لاہور: ملک میں کرونا وائرس کیسز میں کمی کے بعد آنکھوں کے آپریشن کے منتظر مریضوں کی امید بر آئی، لاہور کے اسپتال میں پانچ مریضوں کو آنکھوں کی روشنی مل گئی۔
اے آر وائی نیوز کے مطابق لاہور کے میو اسپتال میں بیرون ملک سے عطیہ شدہ قرنیہ سے ضرورت مند افراد کی پیوند کاری ہوئی ہے، جس سے 5 مریضوں کی آنکھوں میں روشنی لوٹ آئی۔
قرنیہ کی پیوند کاری آئی وارڈ میں پروفیسر اسد اسلم نے کی ہے، سی ای او میو اسپتال کا کہنا ہے کہ آنکھ کی پیوند کاری کے تمام مریضوں کی حالت بہتر ہے۔
پروفیسر اسد اسلم نے اے آر وائی نیوز کو بتایا کہ قرنیہ کی پیوند کاری سے 5 افراد کو آنکھوں کی روشنی مل گئی ہے، گزشتہ 4 مہینوں سے کرونا وائرس کی وجہ سے ان مریضوں کے قرنیہ کے آپریشن رکے ہوئے تھے، اب وبا کم ہونے پر ان کے آپریشن کیے گئے۔
واضح رہے کہ قرنیہ کی پیوند کاری کے مریضوں کے لیے قرنیہ امریکا سے آئی ہیں، جو امریکا میں پاکستانی فزیشن کی ایک تنظیم نے بھجوائیں، پروفیسر اسد اسلم کا کہنا ہے کہ ابتدائی طور پر پانچ قرنیہ آئیں، تاہم مزید بھی آئیں گی اور لوگوں کی بینائی واپس لائی جائے گی۔
