اسلام آباد: وزیر خارجہ شاہ محمود قریشی نے قطر کے ڈپٹی وزیر اعظم اور وزیر خارجہ سے ٹیلی فون پر رابطہ کیا ہے، رابطے میں دو طرفہ تعلقات پر گفتگو کی گئی۔
تفصیلات کے مطابق آج وزیر خارجہ شاہ محمود نے قطر کے ڈپٹی وزیر اعظم اور وزیر خارجہ سے ٹیلی فون پر دونوں ممالک کے باہمی تعلقات پر گفتگو کی۔
گفتگو کے دوران پاک قطر دو طرفہ تعلقات، خطے کی صورت حال اور باہمی دل چسپی کے امور پر تبادلۂ خیال کیا گیا۔
شاہ محمود قریشی نے اے سی ڈی منسٹیریل کانفرنس کے کام یاب انعقاد پر قطری ہم منصب کو مبارک باد دی اور وزیر اعظم عمران خان کی جانب سے امیر قطر کے لیے نیک خواہشات کا پیغام پہنچایا۔
وزیر خارجہ شاہ محمود نے کہا کہ ہم قطر سے دو طرفہ تعلقات مزید مستحکم بنانے کے خواہش مند ہیں۔
یہ بھی پڑھیں: دوحہ:پاک قطرتجارت وسرمایہ کاری کانفرنس، دوطرفہ تجارتی فروغ پر زور
قطری وزیر خارجہ نے گفتگو کرتے ہوئے کہا کہ قطر کی تعمیر و ترقی میں پاکستانیوں کا کردار قابل تحسین ہے۔
یاد رہے کہ گزشتہ ماہ دوحہ میں پاک قطر تجارت و سرمایہ کاری کانفرنس کا انعقاد کیا گیا جس میں دو طرفہ تجارتی سرگرمیوں کے فروغ پر تبادلہ خیال کیا گیا تھا۔
کانفرنس کا انعقاد سرمایہ کاری بورڈ، پاکستانی سفارت خانے اور قطر فنانس سینٹر نے کیا، دنوں ممالک کے معاشی ماہرین نے دو طرفہ تجارتی معاملات کی بہتری اور مضبوطی پر گفتگو کی۔
