ARYNews.tv | Urdu – Har Lamha Bakhabar

Tag: قطر

  • قطر نے بھی رفح میں اسرائیلی بمباری بین الاقوامی قوانین کی خلاف ورزی قرار دے دی

    قطر نے بھی رفح میں اسرائیلی بمباری بین الاقوامی قوانین کی خلاف ورزی قرار دے دی

    دوحہ: قطر نے بھی رفح میں اسرائیلی بمباری بین الاقوامی قوانین کی خلاف ورزی قرار دے دی۔

    اسرائیل اور حماس کے درمیان مذاکرات کے لیے اہم ثالثی کردار ادا کرنے والا ملک قطر بھی اسرائیل کے خلاف بول پڑا ہے، قطر نے رفح میں اسرائیلی بمباری کو بین الاقوامی قوانین کی خطرناک خلاف ورزی قرار دے دیا۔

    قطری وزارت خارجہ نے خدشہ ظاہر کیا ہے کہ رفح پر فضائی حملہ جنگ بندی کے مذاکرات میں رکاوٹ بن سکتا ہے، اسرائیلی بمباری ہماری ثالثی کی جاری کوششوں کو پیچیدہ بنا دے گی۔

    اسرائیل حماس مذاکرات شروع کریں، غزہ کے لوگ زیادہ انتظار نہیں کر سکتے: سعودی عرب

    واضح رہے کہ قطر، امریکا اور مصر کے ساتھ غزہ میں اسرائیل اور حماس کے درمیان جنگ بندی کے معاہدے کے لیے کئی مہینوں سے کوشش میں مصروف ہے۔ قطری وزارت خارجہ نے بین الاقوامی برادری سے مطالبہ کیا کہ وہ اسرائیل کو فلسطینیوں کو بے گھر کرنے کے منصوبوں پر عمل درآمد سے روکنے کے لیے فوری کارروائی کرے۔

    واضح رہے کہ گزشتہ روز اسرائیلی فورسز نے رفح میں بے گھر لوگوں کے خیموں پر جان بوجھ کر بمباری کی، جس سے کم از کم 40 فلسطینی زندہ جل کر شہید ہو گئے، ان میں کئی بچے اور خواتین بھی شامل ہیں۔ متعدد ممالک اور عالمی تنظیموں نے خیموں پر اسرائیلی فضائی حملے کی شدید مذمت کی ہے۔

    فلسطینی ایوان صدر نے پیر کے روز کہا کہ اسرائیل جان بوجھ کر بے گھر لوگوں کو نشانہ بنا رہا ہے، اسرائیلی قابض افواج کی طرف سے اس وحشیانہ قتل عام کا ارتکاب تمام بین الاقوامی قانونی قراردادوں کے لیے ایک چیلنج ہے۔ اقوام متحدہ کی فلسطینی پناہ گزین ایجنسی (UNRWA) نے X پر ایک بیان میں کہا کہ رفح سے ملنے والی تصاویر اس بات کا ایک اور ثبوت ہیں کہ غزہ کو زمین کا جہنم بنا دیا گیا ہے۔

  • امریکا نے حماس سے متعلق قطر کو اہم پیغام پہنچا دیا ؟

    امریکا نے حماس سے متعلق قطر کو اہم پیغام پہنچا دیا ؟

    امریکا کی جانب سے قطر کو یہ پیغام بھیجا گیا ہے کہ حماس اگر بندی مسترد کرے تو اسے ملک بدر کردیا جائے۔

    امریکی اخبار کی رپورٹ کے مطابق ایک امریکی عہدیدار نے بتایا کہ امریکی سیکریٹری خارجہ انٹونی بلنکن نے یہ پیغام قطری وزیراعظم کو پہنچادیا ہے۔

    دوسری جانب حماس کے رہنما نے اسرائیلی وزیراعظم نیتن یاہو کو جنگ بندی مذاکرات میں رکاوٹ قرار دیا ہے۔

