ARYNews.tv | Urdu – Har Lamha Bakhabar

Tag: قربانی کے جانور

  • قربانی کے جانوروں کی آلائشیں ٹھکانے لگانے کے لیے کراچی میں 7 خندقیں تیار

    قربانی کے جانوروں کی آلائشیں ٹھکانے لگانے کے لیے کراچی میں 7 خندقیں تیار

    عیدالاضحیٰ کے موقع پر قربانی کے جانوروں کی آلائشیں بروقت ٹھکانے لگانے اور شہر کا ماحول بہتر رکھنے کےلیے کراچی میں 7 خندقیں تیار کر لی گئیں۔

    پاکستان میں ہفتہ 7 جون کو مذہبی جوش وجذبے کے ساتھ عیدالاضحیٰ منائی جائے گی۔ عید کے تین ایام مسلمان سنت ابراہیمی کی پیروی کرتے ہوئے اللہ کی راہ میں جانوروں کی قربانی پیش کریں گے۔

    ان ایام میں سب سے زیادہ مسئلہ قربانی کے جانوروں کی آلائشوں کی وجہ سے ہوتا ہے جو بروقت تلف نہ کیے جانے کے باعث شہر میں تعفن کا باعث بنتی ہیں۔ تاہم اس سال سندھ سالڈ ویسٹ منیجمنٹ بورڈ نے عیدالاضحیٰ پر جانوروںکی آلائشیں بروقت اٹھانے اور تلف کرنے کے منصوبے کو عملی شکل دے دی ہے۔

    ایم ڈی سندھ سالڈ ویسٹ منیجمنٹ بورڈ طارق علی نظامانی کے مطابق قربانی کے جانوروں کی آلائشیں بروقت تلف کرنے کے لیے شرافی گوٹھ میں 7 خندقیں کھود لی گئی ہیں۔ آلائشوں کو ان خندقوں میں دفن کیا جائے گا۔

    طارق نظامانی کا کہنا تھا کہ شہر بھر میں آلائشیں اٹھانے کے لیے ڈور ٹو ڈور ٹیمیں کام کریں گی اور 16 ہزار ملازمین فرائض انجام دیں گے۔

    انہوں نے بتایا کہ عیدالاضحیٰ کے موقع پر 98 کلیکشن پوائنٹس بھی بنائے گئے ہیں جب کہ عوامی شکایات کے لیے 1128 نمبر بھی چوبیس گھنٹے فعال رہے گا۔

    https://urdu.arynews.tv/eid-ul-adha-jf-17-thunder-meraj-f-16-names-of-cattles/

  • قیامت خیز گرمی، قربانی کے جانوروں کو کیسے بچایا جائے؟ مفید مشورے

    قیامت خیز گرمی، قربانی کے جانوروں کو کیسے بچایا جائے؟ مفید مشورے

    ملک میں پڑنے والی قیامت خیز گرمی سے انسان تو نڈھال ہیں جانور بھی متاثر ہو رہے ہیں قربانی کے جانوروں کو ہیٹ اسٹروک سے بچانا ضروری ہے۔

    پاکستان کے طول وعرض میں اس وقت قیامت خیز گرمی پڑ رہی ہے۔ شدید گرمی کی لہر نے جہاں انسانوں کو نڈھال کر رکھا ہے، وہیں جانور بھی اس سے بری طرح متاثر ہو رہے ہیں۔

     عیدالاضحیٰ کی آمد میں اب صرف چند دن باقی رہ گئے ہیں۔ اس لیے سنت ابراہیمی کی تقلید میں اللہ کی راہ میں قربانی کے لیے مویشیوں کی خرید وفروخت میں بھی تیزی آ گئی ہے۔

    تاہم صرف مویشی کے خریداروں ہی نہیں بلکہ بیوپاریوں کا بھی سب سے بڑا مسئلہ اس وقت پڑنے والی شدید گرمی ہے کیونکہ مناسب دیکھبھال اور حفاظتی انتظامات نہ ہونے کی وجہ سے جانور بیمار پڑنے لگے ہیں۔

