Tag: قومی احتساب بیورو

اسلام آباد: جعلی اکاؤنٹس کیس میں گرفتار سندھ بینک کے صدر، ڈائریکٹر اور سینئر افسر کو آج اسلام آباد منتقل کر دیا گیا ہے۔

تفصیلات کے مطابق جعلی اکاؤنٹس کیس میں ڈائریکٹر سندھ بینک بلال شیخ، بینک کے صدر طارق احسن اور ندیم الطاف کو اسلام آباد منتقل کر دیا گیا۔

تینوں ملزمان کو کل احتساب عدالت میں پیش کیا جائے گا جہاں نیب عدالت سے تینوں ملزمان کے جسمانی ریمانڈ کی استدعا کرے گا۔

نیب نے ملزمان کو جعلی اکاؤنٹس کیس میں گرفتار کر رکھا ہے، ذرایع نیب کا کہنا ہے کہ ملزمان نے اومنی گروپ کی کمپنیوں کو ایک ارب 80 کروڑ کے غیر قانونی قرضے دلوائے۔

یہ بھی پڑھیں:  جعلی اکاؤنٹس کیس : نیب نے کراچی اور لاہور سے تین بینکرز کو گرفتار کرلیا

نیب ذرایع کا کہنا ہے کہ بلال شیخ جعلی بینک اکاؤنٹس کو رقوم کی فراہمی کا اہم کردار ہے، مذکورہ ملزم اس وقت سندھ بینک کے بورڈ آف ڈائریکٹرز میں بھی شامل ہے۔

ملزمان کو کراچی سے اسلام آباد منتقل کیا گیا، نیب راولپنڈی نے تینوں بینکرز کو کراچی اور لاہور میں چھاپے مار کر 10 جولائی کو گرفتار کیا تھا۔

خیال رہے جعلی بینک اکاؤنٹس کیس میں اسلام آباد ہائی کورٹ نے سابق صدر آصف زرداری اور فریال تالپور کی درخواست ضمانت مسترد کر دی تھی اور گرفتار کرنے کا حکم دیا تھا، جس کے بعد نیب ٹیم نے سابق صدر آصف زرداری کو بلاول ہاؤس سے گرفتار کر لیا تھا۔

اسلام آباد: سابق صدر آصف علی زرداری کی ہم شیرہ اور جعلی اکاؤنٹس کیس میں گرفتار فریال تالپور کو اسلام منتقل کر دیا گیا ہے۔

تفصیلات کے مطابق نیب ذرایع کا کہنا ہے کہ فریال تالپور کو آج کراچی سے اسلام آباد منتقل کر دیا گیا ہے، کل فریال تالپور کو احتساب عدالت میں پیش کیا جائے گا۔

ذرایع کا کہنا ہے کہ احتساب عدالت سے فریال تالپور کے مزید ریمانڈ کی استدعا کی جائے گی۔

یاد رہے کہ گزشتہ ماہ 24 جون کو فریال تالپور کو اسپیکر سندھ اسمبلی کی جانب سے پروڈکشن آرڈر جاری کرنے کے بعد سندھ اسمبلی کے اجلاس میں شرکت کے لیے کراچی منتقل کیا گیا تھا۔

کراچی منتقلی پر فریال تالپور کو خیابان شمشیر فیز 8 میں واقع ان کے گھر میں رکھا گیا اور گھر کو سب جیل قرار دے دیا گیا تھا، بجٹ کی منظوری تک فریال تالپور کو سندھ اسمبلی لایا جاتا رہا۔

یہ بھی پڑھیں:  جعلی اکاؤنٹس کیس: فریال تالپور کے جسمانی ریمانڈ میں 8 جولائی تک توسیع

چوبیس جون کو فریال تالپور کو جعلی اکاؤنٹس کیس میں احتساب عدالت میں بھی پیش کیا گیا تھا، جہاں عدالت نے ان کا 14 روزہ جسمانی ریمانڈ منظور کرتے ہوئے ریمانڈ میں 8 جولائی تک توسیع کر دی تھی۔

یاد رہے 10 جون کو جعلی بینک اکاؤنٹس کیس میں اسلام آباد ہائی کورٹ نے سابق صدر آصف زرداری اور فریال تالپور کی درخواست ضمانت مسترد کردی تھی اور گرفتار کرنے کا حکم دیا تھا، جس کے بعد 14 جون کو فریال تالپور کو جعلی اکاؤنٹس کیس میں نیب نے گرفتار کیا اور ان کی رہایش گاہ کو سب جیل قرار دے دیا۔

لاہور: قومی احتساب بیورو (نیب) نے اثاثہ جات کیس میں اپوزیشن لیڈر میاں شہباز شریف کو 5 جولائی کو طلب کر لیا۔

تفصیلات کے مطابق نیب ذرایع نے بتایا ہے کہ شہباز شریف کو اثاثہ جات کیس میں پانچ جولائی کو طلب کر لیا گیا ہے، شہباز شریف کو مطلوبہ دستاویزات ساتھ لانے کی بھی ہدایت کی گئی ہے۔

اس سے قبل نیب صاف پانی اور آشیانہ اقبال کرپشن کیس میں بھی شہباز شریف کو طلب کر چکا ہے۔

خیال رہے کہ شہباز شریف اور ان کے صاحب زادوں حمزہ اور سلمان کے آمدن سے زائد اثاثوں کے کیس میں اہم پیش رفت ہو چکی ہے، زیر حراست ملزم شاہد شفیق کے انکشافات پر مبینہ منی لانڈرنگ میں ملوث ملزم آفتاب محمود کو گرفتار کیا گیا۔

