ARYNews.tv | Urdu – Har Lamha Bakhabar

Tag: قرنطینہ

  • پاکستانی کرکٹ ٹیم نے نیوزی لینڈ میں قرنطینہ کے دوران کیسے وقت گزارا؟

    پاکستانی کرکٹ ٹیم نے نیوزی لینڈ میں قرنطینہ کے دوران کیسے وقت گزارا؟

    ویلنگٹن: پاکستانی کرکٹ ٹیم کے کھلاڑی حیدر علی کا کہنا ہے کہ آئیسولیشن کا وقت خاصا مشکل تھا، ہم کمروں میں ہی ہلکی پھلکی ٹریننگ کرتے رہے، شکر ہے مشکل وقت گزر گیا۔

    تفصیلات کے مطابق پاکستان ٹی 20 اسکواڈ میں شامل نوجوان بیٹسمین حیدر علی کا کہنا ہے کہ نیوزی لینڈ کے خلاف سیریز کی تیاری کا موقع کرونا وائرس کی وجہ سے کم ملا لیکن کم وقت میں اچھی تیاری کر رہے ہیں۔

    کوئنز ٹاؤن سے ورچوئل پریس کانفرنس کرتے ہوئے حیدر علی نے کہا کہ وہ پہلی بار نیوزی لینڈ کا دورہ کر رہے ہیں، پریکٹس میچز گرین وکٹ پر کھیل رہے ہیں تاکہ میچز میں کوئی مشکل نہ آئے۔

    حیدر علی نے بتایا کہ آئیسولیشن کا وقت خاصا مشکل تھا، ہم کمروں میں ہی ہلکی پھلکی ٹریننگ کرتے رہے، شکر ہے مشکل وقت گزر گیا، اب وقت کم ہے اور مقابلہ سخت ہے۔

    انہوں نے کہا کہ ٹی 20 اسکواڈ میں شامل سینئر کھلاڑی جونیئرز کو بہت سپورٹ کر رہے ہیں، پریکٹس کے دوران بیٹنگ پر خاص توجہ دی جارہی ہے۔

    حیدر علی کا مزید کہنا تھا کہ میرا ہدف ہے کہ تینوں فارمیٹ میں پاکستان کی نمائندگی کروں، ٹی 20 نہیں بلکہ ون ڈے اور ٹیسٹ کرکٹ بھی کھیلنا چاہتا ہوں۔

  • عمان پہنچنے والے سیاحوں کے لیے نئی ہدایات جاری

    عمان پہنچنے والے سیاحوں کے لیے نئی ہدایات جاری

    مسقط: سلطنت عمان کی وزارت ثقافت و سیاحت نے اعلان کیا ہے کہ عمان آنے والے سیاحوں کو کووڈ 19 پی سی آر ٹیسٹ اور 14 روزہ قرنطینہ کی پابندی سے استثنیٰ دے دیا گیا ہے۔

    ٹائمز آف عمان کی رپورٹ کے مطابق وزارت سیاحت نے کہا ہے کہ وزارت صحت کی جانب سے موصول کردہ نئی ہدایات کے پیش نظر یہ ممکن ہو چکا ہے کہ سلطنت عمان میں آنے والے سیاحوں کو آنے سے قبل لازمی کرونا وائرس پی سی آر ٹیسٹ، اور پہنچنے پر 14 روزہ قرنطینہ گزارنے سے مستثنیٰ کردیا جائے۔

    وزارت کے مطابق تاہم سیاحوں کے پاس ہیلتھ انشورنس ہونی چاہیئے جو کووڈ 19 کا شکار ہوجانے کی صورت میں اس کے علاج کے اخراجات کور کر سکے۔

    وزارت کی جانب سے جاری کردہ سرکلر میں کہا گیا ہے کہ سیاح عمان پہنچنے سے قبل پی سی آر ٹیسٹ کے لیے خود کو رجسٹر کروائیں جو عمان پہنچنے پر ایئرپورٹ پر ہوگا، اس ٹیسٹ کا رزلٹ منفی آنے تک سیاحوں کو الگ تھلگ رہنا ہوگا۔

