ARYNews.tv | Urdu – Har Lamha Bakhabar

Tag: قرنطینہ

  • ٹرمپ نیویارک کو قرنطینہ کرنے کے فیصلے سے پیچھے ہٹ گئے

    ٹرمپ نیویارک کو قرنطینہ کرنے کے فیصلے سے پیچھے ہٹ گئے

    واشنگٹن: امریکی صدر ڈونلڈ ٹرمپ نے نیویارک شہر کو قرنطینہ کرنے کا خیال ترک کر دیا۔

    تفصیلات کے مطابق امریکی صدر نے کہا ہے کہ نیویارک کو کوارنٹین کرنا ضروری نہیں ہوگا، شہر کے لیے زیادہ سخت ٹریول ایڈوائزری جاری کی جائے گی۔

    امریکی میڈیا کے مطابق ڈونلڈ ٹرمپ کا یہ بیان تب سامنے آیا جب نیویارک کے گورنر نے کہا کہ شہر کو قرنطینہ کرنے کا خیال احمقانہ ہوگا، ٹرمپ نے اپنے ٹویٹ میں لکھا کہ شہر کو قرنطینہ کرنا ضروری نہیں ہوگا۔

    امریکی صدر نے کہا کہ یہ فیصلہ وائٹ ہاؤس کرونا وائرس ٹاسک فورس کی تجویز پر کیا گیا ہے۔ خیال رہے کہ اس سے قبل ٹرمپ نے کہا تھا کہ نیویارک پر قرنطینہ کی صورت حال نافذ کی جا سکتی ہے، نیو جرسی اور کنکٹی کٹ کے بعض حصوں کو بھی قرنطینہ کیا جا سکتا ہے۔

    واضح رہے کہ نیویارک میں 52 ہزار سے زائد کیسز سامنے آ چکے ہیں، پورے امریکا میں کووِڈ نائنٹین کے جتنے کیسز ہیں، ان میں سے آدھے کیسز کا تعلق نیویارک سے ہے۔ ٹرمپ نے اب سینٹر فار ڈیزیز کنٹرول کو نیویارک پر سخت ٹریول ایڈوائزری جاری کرنے کی ہدایت کر دی ہے۔

    ادھر دنیا بھر میں کرونا وائرس کے متاثرہ ممالک میں امریکا سرفہرست آ چکا ہے، امریکا میں ایک دن میں کرونا وائرس کے 12 ہزار 200 نئے مریض رپورٹ ہوئے، جس کے بعد مجموعی متاثرین کی تعداد 123,750 ہو گئی ہے۔ دوسری طرف اموات کی تعداد بھی بڑھ کر 2,227 ہو چکی ہے۔

  • سکھر اور ڈی جی خان کے قرنطینہ سے مزید سینکڑوں زائرین گھروں کو روانہ

    سکھر اور ڈی جی خان کے قرنطینہ سے مزید سینکڑوں زائرین گھروں کو روانہ

    سکھر: سکھر کے قرنطینہ سے مزید 11 زائرین کو واپس گھروں کو بھیج دیا گیا، ڈیرہ غازی خان کے قرنطینہ سے بھی 26 زائرین کو کرونا وائرس ٹیسٹ کی رپورٹ منفی آنے پر گھروں کو روانہ کردیا گیا۔

    تفصیلات کے مطابق ذرائع کا کہنا ہے کہ سکھر کے قرنطینہ سے مزید 11 زائرین اپنے گھروں کو روانہ ہوگئے ہیں۔ روانہ کیے گئے 11 زائرین میں خواتین اور بچے بھی شامل ہیں۔

    ذرائع کا کہنا ہے کہ زائرین کا تعلق کراچی اور ٹنڈو جام سے ہے، زائرین کی ٹیسٹ رپورٹ نارمل آنے پر انہیں گھر بھیجا جا رہا ہے۔

