Tag: قومی ٹیم

پاکستان کرکٹ بورڈ نے قومی ٹیم کے کوچ کے انتخاب کے لئے چار رکنی کوچ سلیکشن کمیٹی کا اعلان کر دیا ہے۔

ڈیو واٹمور کے دو سال کا عرصہ پورا ہونے کے بعد قومی کرکٹ ٹیم کے لئے نیا کوچ لانے کی تیاریاں کی جارہی ہے, جس کے لئے پی سی بی نے سابق کرکٹر پر مشتمل چار رکنی کمیٹی بنادی ہے۔

کوچ سلیکشن کمیٹی میں جاوید میانداد، انتخاب عالم، وسیم اکرم اور پی سی بی کے چیف آپریٹنگ آفیسر سبحان احمد شامل ہیں۔

پی سی بی کی جانب سے قومی کرکٹ ٹیم کی کوچنگ کے امیدواروں کو درخواستیں جمع کرانے کے لئے چھ فروری تک کا وقت دیا گیا ہے، جس کے بعد کوچ سلیکشن کمیٹی قومی ٹیم کے کوچ کا انتخاب کرے گی۔

بنگلہ دیش میں آئندہ ماہ ایشیا کپ اورمارچ میں ورلڈ ٹی ٹوئنٹی شیڈول ہے۔ لیکن وہاں کے خراب حالات اور پاکستان مخالف جذبات کو دیکھتے ہوئے قومی ٹیم کا بنگلہ دیش جانا کسی خطرے سے کم نہیں۔ بنگلہ دیش میں گزشتہ دنوں پاکستانی قونصل خانے کا گھیراؤ بھی کیا گیا۔

اب تک ہونے والے پرتشدد واقعات میں سینکڑوں افراد ہلاک ہوچکے ہیں۔ دہشت گر د واقعات اور بم دھماکوں کے سبب ویسٹ انڈیز پہلے ہی اپنی انڈر نائنٹین ٹیم بنگلہ دیش سے واپس بلاچکا ہے۔ اب تو بنگلہ دیش کے ڈومیسٹک ایونٹ بھی سیکیورٹی وجوہات کے سبب منسوخ ہوچکے ہیں۔

ایسی صورتحال میں پاکستان کا بنگلہ دیش جانا درست نہیں ہوگا۔ ایسے میں ایشین کرکٹ کونسل کا ایونٹ کو بنگلہ دیش سے منتقل نہ کرنا سمجھ سے بالاتر ہے۔ آئی سی سی کے سابق سربراہ احسان مانی نے پی سی بی کو ایشیا کپ سے دستبردار ہونے کا مشورہ دیا ہے۔

ان کا کہنا ہے کہ کھلاڑیوں کے زندگیوں کو خطرے میں ڈالنا مناسب نہیں ہوگا۔ دوسری جانب دفتر خارجہ کی ترجمان تسنیم اسلم نے کہا ہے کہ ایشیا کپ اور ورلڈ ٹی ٹوئنٹی میں پاکستان کرکٹ ٹیم کو بنگلہ دیش بھیجنے کے حوالے سے پی سی بی نے کوئی رابطہ نہیں کیا، بنگلہ دیش کے حوالے سے پی سی بی نے مشورہ کیا تو فیصلہ کریں گے۔

پاکستان شاہین ایک مرتبہ پھر آج لنکا ڈھانے کے لئے میدان میں اتریں گے، لیکن اس بار ان کا مقابلہ شارجہ میں نہیں بلکہ ابوظہبی میں ہوگا۔

پاکستان نے شارجہ میں لنکا ڈھائی اور سیریز میں دو ایک کی برتری پائی، اب ابوظہبی میں پنجہ آزمائی ہوگی، پاکستانی ٹیم سیریز کو ابوظہبی کے شیخ زید اسٹیڈیم میں ہی فیصلہ کن بنانے کے لئے پرعزم ہیں۔ عمر گل کی واپسی سے پاکستان کی بولنگ لائن مضبوط ہوئی ہے۔

ادھر کافی عرصے سے نہ چلنے والی بیٹنگ لائن بھی کلک کرچکی ہے، محمد حفیظ کے بلے نے رنز اگلنا شروع کردیئے ہیں، چوتھے میچ کے لئے قومی ٹیم میں کسی بھی تبدیلی کا امکان نہیں ہے۔

دوسری جانب سری لنکن کپتان اینجلو میتھیوز کا کہنا ہے کہ سیریز میں کم بیک کے لئے کھلاڑیوں کو غیر معمولی کارکردگی دکھانا ہوگی، پاکستان اور سری لنکا دو سال بعد ابوظہبی میں آمنے سامنے ہوں گے، اس سے قبل دونوں ٹیمیں نومبر دوہزار گیارہ میں مدمقابل آئیں تھیں، جس میں پاکستان تین وکٹوں سے کامیاب رہا۔