    حکام کی جانب سے کہا گیا ہے کہ زمینی راستوں سے عمان پہنچنے والوں کو زیادہ سے زیادہ 72 گھنٹے پہلے کروایا گیا پی سی آر ٹیسٹ دکھانا ہوگا جو نیگیٹو ہونا چاہیئے، زمینی راستوں کے چیکنگ پوائنٹس پر طبی معائنے کی سہولیات کی کمی ہے۔

    مزید ہدایات کے مطابق عمان آنے والے سیاح 2 ہفتے سے زیادہ سلطنت میں قیام نہیں کرسکیں گے، ہر شخص یا ہر خاندان کو ہوٹل یا ریزورٹ میں علیحدہ کمرہ لینا ہوگا۔

    سیاحوں کو یقینی بنانا ہوگا کہ ایئرپورٹ پر ہونے والے کووڈ ٹیسٹ کا رزلٹ منفی آنے تک وہ کمرے سے باہر نہ نکلیں اور زیادہ لوگوں سے گھلنے ملنے سے پرہیز کریں، ٹیسٹ منفی آجانے کے بعد باہر نکلنے پر سیاحوں کو تمام ایس او پیز پر سختی سے عمل کرنا ہوگا جیسے ماسک پہننا، سماجی فاصلہ رکھنا، اور ہاتھوں کو سینی ٹائزڈ کرتے رہنا۔

    سلطنت کے تمام ہوٹلز اور ریزورٹس ہیلتھ سروسز اور ڈائریکٹوریٹ جنرل فار ڈیزیز سرویلنس سے رابطے میں ہوں گے۔ سلطنت میں اپنے قیام کے دوران اگر سیاح کھانسی، نزلہ زکام، بخار، سر درد، ڈائریا یا سانس کی تکلیف میں مبتلا ہوتے ہیں تو وہ فوری طور پر ہوٹل انتظامیہ کو مطلع کرنے کے پابند ہوں گے جس کے بعد انہیں طبی سہولت فراہم کی جائے گی اور اس عرصے کے دوران انہیں کمرے میں رہنا ہوگا۔

    وزارت سیاحت کی جانب سے مزید کہا گیا کہ عمان پہنچنے والے سیاح اس بات کو دھیان میں رکھیں کہ وہ جس ایئر لائن سے سفر کر رہے ہیں اس کی تمام طبی ہدایات پر عمل کر رہے ہیں۔

  • قرنطینہ: 8 سیکنڈز کی ’آزادی‘ نے ڈھائی لاکھ کا جرمانہ کروا دیا

    قرنطینہ: 8 سیکنڈز کی ’آزادی‘ نے ڈھائی لاکھ کا جرمانہ کروا دیا

    کاؤشیانگ: تائیوان میں ایک شخص کو قرنطینہ سے محض 8 سیکنڈز کے لیے باہر نکلنا بے حد بھاری پڑ گیا، خلاف ورزی کرنے والے کو ڈھائی لاکھ روپے جرمانہ ہو گیا۔

    تفصیلات کے مطابق تائیوان کے کاؤشیانگ شہر میں ایک شخص کو قرنطینہ ضابطے کی خلاف ورزی پر ڈھائی لاکھ روپے کا جرمانہ کر دیا گیا، وہ محض آٹھ سیکنڈز کے لیے ہوٹل کے کمرے سے باہر نکلا تھا۔

    غیر ملکی میڈیا کی رپورٹ میں بتایا گیا ہے کہ مذکورہ شخص فلپائن کا تارک وطن ہے، اور ہوٹل کے کمرے میں کوارنٹین کیا گیا تھا، لیکن وہ باہر نکل آیا۔

    واضح رہے کہ ہر ملک میں قرنطینہ قوانین یکساں نہیں ہیں، بعض ممالک میں یہ نہ صرف بہت سخت ہیں بلکہ ان کا نفاذ بھی سختی سے کیا جاتا ہے۔ پاکستان اور بھارت میں لاک ڈاؤن کے دوران بے ضرورت باہر نکلنے والوں کو پولیس اہل کاروں نے سڑکوں پر مرغا بھی بنایا اور ڈنڈوں سے پٹائی بھی کی، سوشل میڈیا پر جس کی ویڈیوز وائرل ہوئیں۔

