واشنگٹن : امریکی محکمہ خارجہ نے امریکی ویزے جاری کرنے سے متعلق بیان میں کہا ہے کہ امریکی ویزا ہولڈرز تمام قوانین پر لازمی عمل کریں بصورت دیگر انہیں ملک بدر کردیا جائے گا۔
اس حوالے سے امریکی محکمہ خارجہ نے اپنے بیان میں ویزا ہولڈرز کو متنبہ کیا ہے کہ ویزا جاری ہونے کا ہرگز یہ مطلب یہ نہیں کہ جانچ پڑتال ختم ہوگئی۔
ترجمان کا کہنا ہے کہ امریکی ویزا رکھنے والوں کی مسلسل جانچ پڑتال کرتے ہیں، جس کا مقصد اس بات کو یقینی بنانا ہے کہ ویزا ہولڈرز امریکی قوانین اور امیگریشن قوانین پر مکمل عمل کریں۔
محکمہ خارجہ کے بیان کے مطابق امریکی قوانین پر عمل نہ کرنے والے ویزا ہولڈرز کے ویزے منسوخ کرکے انہیں ملک بدر کردیا جائے گا۔
قبل ازیں امریکی صدر ٹرمپ نے گزشتہ ہفتے ’گولڈ کارڈ‘ نامی امیگریشن اسکیم متعارف کرائی ہے جس کا مقصد غیر ملکی سرمایہ کاروں کو راغب کرنا ہے۔
رپورٹ کے مطابق اس اسکیم کے تحت 5 ملین ڈالر کی خطیر رقم کے عوض دولت مند غیر ملکی افراد امریکی شہریت بھی حاصل کرسکیں گے۔
صدر ٹرمپ کی جانب سے یہ اقدام موجودہ ای بی فائیو ویزا پروگرام کو تبدیل کرنے کے لیے تیار کیا گیا ہے، جس پر دھوکہ دہی اور غلط استعمال کے الزامات لگتے رہے ہیں۔،
مزید پڑھیں : امریکی قونصلیٹ کی شکایت پر جعلی دستاویزات تیار کرنے والا ملزم گرفتار
یاد رہے کہ گزشتہ ماہ امریکی قونصلیٹ کی شکایت پر کراچی میں جعلی دستاویزات کی تیاری میں ملوث ایک ملزم کی گرفتاری عمل میں لائی گئی تھی۔
ایف آئی اے اینٹی ہیومن ٹریفکنگ سرکل کراچی نے ایک کارروائی میں جعلی دستاویزات کی تیاری میں ملوث ملزم محمد مشتاق راجپوت کو گرفتار کیا تھا۔
ملزم کو خفیہ اطلاع پر چھاپہ مار کارروائی کے بعد گرفتار کیا گیا تھا، ابتدائی تفتیش کے مطابق ملزم نے ایک شہری کو 2 لاکھ روپے روپے کے عوض جعلی اپوائنٹمنٹ لیٹر جاری کیا تھا۔
