا ہے۔
ٹیلی کام ذرائع کے مطابق دہشت گردی میں سموں کے استعمال کے باعث تمام تر سموں کی بائیو میٹرک تصدیق کے حوالے سے پی ٹی اے اور ٹیلی کام کمپنیوں کے درمیان بات چیت جاری ہے۔
ذرائع کے مطابق ابتدائی طور پر ایسی سمیں جنھیں گزشتہ تین ماہ سے کسی بھی صارف نے استعمال نہیں کیا انھیں بند کر دیا جائے گا اور بائیو میٹرک تصدیق کے بعد دوبارہ سمز جاری کی جائیں گی،اس کے علاوہ ایسی سمز جو صارفین کے زیر استعمال ہیں انھیں بھی بائیو میٹرک تصدیق کے مرحلے سے گزارنے کی حکمت عملی تیار کی جارہی ہے۔
اسلام آباد: قومی اسمبلی کے اجلاس میں آئین وقانون کی بالادستی کیلئے قرارداد متفقہ طور پر منظور کر لی گئی۔
قومی اسمبلی کا اجلاس اسپیکر سردار ایاز صادق کی زیر صدارت ہوا، کارروائی کے دوران ارکان اسمبلی نے ملک کی موجودہ صورتحال پر تبادلہ خیال کیا۔
پختونخوا ملی عوامی پارٹی کے سربراہ محمود خان اچکزئی کی جانب سے یہ قرار داد ایوان میں پیش کی گئی۔
قرار داد میں آئین اور جمہوریت کی بقاء کے عزم کے ساتھ ساتھ بعض سیاسی قائدین کیلئے توہین آمیز الفاظ استعمال کیے جانے کی مذمت کی گئی ہے۔
قرارداد میں یہ بھی کہا گیا ہے کہ آئین اور پارلیمنٹ کی بالادستی کو ہر صورت برقرار رکھا جائے گا۔
وزیراعظم نوازشریف نےایوان سے خطاب مؤخرکردیا،اجلاس کل صبح گیارہ بجے تک ملتوی کردیا، اجلاس میں اراکین نے تقاریر کے دوران قانون کی بالادستی پر زور دیا۔
واضح رہے کہ اس سے قبل 13 اگست کو بھی قومی اسمبلی نے ملک میں جمہوریت کے حق میں قرارداد متفقہ طور پر منظور کی تھی۔