    تائیوان ان ممالک میں شامل ہے جہاں قرنطینہ قوانین پر سختی سے عمل درآمد کیا جاتا ہے، اس آئی لینڈ ملک میں ایک شخص کو آٹھ سیکنڈ کی خلاف ورزی کے لیے ڈھائی لاکھ روپے کا جرمانہ کیا گیا۔

    محکمہ صحت کا کہنا تھا کہ فلپائن سے آیا ہوا مزدور ہوٹل کے کمرے سے ہال وے میں باہر نکل آیا تھا، ہوٹل اسٹاف نے اسے سی سی ٹی وی پر دیکھا تو محکمہ صحت کو فوراً اطلاع دے دی۔

    خیال رہے قرنطینہ قوانین کا مطلب ہے کہ لوگوں کو اپنے گھروں سے باہر نکلنے کی اجازت نہیں ہے خواہ وہ کم وقت کے لیے ہو۔ تائیوان کو اپنے اقدامات کے لیے دنیا بھر میں سراہا گیا۔ رواں برس تائیوان میں کرونا وائرس سے محض 7 اموات ہوئیں اور 720 کیسز سامنے آئے۔

  • عالمی ادارہ صحت کے سربراہ ڈاکٹر ٹیڈ روس قرنطینہ میں چلے گئے

    عالمی ادارہ صحت کے سربراہ ڈاکٹر ٹیڈ روس قرنطینہ میں چلے گئے

    جنیوا: عالمی ادارہ صحت کے سربراہ ڈاکٹر ٹیڈ روس کے رابطے میں رہنے والا ایک شخص کرونا وائرس کا شکار ہوگیا جس کے بعد ڈاکٹر ٹیڈ روس بھی قرنطینہ میں چلے گئے۔

    سماجی رابطے کی ویب سائٹ ٹویٹر پر اپنے ٹویٹ میں عالمی ادارہ صحت کے سربراہ ڈاکٹر ٹیڈ روس نے بتایا کہ حال ہی میں ان سے رابطے میں رہنے والے ایک شخص میں کرونا وائرس کی تشخیص ہوئی ہے جس کے بعد انہوں نے احتیاطاً خود کو قرنطینہ کرنے کا فیصلہ کیا ہے۔

    ڈاکٹر ٹیڈ روس کا کہنا تھا کہ وہ خیریت سے ہیں اور ان میں کرونا وائرس کی کوئی علامات نہیں ہے۔

    انہوں نے کہا کہ وہ عالمی ادارہ صحت کی طے کردہ تمام تر احتیاطی تدابیر اپنا رہے ہیں اور ساتھ ہی گھر سے کام کر رہے ہیں، انہوں نے کہا کہ میں اور میرے ساتھی جانیں بچانے کے لیے کام جاری رکھیں گے۔

    دوسری جانب دنیا بھر میں کرونا وائرس سے متاثرہ افراد کی تعداد 4 کروڑ 68 لاکھ 23 ہزار 515 ہوگئی جبکہ کرونا وائرس سے ہلاک افراد کی تعداد 12 لاکھ 5 ہزار 321 ہوگئی۔

    دنیا بھر میں کرونا وائرس کے فعال کیسز کی تعداد 1 کروڑ 18 لاکھ 61 ہزار 347 ہے، ان میں سے 85 ہزار 362 کیسز تشویشناک ہیں جبکہ دنیا بھر میں اب تک 3 کروڑ 37 لاکھ 56 ہزار 847 کرونا مریض صحت یاب ہو چکے ہیں۔

    بین الاقوامی اعداد و شمار کے مطابق دنیا بھر میں کرونا وائرس کے کلوزڈ کیسز میں سے 97 فیصد مریض وہ ہیں جو صحتیاب ہوچکے ہیں جبکہ ہلاک ہونے والوں کی شرح 3 فیصد ہے۔

    اسی طرح فعال کیسز میں سے 99 فیصد معمولی بیمار ہیں جبکہ صرف 1 فیصد مریضوں کی حالت تشویشناک ہے۔