    اس وقت ملک کے کئی حصوں میں درجہ حرارت 40 سے تجاوز کر چکا ہے اور بعض علاقے میں تو پارے نے 50 کے ہندسے کو بھی چھو لیا ہے۔ اس کے باعث صرف انسان ہی نہیں بلکہ جانور بھی ہیٹ اسٹروک اور دیگر بیماریوں کا شکار ہو رہے ہیں اور کئی علاقوں میں شدید گرمی میں قربانی کے جانوروں کے مرنے کی اطلاعات بھی سامنے آئی ہیں۔

    گرمی تو ہے لیکن صاحب حیثیت لوگوں کے لیے عیدالاضحیٰ پر قربانی بھی واجب ہے۔ اس صورتحال میں ویٹرنری ڈاکٹرز نے کچھ مشورے دیے ہیں۔

    ویٹرنری ڈاکٹروں کا کہنا ہے کہ جانوروں کی بڑی تعداد ہیٹ اسٹروک کا شکار ہو رہی ہے۔ اس کے لیے بیوپاریوں کے ساتھ وہ لوگ جو جانور خرید کر لے جا رہے ہیں۔ انہیں گرمی سے بچانے کے لیے خصوصی اقدامات کریں۔

    ان کا کہنا تھا کہ جانوروں کو اس شدید گرمی میں دھوپ سے بچانا ضروری ہے۔ اس لیے اس کو کھلے آسمان تلے باندھنے کے بجائے سایہ دار جگہوں پر رکھا جائے۔ پانی کا ہر وقت بندوبست رکھا جائے اور ممکن ہو تو ان کو نہلایا بھی جائے۔

  • کراچی میں کہاں کہاں سے مویشی منڈیاں ختم کر دی گئیں؟

    کراچی میں کہاں کہاں سے مویشی منڈیاں ختم کر دی گئیں؟

    کراچی: شہر قائد میں کئی مقامات پر سے غیر قانونی طور پر قائم ہونے والی مویشی منڈیاں ختم کر دی گئیں۔

    تفصیلات کے مطابق کراچی میں جا بہ جا مختلف جگہوں پر غیر قانونی مویشی منڈیوں کے قیام پر ڈپٹی کمشنر ضلع وسطی نے نوٹس لے کر ان منڈیوں کے خلاف کریک ڈاؤن کیا ہے۔

    ضلع وسطی میں پیالہ ہوٹل، سیون ڈی اسٹاپ پر مویشی منڈیاں ختم کر دی گئیں، پیپلز چورنگی، نارتھ ناظم آباد بلاک کے، بلاک آئی اور شپ اونر چورنگی سے بھی غیر قانونی مویشی منڈی کا خاتمہ کر دیا گیا ہے۔

    ڈپٹی کمشنر وسطی طحہ سلیم کے مطابق کمشنر کراچی نے شہر میں غیر قانونی منڈیوں کے خلاف دفعہ 144 لگا رکھی ہے، عوام کی جانب سے شکایات موصول ہوئی تھیں جن پر ان غیر قانونی موبائل مویشی منڈیوں کے خلاف کارروائی کی گئی۔

    ‘دبنگ’ نامی 35 من وزنی بچھڑے کی دھوم مچ گئی، ویڈیو ملاحظہ کریں

    ان کا کہنا تھا کہ دفعہ 144 کے تحت پولیس کے اختیارات ہیں کہ وہ ان کے خلاف فوری کارروائی کریں، انتظامیہ کی جانب سے صرف 14 آفیشل مقامات پر مویشی منڈی لگانے کی اجازت ہے۔

    واضح رہے کہ نادرن بائی پاس پر واقع ایشیا کی سب سے بڑی مویشی منڈی میں ملک کے طول و عرض سے اعلیٰ نسل کے قربانی کے جانور لائے گئے ہیں، جہاں قربانی کے جانوروں کی قیمتیں اس وقت بلند ترین سطح پر ہیں، بیوپاری کہتے ہیں کہ اس منڈی کی خاصیت یہ ہے کہ یہاں 10 لاکھ سے لے کر 40 لاکھ تک کا جانورو بھی فروخت ہو جاتا ہے۔