    حسام بدران نے اسرائیلی وزیراعظم پر ایسے بیانات جاری کرنے کا الزام لگایا ہے جس کا مقصد جنگ بندی کے امکانات کو نقصان پہنچانا ہے۔

    حماس کے اعلیٰ عہدیدار نے اے ایف پی کو بتایا کہ گروپ اپنی قیادت کے اندر اور اتحادی گروپوں کے ساتھ داخلی بات چیت کرنے کے عمل میں ہے اس سے پہلے کہ مذاکرات کاروں کے قاہرہ واپسی کے لیے جنگ بندی کے لیے مذاکرات جاری رکھے۔

    لیکن انہوں نے خبردار کیا کہ بنجمن نیتن یاہو کے بار بار بیانات جس میں وہ رفح میں افواج بھیجیں گے کا اعلان کر رہے ہیں معاہدے پر پہنچنے کے کسی بھی امکان کو ناکام بنانے کے لیے ہے۔

    خلائی جنگ کا خطرہ، امریکی رکن کانگریس کا اہم بیان

    انہوں نے ایک ٹیلی فون انٹرویو میں کہا کہ نیتن یاہو مذاکرات کے تمام پچھلے دوروں اور پچھلے مذاکرات میں رکاوٹ تھے اور یہ واضح ہے کہ وہ اب بھی ہیں، وہ کسی معاہدے تک پہنچنے میں دلچسپی نہیں رکھتا، اور اس لیے وہ ان موجودہ کوششوں کو ناکام بنانے کے لیے میڈیا میں بیان دیتا رہتا ہے۔

  • قطر جانے والوں کے لیے خوش خبری

    قطر جانے والوں کے لیے خوش خبری

    قطر جانے والوں ہنرمندوں اور کاروباری افراد کے لیے خوش خبری ہے کہ قطری حکومت نے نئے ریزیڈنس پرمٹ پروگرام کا اعلان کیا ہے۔

    نئے ویزا پروگرام کے تحت ہنرمند اور کاروباری افراد 5 سال کی طویل مدت کے لیے قطر میں کام اور رہائش اختیار کر سکیں گے، ویزا رینیول کی سہولت بھی دستیاب ہوگی۔

    نئے رہائشی ویزا پروگرام سے غیر ملکیوں کو قطر میں طویل مدتی استحکام اور سرمایہ کاری کے مواقع فراہم ہوں گے، قطری حکومت کے اس پروگرام سے باصلاحیت اور کاروباری افراد کو راغب کیا جا رہا ہے۔ اس نئے قطری ویزا پروگرام کی درخواستیں اگلے چند ماہ میں کھلنے کی توقع کی جا رہی ہے۔

    ٹیلنٹ کے لیے اہلیت: درخواست دہندہ کو فنون، کھیل، تعلیم، سائنسی تحقیق، ترقی یا اختراع سمیت 13 منظور شدہ شعبوں میں سے کسی ایک میں مہارت حاصل ہو، اور اس کے لیے متعلقہ حکومتی اتھارٹی سے توثیق حاصل کرنا ضروری ہے۔

    درخواست دہندہ کو قطر میں کسی آجر کے ساتھ ملازمت کی پیشکش یا ملازمت کا معاہدہ کرنا ضروری ہے، اور کم از کم 36 ہزار 500 کے قطری ریال (تقریباً 10 ہزار 27 امریکی ڈالر) کی مالیت پر مبنی ہو۔

    کاروباری کے لیے اہلیت: درخواست دہندہ کے پاس قطر میں سرمایہ کاری کے لیے ایک کاروباری منصوبہ ہونا چاہیے، جس کی توثیق ملک کے مجاز کاروباری اداروں میں سے کسی ایک نے کی ہو، بشمول قطر سائنس اینڈ ٹیکنالوجی پارک اور قطر فنٹیک حب۔