  • کے الیکٹرک کی لوڈشیڈنگ سے قرنطینہ میں مریضوں کی حالت خراب

    کے الیکٹرک کی لوڈشیڈنگ سے قرنطینہ میں مریضوں کی حالت خراب

    کراچی: کے الیکٹرک نے شہر قائد کے شہریوں سے جینے کا حق چھین لیا، شدید گرمی میں بد ترین لوڈ شیڈنگ نے عوام کا جینا دوبھر کر دیا ہے۔

    اے آر وائی نیوز کے مطابق کراچی کے مختلف علاقوں میں کہیں 12، کہیں 14 اور کہیں 18 گھنٹے لوڈ شیڈنگ کی جا رہی ہے، نہ صرف عوام سخت اذیت میں مبتلا ہو گئے ہیں بلکہ قرنطینہ میں رکھے گئے کرونا انفیکشن کے مریضوں کی حالت بھی شدید گرمی کے باعث خراب ہونے لگی ہے۔

    کراچی کے علاقوں اتحاد ٹاؤن، قائم خانی کالونی، گلشن غازی، ملیر، نوسی کالونی، عیسیٰ نگری، لانڈھی، گلشن ظہور، ابی سینا لائن، نصرت بھٹو کالونی، بلدیہ، گلشن حدید، احسن آباد، گڈاپ کے درجنوں گوٹھوں اور کاٹھور میں 12 سے 14 گھنٹے لوڈ شیڈنگ ہونے لگی ہے۔

    بجلی کی لوڈ شیڈنگ، وزیر اعظم کے معاون خصوصی کا وزیر توانائی سے شکوہ

    ہر گھنٹے کے بعد ڈھائی گھنٹے لوڈ شیڈنگ معمول بن گیا ہے، سخت گرمی اور بجلی کی بندش سے پانی کی بھی سخت قلت پیدا ہو گئی ہے، ملیر کے دیہی علاقوں میں بھی 12 سے 18 گھنٹے کی بدترین لوڈ شیڈنگ کا سلسلہ جاری ہے، بجلی کی طویل لوڈشیڈنگ کے باعث معمولات زندگی متاثر ہو گئے ہیں۔

    عوام کے الیکٹرک کے خلاف بھرپور احتجاج کرنے پر مجبور ہو گئے، شاہراہ قائدین پر کے الیکٹرک کے دفتر کے باہر علاقہ مکینوں نے نکل کر احتجاج کیا، مظاہرین نے لوڈ شیڈنگ نا منظور کے نعرے لگائے، مظاہرین نے کے الیکٹرک دفتر کا گیٹ توڑنے کی بھی کوشش کی تاہم پولیس کی بھاری نفری موقع پر پہنچ گئی، بعد ازاں مظاہرین نے شاہراہ قائدین پر دھرنا دیا۔

  • کرونا کا خطرہ، برطانوی حکومت نے بھی سخت اقدام اٹھا لیا

    کرونا کا خطرہ، برطانوی حکومت نے بھی سخت اقدام اٹھا لیا

    لندن: کرونا وائرس کے پھیلاؤ کے خطرے کے پیش نظر برطانوی حکومت نے بھی سخت اقدام اٹھا لیا ہے۔

    اے آر وائی نیوز کے مطابق برطانیہ میں بیرون ملک سے آنے والوں پر 14 دن کے قرنطینہ کی شرط عائد کر دی گئی ہے۔

    برٹش ایئرویز کی جانب سے پاکستان سمیت تمام ممالک کو ٹریول ایڈوائزری جاری کر دی گئی، 8 جون سے برطانیہ پہنچنے والے مسافروں پر قرنطینہ کی شرط عائد ہوگی۔

    برٹش ایئرویز نے کہا ہے کہ مسافر برطانیہ پہنچنے پر اپنی رہائش گاہوں پر 14 دن کے لیے آئسولیٹ ہوں گے، نوٹیفکیشن کے مطابق یہ سیلف آئسولیشن ہوگی۔