    سکھر کے قرنطینہ سے 626 زائرین کو پہلے ہی گھروں کو بھیجا جا چکا ہے جس کے بعد گھروں کو جانے والے زائرین کی تعداد 651 ہوگئی ہے۔

    دوسری جانب صوبہ پنجاب کے شہر ڈیرہ غازی خان میں قائم قرنطینہ سے بھی 26 زائرین کو گھر روانہ کردیا گیا ہے، مذکورہ زائرین کا تعلق فیصل آباد سے ہے اور انہیں کرونا وائرس ٹیسٹ کی رپورٹ نیگٹیو آنے پر گھر بھیجا گیا ہے۔

    اسسٹنٹ کمشنرز نے تمام زائرین کو عبد الحکیم انٹر چینج سے وصول کیا۔ واپس آنے والے تمام زائرین کو اپنے گھروں میں الگ تھلگ رہنے کی تلقین کردی گئی ہے۔

    یاد رہے کہ ملک بھر میں اب تک کرونا وائرس کے مریضوں کی تعداد 1408 ہوچکی ہے جبکہ 11 افراد ہلاک ہوچکے ہیں۔ سب سے زیادہ کیسز پنجاب میں رپورٹ ہوئے جہاں مریضوں کی تعداد 490 ہوگئی۔

    سندھ میں 457، پختونخواہ میں 180، بلوچستان میں 133، گلگت بلتستان میں 107، اسلام آباد میں 39 اور آزاد کشمیر میں 2 کیسز رپورٹ ہوئے ہیں۔

    ملک بھر میں 7 مریضوں کی حالت تشویشناک ہے جبکہ 25 افراد صحتیاب ہو کر اسپتالوں سے ڈسچارج کیے جاچکے ہیں۔

  • 24 گھنٹے سے زائد قرنطینہ میں رہا، اب رپورٹ آ گئی ہے: فواد چوہدری

    24 گھنٹے سے زائد قرنطینہ میں رہا، اب رپورٹ آ گئی ہے: فواد چوہدری

    اسلام آباد: وفاقی وزیر برائے سائنس اینڈ ٹیکنالوجی فواد چوہدری نے کہا ہے کہ 24 گھنٹے سے زائد قرنطینہ میں رہنے کے بعد ان کی رپورٹ آ گئی ہے۔

    تفصیلات کے مطابق فواد چوہدری نے ٹویٹ کرتے ہوئے کہا ہے کہ 24 گھنٹے سے زائد قرنطینہ کے بعد رپورٹ مل گئی ہے، رپورٹ کے مطابق میرا کو وِڈ 19 ٹیسٹ نیگیٹو آ گیا ہے۔

    فواد چوہدری نے لکھا کہ ٹیسٹ کے بعد کیا جانے والا انتظار اعصاب شکن تھا لیکن اللہ کا شکر ہے کہ اچھی خبر ملی،احتیاط کا دامن ہاتھ سے نہیں چھوڑنا چاہیے، انشاء اللہ انسانیت سرخ رو ہوگی اور ہم اس وبا کو شکست دے پائیں گے۔

    خیال رہے کہ صدر مملکت پاکستان ڈاکٹر عارف علوی، وزیر خارجہ شاہ محمود قریشی اور وزیر منصوبہ بندی اسد عمر نے گزشتہ ہفتے چین کا دورہ کیا تھا جس کی واپسی پر ان کے کرونا ٹیسٹ کروائے گئے تھے، ان کے ٹیسٹ بھی نیگیٹو آئے تھے۔

    وزیر خارجہ شاہ محمود ہفتے کے روز کرونا وبا کے حوالے سے وزارت خارجہ میں قائم کیے گئے "کرائسز مینجمنٹ سیل” اجلاس کی صدارت کرتے ہوئے

    تاہم مزید احتیاط کے پیش نظر وزیر خارجہ شاہ محمود قریشی نے خود سیلف قرنطینہ کر دیا تھا، انھوں نے ضروری دفتری امور گھر سے جاری رکھے، اور تمام رکی ہوئی دفتری فائلوں کو دیکھا اور احکامات صادر کیے۔