    ایشیا کی سب سے بڑی مویشی منڈی 12 سو ایکڑ پر محیط ہے جہاں اب تک 3 لاکھ سے زائد جانور لائے جا چکے ہیں اور فروخت کیے جانے والے قربانی کے جانوروں کی تعداد 1 لاکھ سے زائد ہے۔ ملتان، ساہیوال، گجرات سمیت اندرون سندھ اور بلوچستان کے بیوپاری بھی کراچی کی مویشی منڈی کو ترجیح دیتے ہیں۔

  • قربانی کے جانور کو ہیٹ ویو سے کیسے بچائیں؟

    قربانی کے جانور کو ہیٹ ویو سے کیسے بچائیں؟

    ذوالحج کا چاند نظر آتے ہی لوگوں کی بڑی تعداد قربانی کے جانور خریدنے کیلئے مویشی منڈی کا رخ کرتی ہے تاکہ عید کے روز سنت ابراھیمی ادا کرکے اپنے رب کے حکم کی پیروی کریں۔

    ہر سال قربانی کے جانوروں کے بھاگنے یا ان کے شدید بیمار ہونے کی اطلاعات اور مشاہدات ہوتے ہی رہتے ہیں اور ساتھ ہی لوگوں کو ناتجربہ کاری کے باعث جانور کی طبی حالت اس کی تکلیف اور پریشانی کا علم نہیں ہوپاتا۔

    اب جانور تو خرید لیا لیکن اس کے کھانے پینے اور سردی گرمی کا خیال کیسے رکھنا ہے اس حوالے سے اے آر وائی نیوز کے پروگرام باخبر سویرا میں جانوروں کے امراض کے ماہر ڈاکٹر نصیب اللہ ملک نے ناظرین کو تفصیلی طور پر آگاہ کیا۔

    انہوں نے بتایا کہ جب جانور کو منڈی سے گھر لایا جاتا ہے تو ماحول کی تبدیلی کی وجہ سے وہ گھبرایا ہوا ہوتا ہے، اور بچوں کے شور کرنے کے سبب بھی وہ مزید اسٹریس کا شکار ہوجاتا ہے۔

    انہوں نے بتایا کہ کبھی بھی کسی بھی صورت میں جانور کو فوراً نہیں نہلانا چاہیے، کیونکہ اس وقت اس کا باڈی ٹمپریچر بڑھا ہوا ہوتا ہے جو بڑی مشکل پیدا کرسکتا ہے۔

    ایک بات کا اور خیال رکھیں کہ اس کے سامنے بہت سارا کھانا مت رکھیں صرف دن بھرمیں صبح شام دو ٹائم چارہ کھلائیں اور پانی بھی اسی طرح پلائیں۔

    جانور کو ہیٹ اسٹروک سے بچانے کیلیے سب سے پہلے اسے او آر ایس یا گلوکوز دینا لازمی ہوتا ہے، اور اس کا جسمانی درجہ حرارت نارمل کرکے پھر دوا دی جاتی ہے کیونکہ وہ ڈہ ہائیڈریشن کا شکار ہوتا ہے اس لیے اسے ری ہائیڈریٹ کرنے کے بعد اس کی فزیو تھراپی بھی کرنا ہوتی ہے۔

  • کراچی کے شہری ہوشیار : قربانی کے جانور چھین اور چوری کرلیے گئے

    کراچی کے شہری ہوشیار : قربانی کے جانور چھین اور چوری کرلیے گئے

    کراچی : عید الاضحیٰ کے قریب آتے ہی قربانی کے جانور چوری کرنےکی وارداتیں بڑھنے لگی، تازہ واقعے میں اتحاد ٹاؤن میں ڈاکو قربانی کے 7 جانور چھین کر فرار ہوگئے۔

    اے آر وائی نیوز کی رپورٹ کے مطابق کراچی کے علاقے راجہ تنویر کالونی میں 9 مسلح ملزمان نے باڑے میں لوٹ مار کی، 7قربانی کے جانور لوٹنے کے واقعے کا مقدمہ اقبال مارکیٹ تھانے میں درج کرلیا گیا۔

    واردات کے دوران ڈاکوؤں نے اسلحے کے زور پر باڑے میں موجود افراد کو یرغمال بنایا، ملزمان 20 لاکھ روپے سے زائد مالیت کے جانور ٹرک میں ڈال کر فرار ہوگئے۔