    سرمایہ کاری کی قیمت کم از کم 2 لاکھ 50 ہزار قطری ریال ہونی چاہیے۔

  • غزہ جنگ بندی معاہدے سے متعلق قطر کا تشویش ناک بیان

    غزہ جنگ بندی معاہدے سے متعلق قطر کا تشویش ناک بیان

    دوحہ: قطر نے کہا ہے کہ اسرائیل اور حماس غزہ جنگ بندی پر کسی ’معاہدے کے قریب نہیں ہیں۔‘

    الجزیرہ کے مطابق اسرائیل اور حماس کے درمیان غزہ میں جنگ بند کرنے کے سلسلے میں ثالثی کا کردار ادا کرنے والے ملک قطر نے تشویش ناک بیان میں خبردار کیا ہے کہ صورت حال ’’انتہائی پیچیدہ‘‘ ہے۔

    قطر نے کہا کہ اسرائیل اور حماس غزہ میں لڑائی روکنے اور قیدیوں کو آزاد کرنے کے معاہدے کے قریب نہیں ہیں۔

    قطری وزارت خارجہ کے ترجمان ماجد الانصاری نے کہا ’’ہم کسی معاہدے کے قریب نہیں ہیں، مطلب یہ کہ فریقین ایسی زبان استعمال ہی نہیں کر رہے ہیں جس سے موجودہ اختلاف دور ہو اور معاہدے کا اطلاق ممکن ہو سکے۔‘‘

    الانصاری نے ایک نیوز کانفرنس میں بتایا کہ اس کے باوجود تمام فریق مذاکرات جاری کرنے کے لیے کوشش کر رہے ہیں، اس امید کے ساتھ کہ رمضان ہی میں کسی معاہدے پر پہنچا جا سکے۔

    مسلمانوں نے اسرائیلی کھجوروں کا بائیکاٹ کر دیا

    واضح رہے کہ امریکی، قطری اور مصری ثالثوں پر مشتمل ہفتوں کی بات چیت کے باوجود، پیر کو مسلمانوں کا مقدس مہینہ رمضان کا آغاز بغیر کسی جنگ بندی معاہدے کے ساتھ ہو گیا ہے، ثالثوں کی کوشش تھی کہ رمضان سے قبل جنگ بندی اور قیدیوں کا تبادلہ عمل میں آ جائے۔

  • قطر نے سزائے موت پانے والے 8 بھارتی جاسوسوں کو رہا کر دیا

    قطر نے سزائے موت پانے والے 8 بھارتی جاسوسوں کو رہا کر دیا

    دوحہ: قطر نے اسرائیل کے لیے جاسوسی کے الزام میں جیل میں بند بھارتی بحریہ کے 8 سابق اہلکاروں کو رہا کر دیا، ان افسران کو سزائے موت سنائی گئی تھی۔

    تفصیلات کے مطابق قطر نے جاسوسی کے الزام میں جیل میں بند بھارتی بحریہ کے 8 سابق اہلکاروں کو رہا کر دیا، سابق افسران واپس بھارت پہنچ گئے۔

    قطر کی انٹیلیجنس تحقیقاتی ایجنسی نے 2022 میں بھارتی بحریہ کے آٹھ ریٹائرڈ افسران کو جاسوسی کے الزام میں گرفتار کیا تھا، ان افراد پر اسرائیل کے لیے جاسوسی کا الزام عائد کیا گیا تھا، تاہم قطری عدالت نے غیر واضح الزامات کے تحت سزائے موت پانے والے بھارتی افسروں کو رہا کرنے کا حکم سنایا ہے۔

    سزا پانے والے تمام افراد دوحہ میں قائم ’الظاہرہ العالمی کنسلٹینسی اینڈ سروسز‘ کے لیے کام کرتے تھے، یہ کمپنی قطر کی بحریہ کو تربیت اور ساز و سامان فراہم کرتی ہے۔