    شہباز شریف کی پاکستان واپسی، لاہور پہنچ گئے

    پاکستان میں کرونا کے مریضوں کی تعداد 644 ہو گئی ہے، سندھ میں سب سے زیادہ 292 کیسز کی تصدیق پنجاب میں 152، بلوچستان میں 103 اور خیبر پختون خوا میں 31 مریض رپورٹ ہو چکے ہیں، گلگت بلتستان میں 55 اور اسلام آباد میں 10 مریضوں کی تصدیق ہو چکی ہے، پاکستان میں 3 مریض جاں بحق، 5 صحت یاب ہو چکے ہیں۔

  • شہباز شریف کو 14دن میو اسپتال قرنطینہ میں رکھنا چاہیے، فواد چوہدری

    شہباز شریف کو 14دن میو اسپتال قرنطینہ میں رکھنا چاہیے، فواد چوہدری

    اسلام آباد: وفاقی وزیر برائے سائنس اینڈ ٹیکنالوجی فواد چوہدری کا کہنا تھا کہ شہبازشریف کو 14دن میو اسپتال قرنطینہ میں رکھنا چاہیے۔

    تفصیلات کے مطابق سماجی رابطے کی ویب سائٹ ٹویٹر پر وفاقی وزیر فواد چوہدری نے اپنے پیغام میں کہا کہ شہبازشریف کو بتایا گیا پاکستان کے لیے فلائٹ آپریشن بندکر دیاگیا ہے۔

    فواد چوہدری نے کہا کہ شہبازشریف کو بتایاگیا تو انہوں نے مریم اورنگزیب کو بیان داغنے کا کہہ دیا، پتہ نہیں یہ پاکستان کے لوگوں کو اتنا بیوقوف کیوں سمجھتے ہیں؟

    وفاقی وزیر برائے سائنس اینڈ ٹیکنالوجی نے کہا کہ وزیراعظم عمران خان سے اپیل ہے شہبازشریف کوخصوصی اجازت دینی چاہیے۔

    انہوں نے مزید کہا کہ شہبازشریف کو 14 دن میو اسپتال قرنطینہ میں رکھناچاہیے، قرنطینہ میں رکھنے سے شہبازشریف کو اسپتال کی اہمیت کا پتہ چلےگا۔

    شہباز شریف آج رات وطن واپس پہنچیں گے، مریم اورنگزیب

    واضح رہے کہ ترجمان مسلم لیگ ن مریم اورنگزیب کا کہنا ہے کہ اپوزیشن لیڈر شہباز شریف فوری وطن واپس آ رہے ہیں، وہ آج رات وطن واپس پہنچیں گے۔

  • کراچی کا ایکسپو سینٹر قرنطینہ میں تبدیل

    کراچی کا ایکسپو سینٹر قرنطینہ میں تبدیل

    کراچی: سندھ حکومت نے ہنگامی صورت حال کے پیش نظر ایکسپو سینٹر کراچی کو فیلڈ اسپتال میں تبدیل کر دیا۔

    تفصیلات کے مطابق کرونا وائرس سے بچاؤ کے لیے کراچی کے ایکسپو سینٹر کو قرنطینہ میں تبدیل کر دیا گیا۔ اعلیٰ سول اور فوجی حکام نے کیمپ کا دورہ کر کے تیاریوں کا جائزہ لیا۔ سول وعسکری حکام نے حفظان صحت کے اصولوں کی پاسداری یقینی بنانے کی ہدایات کر دیں۔

    مریضوں کی سہولت کے لیے تمام ممکنہ سہولیات فراہم کی جائیں گی، کیمپ میں حفاظتی اسپرے کیا جا رہا ہے،طبی، سیکورٹی عملہ تعینات کیا جا رہا ہے۔