    پولیس کے مطابق مسلح ڈاکوؤں نے اپنے چہرے ہیلمٹ پہن کر چھپائے ہوئے تھے۔متاثرین نے بیان دیا ہے کہ 4جانور باڑے کے اور 3 مقامی افراد کے تھے۔

    پولیس حکام کا کہنا ہے کہ سی سی ٹی وی فوٹیجز کی مدد سے ملزمان کو تلاش کیا جارہا ہے، جنہیں بہت جلد گرفتار کرلیا جائے گا۔

    ایک اور واردات میں شاہ فیصل کالونی نمبر ایک میں گھر کے باہر کھڑا بکرا چوری ہوگیا، بکرے چوری کی واردات کی سی سی ٹی وی فوٹیج سامنے آگئی۔

    فوٹیج میں دیکھا جاسکتا ہے کہ 2افراد موٹرسائیکل پر آئے بکرا اپنے ساتھ لے کر چلے گئے، سی سی ٹی وی فوٹیجز میں بکرا چوروں کے چہرے واضح طور پر نظر آرہے ہیں۔

    متاثرہ شہری کی درخواست پر پولیس نے مقدمہ درج کرکے قانونی کارروائی کا آغاز کر دیا ہے۔ شہریوں نے متعلقہ حکام سے اپیل کی ہے کہ عید کے پیش نظر سیکیورٹی بڑھائی جائے تاکہ جانوروں کی چوری کی وارداتوں پر قابو پایا جا سکے۔

  • ڈاکوؤں کے گروہ نے شہریوں کو یرغمال بنا کر قربانی کے جانور لوٹ لیے، موٹر سائیکل اسکواڈ کو پہنچنے میں تاخیر

    ڈاکوؤں کے گروہ نے شہریوں کو یرغمال بنا کر قربانی کے جانور لوٹ لیے، موٹر سائیکل اسکواڈ کو پہنچنے میں تاخیر

    کراچی: شہر قائد کے علاقے سرجانی ٹاؤن سیکٹر 15 میں ڈاکوؤں کے ایک گروہ نے شہریوں کو یرغمال بنا کر قربانی کے جانور لوٹ لیے۔

    سرجانی ٹاؤن پولیس کے مطابق سیکٹر پندرہ میں 6 سے 8 رکنی گینگ نے واردات کی، ڈاکوؤں نے پک اپ اور موٹر سواروں کو ویران علاقے میں لے جا کر یرغمال بنایا۔

    ڈاکوؤں نے 2 شہریوں کو باندھ کر قربانی کے جانور خالی پک اپ پر منتقل کیے، ڈاکوؤں نے ایک پک اپ اور موٹر سائیکل کو بھی روکا، پک اپ پر 3 گائیں لدی ہوئی تھیں، تاہم پولیس کو دیکھ کر ڈاکو 2 گائیں چھوڑ کر موٹر سائیکلوں پر فرار ہو گئے۔

    پولیس حکام کے مطابق موٹر سائیکل اسکواڈ نے کارروائی کر کے ایک گائے اور سوزوکی پک اپ کو لٹنے سے بچا لیا، موٹر سائیکل اسکواڈ نے بتایا کہ اندھیرے کے باعث کارروائی میں معمولی تاخیر ہوئی، تاہم علاقے میں گشت بڑھا دیا گیا ہے۔

    کراچی : کیٹل فارم میں ڈکیتی کی بڑی واردات، ڈاکو لاکھوں مالیت کے مویشی لوٹ کر فرار

    واضح رہے کہ عید الاضحیٰ آتے ہی کراچی سمیت سندھ کے شہروں میں ڈاکوؤں کا رخ قربانی کے جانور لوٹنے کی وارداتوں کی جانب ہو جاتا ہے، چار دن قبل بھی کراچی میں ایک کیٹل فارم میں ڈکیتی کی بڑی واردات میں 10 سے زائد ڈاکو باڑے سے لاکھوں مالیت کے مویشی لوٹ کر فرار ہو گئے تھے۔

