کسی انسان کی شناخت اس کے شناختی کارڈ سے ہوتی ہے مگر اس بار عیدالاضحیٰ پر مویشی منڈی میں قربانی کے جانوروں کے شناختی کارڈ بن رہے ہیں۔
جی ہاں یہ کوئی مذاق نہیں بلکہ حقیقت ہے۔ کراچی میں اس سال عیدالاضحیٰ کے موقع پر مویشی منڈیوں میں فروخت کے لیے لائے جانے والے قربانی کے جانوروں گائے، بیل کے شناختی کارڈ بنائے جا رہے ہیں۔
ہر سال مویشی منڈیوں میں دھوکا دہی کے واقعات سامنے آتے ہیں جس میں بیوپاری جھوٹے دعوے کر کے اپنے جانور سادہ لوح افراد کو فروخت کرتے ہیں لیکن اب ایسا ممکن نہیں رہے گا۔
کیونکہ کراچی کے چند ہونہار نوجوانوں نے جانوروں کے لیے ایک ایسی منفرد ڈیجیٹل ایپ متعارف کروائی ہے۔ جس میں جانور کی تصویر کھینچ کر اس کی صحت اور عمر کے بارے میں معلومات حاصل کرسکتے ہیں۔
صرف ایک کلک پر جانیے کہ جو جانور آپ خریدنا چاہتے یہں اس کی عمر اور صحت کیسی ہے۔
یہ منفرد ایپ بنانے والے طالبعلم کہتے ہیں کہ اب کوئی بھی خریدار گائے یا بیل کے دانتوں کی تصویر اسکین کرکے تسلی کر سکتا ہے کہ وہ جانور صحت مند ہے یا نہیں۔
کراچی کے نوجوانوں کی یہ کوشش نہ صرف قربانی کے جانوروں کی خرید و فروخت کو شفاف بنانے کی جانب ایک بڑا قدم ہے بلکہ پاکستان میں لائیو اسٹاک ڈیجیٹلائزیشن میں ایک نئی راہ بھی ہموار کروا رہے ہیں۔