    دوسری جانب ایکسپو سینٹرمیں پاکستان آرمی کی جانب سے آئسولیشن سینٹر قائم ہے، قرنطینہ سینٹر میں سندھ حکومت ،آرمی کی ٹیمیں مل کر کام کر رہی ہیں۔ پاکستان اۤ رمی کی جانب سے کراچی ایئرپورٹ پر بھی اسکریننگ کی سہولیات فراہم کرنے کا بھی اہتمام کیا گیا۔

    پاکستان میں کرونا وائرس کے کیسز کی تعداد 458 ہو گئی

    واضح رہے کہ پاکستان میں کرونا وائرس کے کیسز کی تعداد 458 ہو گئی ہے، وائرس سے مجموعی طور پر 3 افراد جاں بحق جبکہ 5 مریض صحت یاب ہو چکے ہیں۔

  • وزیر خارجہ شاہ محمود قریشی کا سیلف قرنطینہ کا تیسرا دن

    وزیر خارجہ شاہ محمود قریشی کا سیلف قرنطینہ کا تیسرا دن

    اسلام آباد: وزیر خارجہ شاہ محمود قریشی نے دورہ چین سے واپسی کے بعد 5 روز کے لیے ’’سیلف قرنطینہ‘‘ کا فیصلہ کیا تھا، آج قرنطینہ کا تیسرا دن ہے، اے آر وائی نیوز سے فون پر گفتگو کرتے ہوئے انھوں نے کہا کہ چین میں موجود پاکستانی طلبہ اب کرونا کے ڈر سے باہر آ گئے ہیں۔

    اے آر وائی نیوز کے مطابق سیلف قرنطینہ میں جانے والے وزیر خارجہ شاہ محمود تیسرے روز بھی ضروری دفتری امور گھر سے جاری رکھے ہوئے ہیں، انھوں نے تمام رکی ہوئی دفتری فائلوں کو دیکھا اور احکامات صادر کیے۔ فون پر گفتگو کرتے ہوئے انھوں نے کہا کہ چین میں موجود پاکستانی طلبہ کرونا کے ڈر سے باہر آ گئے ہیں، پاکستانی طلبہ نے اعتراف کیا کہ چین میں ان کا خیال رکھا گیا، طلبہ نے پاکستانی کھانوں کی درخواست کی تھی جس پر ان کے لیے پاکستانی کھانا چین بھجوایا گیا ہے۔

    چین کے شہر ووہان میں مقیم پاکستانی طلبہ کے لیے کھانا روانہ

    وزیر خارجہ نے قوم سے کہا کہ کرونا وائرس سے بچاؤ کے لیے حفاظتی تدابیر اور ہدایات کی پیروی کریں، اجتماعات، ہجوم والی جگہوں پر جانے سے پرہیز کیا جائے، مصافحہ اور گلے ملنے سے اجتناب کریں، پاکستانی قوم نے ہمیشہ کڑے وقت میں اتحاد اور یک جہتی کا ثبوت دیا، توقع ہے کرونا وائرس کے خلاف جنگ میں بھی قوم سرخ رو ہوگی، کوئی بھی حکومت تنہا اس کٹھن چیلنج کا مقابلہ نہیں کر سکتی۔

    ان کا کہنا تھا کہ چین کی طرح اس وائرس کو شکست دینے کے لیے قوم کو متحد ہونا ہوگا، حکومت آپ کی حفاظت کو یقینی بنانے کے لیے اقدامات کر رہی ہے ، جنھیں مؤثر بنانے کے لیے عوام کی طرف سے بھرپور تعاون کی ضرورت ہوگی، حکومت بھی لمحہ بہ لمحہ تمام صورت حال سے عوام کو باخبر رکھے گی۔

  • تمام معمر برطانوی قرنطینہ میں رکھے جائیں گے

    تمام معمر برطانوی قرنطینہ میں رکھے جائیں گے

    لندن: برطانیہ نے اپنے ضعیف شہریوں کو مہلک کرونا وائرس سے بچانے کے لیے بڑا فیصلہ کر لیا ہے۔