    یہ واردات کاٹھوڑ کے قریب واقع کیٹل فارم پر کی گئی تھی، ڈاکوؤں نے 13 بیل اور بچھیا لوٹ لیے تھے، کیٹل فارم انتظامیہ نے بتایا کہ رات 2 سے 4 کے درمیان 10 سے زائد ڈاکوؤں نے واردات کی، ڈاکوؤں کا گروہ ٹرک بھی ساتھ لایا تھا، چھینے گئے مویشی کی مالیت 30 سے 40 لاکھ روپے کے لگ بھگ ہے‌۔

  • ’قربانی کے جانور حاضر ہوں‘ حفیظ کا پیغام وائرل

    ’قربانی کے جانور حاضر ہوں‘ حفیظ کا پیغام وائرل

    پاکستان کرکٹ ٹیم کے سابق کپتان محمد حفیظ نے انوکھے انداز میں پاکستانی ٹیم کے کھلاڑیوں کے لئے سوشل میڈیا پر پیغام جاری کیا ہے۔

    سابق کپتان محمد حفیظ نے ٹی ٹوئنٹی ورلڈ کپ سے باہر ہونے والی پاکستان کرکٹ ٹیم کے لیے بظاہر ایک اشارے والی ٹوئٹ کی ہے، جس نے کرکٹ شائقین کو سوچنے پر مجبور کردیا ہے۔

    سابق کپتان کا اپنی ٹوئنٹ میں کہنا تھا کہ ”قربانی کے جانور حاضر ہوں“۔

    محمد حفیظ نے اپنی ٹوئٹ میں پاکستان کرکٹ کا ہیش ٹیگ بھی استعمال کیا، مگر نہیں بتایا کہ ان کا اشارہ کس کی طرف ہے۔

    اس سے قبل قومی ٹیم کے سابق بلے باز عمران نذیر نے قومی ٹیم پر تنقید کرتے ہوئے کہا تھا کہ ہمیں جتنی کرکٹ آتی تھی اتنی ہی کھیلی ہے، امریکا ٹیم سپر ایٹ میں جا رہی ہے تو وہ اس کی حق دار تھی۔

    ’بابر اعظم نے شب خون مار کر ٹیم کی کپتانی حاصل کی تھی‘

    نجی ٹی وی کے پروگرام میں بات کرتے ہوئے سابق بلے باز عمران نذیر نے کہا کہ پاکستان ٹیم جتنی دباؤ میں کرکٹ کھیلی وہ سپر 8 میں جانے کی حق دار نہیں تھی، پاکستان ٹیم نے سارے میچز پریشر میں کھیلے۔

  • کراچی میں ملزمان 8 لاکھ روپے مالیت کے قربانی کے جانور چوری کرکے فرار

    کراچی میں ملزمان 8 لاکھ روپے مالیت کے قربانی کے جانور چوری کرکے فرار

    کراچی : شہر قائد ملزمان 8 لاکھ روپے مالیت کے قربانی کے جانور چوری کرکے فرار ہوگئے ، درخواست گزار محمد کامران نے تھانے میں درخواست جمع کرادی۔

    تفصیلات کے مطابق کراچی میں عید قرباں کے آتے ہی قربانی کے جانوروں کی چوری شروع ہوگئی . 8 لاکھ روپے مالیت کے قربانی کے جانور ملزمان چوری کرکے فرار ہوگئے۔

    درخواست گزار محمد کامران نے تھانہ اورنگی میں درخواست جمع کرادی، جس میں بتایا کراچی کے علاقے اورنگی ٹاؤن میں ملزمان دکان کے اندر 8 جانور بندھے ہوئے تھے اور باہر سے تالا لگا ہوا تھا۔

    درخواست گزار کا کہنا تھا کہ نامعلوم ملزمان تالا توڑ کر 5 جانور چوری کرکے لے گئے جانوروں کی قیمت آٹھ لاکھ روپے ہے تاہم پولیس کی جانب سے واقعے کی تحقیقات شروع کردی گئی ہیں۔

  • آوارہ کتوں نے قربانی کے بکرے پر حملہ کر دیا، بکرا شدید زخمی (ویڈیو)