    بھارتی جاسوسوں کی رہائی اس وقت سامنے آئی ہے جب بھارت اور قطر نے 78 ارب ڈالر کے ایک اہم معاہدے پر دستخط کیے ہیں، گزشتہ ہفتے دستخط کیے جانے والے معاہدے کے مطابق بھارت 2048 تک قطر سے مائع قدرتی گیس خریدے گا۔

  • غزہ میں عارضی جنگ بندی کی تجویز حماس تک پہنچائیں گے: قطر

    غزہ میں عارضی جنگ بندی کی تجویز حماس تک پہنچائیں گے: قطر

    دوحہ: قطر نے کہا ہے کہ غزہ میں عارضی جنگ بندی سے متعلق معاہدے میں مثبت پیش رفت متوقع ہے، تجویز حماس تک پہنچائیں گے۔

    تفصیلات کے مطابق غزہ میں جنگ بندی اور یرغمالیوں کی رہائی کے لیے کوششیں ایک بار پھر تیز ہو گئیں، امریکا میں موجود قطری وزیر اعظم کا کہنا ہے کہ جنگ بندی سے متعلق معاہدے میں مثبت پیش رفت متوقع ہے۔

    انھوں ںے کہا فرانس میں مصر، اسرائیل اور امریکا کے انٹیلی جنس چیفس کی ملاقاتیں ہوئی ہیں، جس میں جنگ بندی اور یرغمالیوں کی رہائی کے لیے ممکنہ معاہدے پر تجاویز پیش کی گئی ہیں، ان تجاویز کو حماس تک پہنچائیں گے تاکہ مثبت اور تعمیری پیش رفت ہو سکے۔

    غزہ کے رہائشی علاقوں میں اسرائیل کی بمباری، مزید 215 فلسطینی شہید

    محمد بن عبدالرحمان بن جاسم الثانی نے امریکی سیکریٹری خارجہ سے ملاقا ت بھی کی ہے، پیر کو انھوں نے کہا غزہ کی لڑائی کو روکنے اور یرغمالیوں کی رہائی کے لیے ایک فریم ورک تشکیل دیا گیا ہے جسے حماس تک پہنچایا جائے گا۔

    ’اسرائیل کی غزہ میں واپسی‘ نامی شرمناک کانفرنس میں یہودی بستیوں کا نقشہ پیش، امریکا و فرانس کی مذمت

    واضح رہے کہ حماس نے کسی بھی معاہدے سے پہلے جنگ بندی کا مطالبہ کیا ہے، نیز بے آسرا فلسطینیوں کے لیے اقوام متحدہ کے امدادی ادارے کے فنڈز کی معطلی کا معاملہ بھی ان دنوں زور و شور سے اٹھا ہوا ہے۔

  • مشرقِ وسطیٰ میں کشیدگی کم کرانے کا مشن، امریکی وزیرِ خارجہ قطر پہنچ گئے

    مشرقِ وسطیٰ میں کشیدگی کم کرانے کا مشن، امریکی وزیرِ خارجہ قطر پہنچ گئے

    امریکی وزیرِ خارجہ انٹونی بلنکن مشرقِ وسطی میں کشیدگی کم کرانے کے لیے متحرک ہوگئے، اردن کے بعد قطر پہنچ گئے۔

    امریکی وزیر خارجہ انٹونی بلنکن نے قطری امیر شیخ تمیم بن حمد آل ثانی سے ملاقات کی، ملاقات میں خطے کی حالیہ صورت حال پر تبادلہ خیال کیا گیا۔

    مشترکہ پریس کانفرنس میں قطری وزیرِ اعظم محمد بن عبد الرحمان بن جاسم نے کہا کہ غزہ کی صورتحال انسانیت کا سنگین امتحان ہے۔

    انٹونی بلنکن نے غزہ سے فلسطینیوں کی جبری منتقلی کی مخالفت کرتے ہوئے کہا کہ غزہ میں جنگ بندی اور یرغمالیوں کی رہائی پر گفتگو ہوئی ہے، ثالثی کی کوشیشیں جاری رکھے ہوئے ہیں۔