    تفصیلات کے مطابق برطانیہ میں 70 سال سے بڑی عمر کے افراد کو 4 ماہ قرنطینہ میں رکھنے کی تیاری ہونے لگی ہے، یہ فیصلہ معمر شہریوں کو کرونا وائرس کے وار سے بچانے کے لیے کیا گیا ہے۔

    غیر ملکی میڈیا کا کہنا ہے کہ آیندہ چند دنوں میں تمام معمر افراد سے کہا جائے گا کہ وہ اپنے سماجی میل جول ختم کر کے گھروں تک محدود ہو جائیں، اگر کسی میں کرونا وائرس کی تشخیص ہوئی تو اسے فوری طور پر قرنطینہ میں رکھا جائے گا۔

    برطانوی ہیلتھ سیکریٹری میٹ ہانوک نے میڈیا سے گفتگو کرتے ہوئے کہا ہے کہ ستر سال سے زائد عمر کے لوگوں کو ‘سیلف آئسولیشن’ کے ذریعے وائرس سے بچایا جائے گا۔ انھوں نے یہ بھی کہا کہ برطانیہ کے اقدامات اب تک یورپ میں ہونے والے اقدامات کے مقابلے میں بہت کم سخت ہیں۔ خیال رہے کہ اٹلی، اسپین اور فرانس نے کرونا وائرس کے پھیلاؤ کو روکنے کے لیے سخت لاک ڈاؤن نافذ کر دیا ہے۔

    دنیا سناٹے کی طرف بڑھنے لگی، کرونا وائرس سے 6521 افراد ہلاک

    ادھر اپوزیشن کی لیبر پارٹی کی ممبر پارلیمنٹ کیٹ اوزبرن میں کرونا وائرس کی تشخیص ہو گئی ہے۔ کیٹ اوزبرن کا کہنا تھا کہ سیلف آئسولیشن کے بعد ٹیسٹ میں وائرس کا انکشاف ہوا۔ دوسری طرف اسکاٹ لینڈ کے کیئر ہوم میں رہایش پذیر 6 افراد میں بھی کرونا کی تصدیق ہو گئی ہے۔ برطانیہ میں کرونا وائرس سے اموات 35 ہو چکی ہیں جب کہ متاثرہ افراد کی تعداد 1391 تک پہنچ گئی ہے۔

  • کرونا وائرس کا خوف، جنوبی کوریا نے کرنسی نوٹ جلا دیے

    کرونا وائرس کا خوف، جنوبی کوریا نے کرنسی نوٹ جلا دیے

    سیئول: جنوبی کوریا میں کرونا وائرس کو پھیلنے سے روکنے کے لیے انوکھا قدم اٹھایا گیا ہے، کرنسی نوٹوں کو بھی قرنطینہ میں رکھ دیا گیا جب کہ بہت سارے نوٹ جلا دیے گئے۔

    تفصیلات کے مطابق جنوبی کوریا میں کرونا وائرس سے بچاؤ کے لیے حفاظتی اقدامات کے تحت تمام بینک کرنسی نوٹوں کو 2 ہفتے کے لیے قرنطینہ میں رکھ رہے ہیں تاکہ اس پر کرونا وائرس کے تمام اثرات ختم ہو جائیں۔

    عالمی ادارہ صحت نے خدشے کا اظہار کیا تھا کہ وائرس کرنسی نوٹوں کے ذریعے بھی لوگوں میں منتقل ہو سکتا ہے، جس کے بعد جنوبی کوریا میں گندے اور پھٹے ہوئے نوٹ جمع کیے جانے لگے ہیں، جب کہ بڑی تعداد میں نوٹوں کو جلایا بھی گیا۔

    کرونا وائرس کے خوف سے جنوبی کوریا میں کرنسی نوٹ بھی قرنطینہ میں ڈال دیے گئے

    برطانیہ کی خاتون ہیلتھ منسٹر بھی کرونا وائرس کا شکار ہو گئیں

    بینک آف کوریا کے مطابق کرنسی نوٹوں کو زیادہ درجہ حرارت میں صاف کر کے جاری کیے جائیں گے، جس کے لیے نوٹوں کو دو ہفتوں کے لیے قرنطینہ میں رکھا جائے گا۔