    برطانیہ میں کورونا کا زور ٹوٹنے لگا

    برٹش ایئرویز نے اپنے ٹریول پارٹنرز کو مطلع کیا ہے کہ اپنے اپنے کسٹمرز کو برطانیہ روانہ ہونے سے قبل اس سلسلے میں آگاہ کیا جائے کہ برطانیہ نے ملک میں آنے والوں کے لیے نیا ضابطہ متعارف کرا دیا ہے۔

    واضح رہے کہ برطانیہ کرونا وائرس سے ہلاکتوں میں دنیا کا دوسرا سر فہرست ملک ہے، گزشتہ چوبیس گھنٹوں کے دوران 357 نئی اموات کے بعد برطانیہ میں مجموعی اموات 40,261 ہو گئی ہیں، جب کہ متاثرہ افراد کی تعداد بھی 2 لاکھ 83 ہزار سے بڑھ گئی ہے، برطانیہ نے تاحال صحت یاب ہونے والے مریضوں کا ڈیٹا جاری نہیں کیا۔

  • گھر میں قرنطینہ کرنے کا طریقہ کار کیا ہوگا؟ پنجاب حکومت کی ہدایات جاری

    گھر میں قرنطینہ کرنے کا طریقہ کار کیا ہوگا؟ پنجاب حکومت کی ہدایات جاری

    لاہور: صوبہ پنجاب میں کرونا وائرس کے مریضوں کو گھر میں قرنطینہ کرنے کی ہدایات اور قواعد و ضوابط جاری کردیے گئے، صرف معمولی علامات والے مریضوں کو ہی گھر میں قرنطینہ ہونے کی اجازت دی جائے گی۔

    تفصیلات کے مطابق وزیر اعلیٰ پنجاب سردار عثمان بزدار نے ہوم آئسولیشن کی اجازت دے دی، عثمان بزدار کا کہنا تھا کہ ہوم آئسولیشن کے لیے عالمی ادارہ صحت کا ایس او پی مد نظر رکھا گیا ہے، صرف معمولی علامات والے مریضوں کو ہوم آئسولیشن میں رکھا جا سکے گا۔

    عثمان بزدار کا کہنا تھا کہ مریض کو متعلقہ ڈسٹرکٹ ہیلتھ اتھارٹی کی نگرانی میں عمارت میں رکھا جائے گا، جہاں مریض کو رکھا جائے گا اس بلڈنگ کو روز ڈس انفیکٹ کیا جائے گا۔

    انہوں نے کہا کہ آئسولیشن کے مریض کو ڈسپوزبل برتن میں کھانا مہیا کیا جائے گا۔

    وزیر اعلیٰ کا کہنا تھا کہ ہوم آئسولیشن کی اجازت ڈپٹی کمشنر کی نامزد کردہ ہوم آئسولیشن کمیٹی دے گی، کمیٹی میں اے سی یا ان کا نمائندہ ڈی ڈی او ہیلتھ اور چیف آفیسر شامل ہوں گے، پاپولیشن ویلفیئر، لائیو اسٹاک اور ایکسائز اینڈ ٹیکسیشن مانیٹرنگ کریں گے۔

    انہوں نے کہا کہ ہر اربن یونین کونسل میں 3 کمیٹیاں قائم کی جائیں گی، ہر کمیٹی میں ایک ڈاکٹر شامل ہوگا۔ دیہی یو سی میں کمیٹی بنائی جائے گی، ڈاکٹر کا ہوناضروری ہے۔

    دوسری جانب پنجاب کے وزیر اطلاعات فیاض الحسن چوہان نے مزید تفصیلات سے آگاہ کرتے ہوئے بتایا کہ پنجاب حکومت نے ہوم آئسولیشن کے لیے قواعد جاری کر دیے ہیں، ہوم آئسولیشن کے لیے خصوصی کمیٹی بنے گی، متعلقہ ضلع کا ڈپٹی کمشنر ہوم آئسولیشن کمیٹی کے اراکین کو نامزد کرے گا۔

    انہوں نے کہا کہ ضلعی ہوم آئسولیشن کمیٹی کی سربراہی اسسٹنٹ کمشنر کرے گا، کمیٹی میں محکمہ صحت و دیگر محکموں کے اہلکار شامل ہوں گے، شہری اور دیہی یونین کونسل کی سطح پر سب کمیٹیاں بنیں گی۔