    انٹونی بلنکن نے کہا کہ امریکا نہیں چاہتا کہ نہتے شہریوں کو نشانہ بنایا جائے، شہریوں تک امداد کی فراہمی یقینی بنانے چاہیے۔

    انٹونی بلنکن نے کہا کہ  آج اسرائیلی حکام سے بات کریں گے۔

    اس سے قبل انٹونی بلنکن نے اردن میں شاہ عبداللہ سے ملاقات کی تھی، ملاقات میں شاہ عبداللہ نے انہیں غزہ میں جنگ جاری رہنے کے ’تباہ کن نتائج‘ سے خبردار کیا اور فوری جنگ بندی کا مطالبہ کیا۔

    امریکی وزیر کارجہ نے گزشتہ روز استنبول میں ترک صدر اردوان اور ترک ہم منصب سے بھی ملاقات کرکے علاقائی صورتِ حال اور باہمی دلچسپی کے امور پر تبادلہ خیال کیا تھا۔

  • قطر نے اسرائیل اور حماس کے درمیان جنگ میں وقفے کااعلان کردیا

    قطر نے اسرائیل اور حماس کے درمیان جنگ میں وقفے کااعلان کردیا

    قطر کی جانب سے اسرائیل اور حماس کے درمیان جنگ میں وقفے کااعلان کر دیا گیا ہے، آج صبح اسرائیلی کابینہ نے جنگ میں وقفے کی منظوری دی تھی۔

    غیر ملکی ذرائع ابلاغ کے مطابق انسانی بنیادوں پر جنگ میں وقفہ کیا جائے گا، جنگ میں وقفے کا آغاز 24 گھنٹے کے اندر ہوگا۔

    قطر وزارت خارجہ کا کہنا ہے کہ معاہدے کے تحت درجنوں فلسطینی اور اسرائیلی قیدیوں کاتبادلہ ہوگا،جبکہ 4 دن تک جنگ میں وقفہ کیا جائے گا۔

    واضح رہے کہ اسرائیلی کابینہ نے حماس کیساتھ عارضی جنگ بندی کے معاہدے کی منظوری دے دی ہے، جس کے تحت درجنوں فلسطینی اوراسرائیلی قیدیوں کا تبادلہ کیا جائے گا۔

    امریکی خبر رساں ایجنسی نے بتایا کہ معاہدے کے مطابق 6 ہفتے سے جاری جنگ کو عارضی طور پر بندکردیا جائے گا، حماس 50 اسرائیلی قیدیوں کو رہا کریگی۔

    اسرائیلی حکومت کا کہنا ہے کہ 10 اسرائیلی قیدی کے بدلے جنگ بندی میں ایک دن کا اضافہ کیا جائے گا، پہلے خواتین اور بچوں کو رہا کیا جائے گا۔

    غزہ میں اسرائیلی مظالم جاری، شہداء کی تعداد 14 ہزار 128 تک پہنچ گئی

    اسرائیلی وزیراعظم نیتن یاہو نے کہا ہے کہ جنگ بندی کی مدت ختم ہونے پرحماس پرحملے کیے جائیں گے، ہم حالت جنگ میں ہیں، جو مقاصد کے حصول تک جاری رہے گی۔

  • قطر کے سرکاری پورٹل پر بھارتی ہیکرز کے سائبر حملے

    قطر کے سرکاری پورٹل پر بھارتی ہیکرز کے سائبر حملے

    قطر: بھارتی ہیکرز کی سائبر دہشت گردی کا سلسلہ جاری ہے، قطر کے سرکاری پورٹل پر بھارتی ہیکرز کے سائبر حملے ہونے لگے۔