    خیال رہے کہ جنوبی کوریا میں گزشتہ چوبیس گھنٹوں میں 242 نئے کیسز سامنے آنے کے بعد کرونا وائرس کے ٹوٹل کیس 7,755 ہو گئے ہیں، جب کہ ایک نئی موت کے ساتھ مجموعی اموات 61 ہو چکی ہیں۔

    دوسری طرف یہ نیا اور مہلک وائرس COVID 19 بہت تیزی سے دنیا میں پھیلتا جا رہا ہے، اب تک 120 ممالک اور علاقوں کو اپنی لپیٹ میں لے چکا ہے، اور متاثرہ افراد کی تعداد 119,389 ہو چکی ہے جب کہ وائرس سے اب تک 4,300 افراد ہلاک ہو چکے ہیں۔ دوسری طرف 66,584 افراد اس موذی وائرس سے صحت یاب بھی ہو چکے ہیں۔

  • کرونا وائرس سے ہلاکتیں 2000 سے تجاوز کر گئیں، کروز شپ میں پھنسے مسافروں کا جزوی انخلا

    کرونا وائرس سے ہلاکتیں 2000 سے تجاوز کر گئیں، کروز شپ میں پھنسے مسافروں کا جزوی انخلا

    بیجنگ: چین میں مہلک کرونا وائرس کے باعث مزید 136 افراد ہلاک ہو گئے، حکام کا کہنا ہے کہ کرونا وائرس سے ہلاکتیں 2000 سے تجاوز کر گئیں۔

    تفصیلات کے مطابق چین کے شہر ووہان سے دنیا بھر میں پھیلنے والے خوف ناک اور نہایت مہلک وائرس سے ہلاکتوں کا سلسلہ نہیں روکا جا سکا، ہلاک ہونے والے افراد کی تعداد 2 ہزار سے بھی بڑھ گئی ہے۔

    چینی حکام کا کہنا ہے کہ کرونا وائرس کے مزید ایک ہزار 749 کیس رپورٹ ہوئے ہیں، وائرس سے متاثرہ افراد کی مجموعی تعداد 74 ہزار سے بڑھ گئی۔

    دوسری طرف جاپان کے ساحل کے قریب سمندر میں موجود جہاز سے مسافروں کا جزوی انخلا عمل میں آیا ہے، 500 کے قریب مسافر کروز شپ میں 14 روز سے قرنطینہ میں موجود تھے، مسافروں کے کرونا وائرس ٹیسٹ منفی آنے پر جانے کی اجازت دی گئی، بحری جہاز پر کُل 3700 افراد سوار تھے، 542 میں وائرس کی تصدیق ہو چکی ہے۔

    مہلک وائرس سے متاثرہ بحری جہاز سے برطانوی شہریوں کی واپسی کا عمل شروع

    خیال رہے کہ جاپان کے شہر ٹوکیو کے قریب یوکوہاما پورٹ پر کرونا وائرس سے متاثرہ بحری جہاز میں پھنسے ہوئے برطانوی بھی وطن لوٹنے لگے ہیں، رپورٹس کے مطابق بحری جہاز ڈائمنڈ پرنسز پر پھنسے برطانویوں کے اس الزام کے بعد کہ فارن آفس نے انھیں بے یار و مددگار چھوڑ دیا ہے، 70 برطانویوں کی واپسی کا عمل شروع کر دیا گیا ہے، جہاز پر آن بورڈ مسافروں میں کرونا وائرس کی تصدیق کے بعد برطانوی شہریوں میں غصہ بڑھ گیا تھا اور وہ حکومت پر شدید تنقید کر رہے تھے۔ اس جہاز پر سے امریکی شہری بھی نکالے جا چکے ہیں۔