    آوارہ کتوں نے قربانی کے بکرے پر حملہ کر دیا، بکرا شدید زخمی (ویڈیو)

    کراچی: شہر قائد کے ایک علاقے میں آوارہ کتوں نے قربانی کے بکرے پر حملہ کر دیا، جس سے بکرا شدید زخمی ہو گیا ہے۔

    اے آر وائی نیوز کے مطابق کراچی کے علاقے عزیز آباد ایف بھی ایریا میں آوارہ کتوں نے قربانی کے جانوروں کو کاٹنا شروع کر دیا ہے، گزشتہ روز 4 آوارہ کتوں نے گھر کے باہر بندھے بکرے کو کاٹ کر شدید زخمی کیا۔

    واقعے کی سی سی ٹی فوٹیج اے آر وائی نیوز پر بھی چلائی گئی، بکرا ایک بیل کے ساتھ بندھا ہوا تھا کہ رات کے وقت اچانک چار کتوں نے اس پر حملہ کر دیا، بکرے نے کچھ دیر تک کتوں کے آگے مزاحمت کی، اس دوران بیل بھی خود کو بچاتا رہا، تاہم کچھ دیر بعد آوارہ کتے بکرے کو کاٹنے میں کامیاب ہو گئے۔

    کتوں کے کاٹنے سے بکری کی گردن اور پچھلی ٹانگیں شدید زخمی ہو گئی تھیں، جس کے باعث مالک نے بکرے کو ذبح کر دیا۔

    سی سی ٹی وی فوٹیج میں دیکھا جا سکتا ہے کہ بکرا کچھ دیر تک آوارہ کتوں کا مقابلہ کرتا رہا لیکن پھر چار کتوں کے آگے بے بس ہو گیا، سندھ کے دیگر شہروں کی طرح کراچی میں بھی آوارہ کتوں کا مسئلہ کچھ عرصے سے سنگین صورت اختیار کر چکا ہے، آئے دن لوگ کتوں کے کاٹے کا شکار ہو رہے ہیں۔

    تاہم قربانی کے جانور پہلی بار آوارہ کتوں کے اس طرح نشانہ بنے ہیں، جس نے قربانی کرنے والوں کو تشویش میں مبتلا کر دیا ہے۔

  • قربانی کے جانور افغانستان غیر قانونی طریقے سے لے جانے پر پابندی عائد

    قربانی کے جانور افغانستان غیر قانونی طریقے سے لے جانے پر پابندی عائد

    پشاور : پشاور ہائی کورٹ نے قربانی کے جانور افغانستان غیر قانونی طریقے سے لے جانے پر پابندی عائد کردی اور صوبائی و وفاقی حکومت سمیت پولیس کو نوٹس جاری کردیا۔

    تفصیلات کے مطابق پشاور ہائی کورٹ میں قربانی کے جانور کے غیر قانونی ایکسپور سے متعلق کیس کی سماعت ہوئی ، سماعت جسٹس ابراہیم اور جسٹس عبدالشکور نے کی۔

    ایڈیشنل ایڈووکیٹ جنرل سکندر شاہ بھی عدالت میں پیش ہوئے ، دوران سماعت وکیل یاسرخٹک نے عدالت کو بتایا کہ مویشیوں کی مصنوعی مہنگائی پیدا کی جارہی ہے اور بڑے جانور افغانستان لے جائے جارہے ہیں تاکہ لوگ قربانی نہیں کرسکیں۔

    اس موقع پر جسٹس ابراہیم نے ریمارکس دئیے کہ جس طرح کے حالات ہیں عید پر بڑے مرغ حلال کریں۔

    پٹیشنر نے کیس میں پرنٹ کے ذریعے جانوروں کے افغانستان لے جانے پر پابندی لگانے کی استدعا کی، دلائل سننے کے بعد عدالت نے جانوروں کے افغانستان  غیر  قانونی کاروبار پر مکمل پابندی عائد کرتے ہوئے صوبائی و وفاقی حکومت سمیت پولیس کو نوٹس جاری کردیا۔

    درخواست گزار اشفاق خلیل نے عید الضحی پر قربانی کے جانور کے غیر قانونی ایکسپورٹ کیخلاف عدالت سے رجوع کیا تھا۔