    صوبائی وزیر کا کہنا تھا کہ کمیٹی گھروں کے سائز اور اہل خانہ کے تعداد کی جانچ کے بعد اجازت دے گی، کرونا کی ہلکی علامات پر ہی مریض ہوم آئسولیشن کا اہل ہوگا۔ مریض کی حالت خراب ہو تو گھر میں رہنے کی اجازت نہیں ہوگی۔

    انہوں نے کہا کہ گھر میں قرنطینہ میں مریض روزانہ اپنی صحت کی تفصیل محکمے کو بھجوانے کا پابند ہوگا، محکمہ صحت کی ہدایت پر مریض طریقہ کار کے تحت ٹیسٹ بھی کرواتا رہے گا، مریض کو ہر 10 دن بعد ٹیسٹ کروانا ہوگا، 2 بار ٹیسٹ رپورٹ منفی آنے پر مریض ہوم آئسولیشن ختم کر سکے گا۔

    صوبائی وزیر کا کہنا تھا کہ 2 بار منفی ٹیسٹ کروانے میں درمیانی مدت 24 گھنٹے ہونی چاہیئے، دوسری بار بھی کرونا ٹیسٹ مثبت آئے تو اگلا ٹیسٹ 5 دن بعد کروانا ہوگا۔ ٹیسٹ کے لیے محکمہ صحت کا عملہ گھر سے سیمپل لے گا۔

    انہوں نے مزید کہا کہ مریض کو منظور شدہ نجی لیبارٹری سے بھی ٹیسٹ کی اجازت ہوگی، ٹیسٹنگ سہولت میسر نہ ہونے پر مریض مزید 2 ہفتے آئسولیٹ رہے گا۔

    گھر میں قرنطینہ کے حوالے سے سیکریٹری پرائمری اینڈ سیکنڈری صحت نے ایس او پیز کا نوٹیفکیشن بھی جاری کردیا ہے۔

  • کیا آپ اس فنکار کو پہچانتے ہیں؟

    کیا آپ اس فنکار کو پہچانتے ہیں؟

    کراچی: معروف بینڈ اسٹرنگز کے گلوکار بلال مقصود نے اسنیپ چیٹ کے فلٹر میں اپنی ایک دلچسپ ویڈیو شیئر کی ہے جس پر مداحوں نے حیرت کا اظہار کرتے ہوئے انہیں پہچاننے کی کوشش کی۔

    مشہور میوزیکل بینڈ اسٹرنگز کے گلوکار بلال مقصود قرنطینہ کے دنوں میں اسنیپ چیٹ فلٹرز کے استعمال سے اپنے مداحوں سے جڑے ہوئے ہیں۔

     

    View this post on Instagram

     

    Sohniye🤭

    A post shared by Bilal Maqsood (@bilalxmaqsood) on

    بلال انسٹاگرام پر کبھی گلوکاری کرتے نظر آتے ہیں تو کبھی لائیو اسکیچنگ، انہوں نے اپنے والد انور مقصود کے ساتھ لائیو سیشن بھی کیے ہیں۔

    حال ہی میں انہوں نے اسنیپ چیٹ کا ایک فلٹر استعمال کرتے ہوئے سونھڑیے گانا گایا جو ان کے مداحوں نے بہت پسند کیا۔

    اس سے قبل انسٹاگرام پر انہوں نے ’اکڑ بکڑ‘ گاتے ہوئے ویڈیو شیئر کی تھی اور لکھا تھا کہ یہ وہ گانا ہے جسے میں بچپن میں گایا کرتا تھا، اسکول کے اساتذہ مجھے یہ گانا سننے کے لیے کلاس رومز میں بلایا کرتے تھے۔

    علاوہ ازیں انہوں نے دونوں ہاتھوں سے بیک وقت انتہائی مہارت کے ساتھ ایک پوٹریٹ بھی بنائی تھی جس میں انھوں نے لاک ڈاؤن کی صورتحال کو پیش کیا تھا۔