    غیر ملکی میڈیا رپورٹس کے مطابق بھارتی ہیکرز مختلف ملکوں پر جاسوسی اور دہشت گردی کی مد میں سائبر حملوں میں ملوث ہیں، جس پر عالمی سطح پر بھارتی ہیکرز اکاؤنٹس پر پابندی لگانے کا مطالبہ سامنے آ رہا ہے۔

    بھارت سائبر حملوں سے دوسرے ملکوں کی حساس معلومات کو اپنے مذموم ارادوں کے لیے استعمال کرتا ہے، بھارتی ہیکرز نے کینیڈا اور فلسطین کے اکاؤنٹس پر بھی سائبر حملے کیے۔

    اکتوبر 2023 کو بھارت کے بحریہ کے سابق افسران کو قطر میں اسرائیل کے لیے جاسوسی کے الزام میں سزائے موت دی گئی تھی، جس کے بعد قطر پر سائبر حملے تیز کر دیے گئے۔

    قطر کے سرکاری پورٹل پر ہندوستان کا سائبر حملہ 2 گھنٹے تک جاری رہا، اس سے قبل اسی ہیکر گروپ نے کینیڈا کی سرکاری ویب سائٹس اور فلسطینی ویب سائٹس کو نشانہ بنانے کا بھی دعویٰ کیا تھا۔

    عالمی سطح پر بھارتی ہیکرز اور منفی پروپیگنڈا پھیلانے والے سوشل میڈیا اکاؤنٹس پر پابندی کا مطالبہ کیا جا رہا ہے۔

  • قطر: سنگین جرم میں ملوث ایشیائی باشندہ گرفتار

    قطر: سنگین جرم میں ملوث ایشیائی باشندہ گرفتار

    ایشیائی شہریت کے ایک شخص کو جنرل ڈائریکٹوریٹ آف کریمنل انویسٹی گیشن کے کرمنل انویسٹی گیشن ڈپارٹمنٹ (سی آئی ڈی) نے متعدد سرکاری دستاویزات کی جعلسازی کے الزام میں حراست میں لے لیا ہے۔

    غیر ملکی ذرائع ابلاغ کے مطابق زیربحث دستاویزات میں سے کچھ شناختی کارڈز، لیز، بینک اسٹیٹمنٹس، سرٹیفکیٹس اور تنخواہ کے گوشوارے ہیں۔

    سی آئی ڈی کے مطابق ضبط شدہ اشیاء کے ساتھ لوگوں کو اس سلسلے میں مناسب قانونی اقدامات کرنے کے لیے اقتصادی اور الیکٹرانک جرائم سے نمٹنے کے محکمے کے حوالے کیا جائے گا۔

    کم از کم 51 افراد جنہوں نے پیسوں کے عوض ملزمان سے ڈیل کی تھی، ان کو طلب کیا گیا اور ملزم کو حراست میں لیا گیا۔

    دوسری جانب قطر میں دوران ڈرائیونگ موبائل استعمال کرنے والے والوں کے بری سامنے آگئی، ریڈار سسٹم کے ذریعے چیک کیا جائے گا اور دوران ڈرائیورنگ موبائل فون استعمال کرنے والوں سے کوئی رعایت نہیں برتی جائے گی۔

    جنرل ٹریفک ڈپارٹمنٹ کے افسر کیپٹن محمد ربیعہ الکواری نے ڈرائیونگ کے دوران سیٹ بیلٹ نہ باندھنے اور موبائل فون استعمال کرنے کے واقعات کی نشاندہی کے لیے خودکار نگرانی کے فعال ہونے کی تصدیق کی ہے۔

    کیپٹن الکواری نے قطر ریڈیو کے ساتھ ایک انٹرویو کے دوران انکشاف کیا کہ نیا ریڈار سسٹم بیک وقت تین خلاف ورزیوں کا پتہ لگانے کی صلاحیت رکھتا ہے: سیٹ بیلٹ استعمال کرنے میں ناکامی، موبائل فون کا استعمال اور تیز رفتاری۔