  • گورنر سندھ کا سیلف آئسولیشن سے ٹویٹ، دوبارہ ٹیسٹ کروانے کا عندیہ

    گورنر سندھ کا سیلف آئسولیشن سے ٹویٹ، دوبارہ ٹیسٹ کروانے کا عندیہ

    کراچی: گورنر سندھ عمران اسماعیل کا کہنا ہے کہ 9 روز کے قرنطینہ کے بعد خود کو بہتر محسوس کر رہا ہوں، کل دوبارہ اپنا کرونا وائرس کا ٹیسٹ کرواؤں گا۔

    تفصیلات کے مطابق گورنر سندھ عمران اسماعیل نے سماجی رابطے کی ویب سائٹ ٹویٹر پر ٹویٹ کرتے ہوئے کہا کہ آج قرنطینہ میں 9 دن ہوگئے ہیں۔

    گورنر سندھ کا کہنا تھا کہ طبیعت بہت بہتر محسوس کر رہا ہوں، وائرس کی کچھ علامات تھیں جیسے کھانیس، بخار اور سانس لینے میں تکلیف جو آہستہ آہستہ ختم ہو رہی ہیں۔

    انہوں نے مزید کہا کہا کل دوبارہ اپنا کرونا وائرس کا ٹیسٹ کرواؤں گا، آپ سب کی دعاؤں کا بہت شکریہ۔

    خیال رہے کہ گورنر سندھ عمران اسماعیل میں 27 اپریل کو کرونا وائرس کی علامات ظاہر ہوئی تھیں، بعد ازاں کرونا وائرس ٹیسٹ کروانے پر وہ مثبت نکلا تھا جس کے بعد گورنر سندھ نے خود کو قرنطینہ کرلیا تھا۔

    عمران اسماعیل کا کہنا تھا کہ میری والدہ آئی تھیں اور ہم نے مل کر افطار کیا، والدہ کے جانے کے بعد بخار ہوا جس کے بعد ٹیسٹ کروانے کا سوچا۔

    وزیر اعظم عمران خان نے گورنر سندھ کے لیے نیک تمناؤں کا اظہار کیا جبکہ ان کی صحتیابی کی دعا بھی کی۔

  • گھر میں رہنے سے بور ہوئے بچوں نے 46 گاڑیاں چرا لیں

    گھر میں رہنے سے بور ہوئے بچوں نے 46 گاڑیاں چرا لیں

    امریکا میں آئسولیشن سے تنگ آئے ہوئے چند نوجوانوں نے 40 سے زائد گاڑیاں چرا لیں، کم عمری کی وجہ سے پولیس انہیں گرفتار نہیں کرسکتی۔

    کرونا وائرس کے لاک ڈاؤن کی وجہ سے جہاں لوگ گھروں میں رہتے ہوئے مختلف سرگرمیاں اپنا رہے ہیں وہیں چند کھلنڈرے نوجوانوں نے گاڑیاں چرانا شروع کردیں۔

    امریکی ریاست نارتھ کیرولینا سے تعلق رکھنے والے 19 نوجوان جن کی عمریں 9 سے 16 سال کے دوران ہیں، تفریحاً گاڑیاں چرا رہے تھے۔

    پولیس کا کہنا ہے کہ تمام افراد گھر میں آئسولیشن سے بور ہوچکے تھے جس کے بعد انہوں نے گاڑیاں چرانے کا ایک مقابلہ طے کیا۔ سب سے زیادہ چرائی ہوئی گاڑیوں کے ساتھ تصاویر کھینچنے والا اس مقابلے کا فاتح قرار پاتا۔

    پولیس نے 46 چوری شدہ گاڑیوں میں سے 40 برآمد کرلی ہیں جن میں آڈی، فورڈ، ہونڈا اور شیورلیٹ وغیرہ شامل ہیں، ان کی مالیت 1.1 ملین ڈالر ہے۔

    ان تمام ملزمان کی عمریں نہایت کم ہیں لہٰذا پولیس انہیں گرفتار نہیں کرسکتی اور نہ ہی ان پر مقدمہ چلایا جاسکتا ہے۔