یہ بھی پڑھیں:  کمپنی کرپشن کیس، شہباز شریف آج نیب میں پیش ہوں گے

ملزم پر شریف فیملی کے لیے مبینہ منی لانڈرنگ کا الزام ہے، موصولہ اطلاعات کے مطابق ملزمان کروڑوں روپے شریف فیملی کے اکاؤنٹس میں منتقل کرتے رہے۔

پچھلی بار نیب نے شریف فیملی کے خلاف آمدن سے زائد اثاثہ جات کیس میں شہباز شریف کے پورے خاندان کو بیان کے لیے طلب کیا تھا۔

لیگی صدر کو نیب لاہور نے 13 مئی کو لاہور ویسٹ مینجمنٹ کمپنی کرپشن کیس میں پیش ہونے کی ہدایت کی تھی، لیکن شہباز شریف بیرون ملک ہونے کی وجہ سے پیش نہیں ہوئے تھے۔

اسلام آباد: نیب کی حراست میں موجود فریال تالپور کا طبی معائنہ مکمل کرلیا گیا، میڈیکل بورڈ نے انہیں میڈیکلی فٹ قرار دے دیا۔

تفصیلات کے مطابق قومی احتساب بیورو (نیب) کی حراست میں موجود آصف زرداری کی ہمشیرہ فریال تالپور کا طبی معائنہ مکمل کرلیا گیا، میڈیکل بورڈ نے فریال تالپور کو میڈیکلی فٹ قرار دے دیا۔

ذرائع کے مطابق فریال تالپور کا طبی معائنہ ڈاکٹر امتیاز احمد، ڈاکٹر سویدہ نے کیا، ڈاکٹرز نے ان کا شوگر، بلڈ پریشر ٹیسٹ کیا۔

فریال تالپور کا بلڈ پریشر 80/140، شوگر لیول 160 ہے، طبی معائنہ کی رپورٹ نیب حکام کے حوالے کردی گئی۔

نیب حکام کی جانب سے فریال تالپور کی میڈیکل رپورٹ کل عدالت میں پیش کی جائے گی۔

مزید پڑھیں: جعلی اکاؤنٹس کیس: نیب نے فریال تالپورکوگرفتارکرلیا

واضح رہے کہ جعلی اکاؤنٹس کیس میں پاکستان پیپلزپارٹی کی رہنما فریال تالپور کو نیب نے آج گرفتار کیا ہے، ان کی رہائش گاہ کو سب جیل قرار دے دیا گیا ہے۔

یاد رہے کہ دو روز قبل احتساب عدالت نے اسی جعلی اکاؤنٹ کیس میں گرفتار سابق صدر آصف علی زرداری کو 21 جون تک جسمانی ریمانڈ پر نیب کے حوالے کیا ہے، نیب نے زرداری کے 14روزہ جسمانی ریمانڈ کی استدعا کی تھی۔ اس کیس میں آصف زرداری،فریال تالپورکی عبوری ضمانت میں 6 بار توسیع کی جا چکی تھی۔

آصف زرداری اور فریال تالپور پر جعلی اکاؤنٹس کے ذریعے غیر قانونی طریقے سے رقم منتقلی کا الزام ہے، اس ضمن میں منی لانڈرنگ کیس احتساب عدالت میں زیر التوا ہے۔

راولپنڈی: نیب نے ایس ایس جی سی ایل کے خلاف موصول شکایت کی تصدیق کر لی، گیس کمپنی کے بد عنوان افسران کے خلاف نیب کا گھیرا تنگ ہو گیا۔

تفصیلات کے مطابق چیئرمین نیب سے سوئی سدرن گیس کمپنی کے بد عنوان افسران کے خلاف کارروائی کی اجازت طلب کر لی گئی۔

نیب ذرایع کا کہنا ہے کہ ایس ایس جی سی کے بعض افسران نے اختیارات کا غلط فائدہ اٹھایا، ڈینم انٹرنیشنل اور آغا اسٹیل تک غیر قانونی گیس لائن پہنچائی گئی۔

ذرایع نے بتایا کہ سوئی سدرن گیس کمپنی کی غفلت کی وجہ سے سرکاری خزانے کو نقصان پہنچا، دونوں انڈسٹریز تک کروڑوں کی گیس غیر قانونی پہنچائی جاتی رہی۔

دریں اثنا، چیئرمین نیب کی زیر صدارت ایگزیکٹو بورڈ کا اجلاس منعقد ہوا، اجلاس میں بد عنوانی کے 4 ریفرنسز دائر کرنے کی منظوری دی گئی۔

سابق صدر بینک آف پنجاب کے خلاف ریفرنسز، زرداری گروپ آف پرائیویٹ لمیٹڈ کے خلاف ایک اور ریفرنس، سیکریٹری کراچی ٹرسٹ اینڈ پورٹ ویلفیئر گلاب خان کے خلاف ریفرنس اور سابق ڈی جی ایس بی سی اے منظور قادر کے خلاف ریفرنس کی منظوری دی گئی۔

اجلاس میں سابق سی ای او زرعی ترقیاتی بینک سید طلعت محمود کے خلاف انکوائری، رکن قومی اسمبلی ناصر اقبال بوسال کے خلاف انکوائری اور امداد بوسال سابق سیکریٹری ٹو وزیر اعلیٰ پنجاب کے خلاف انکوائری کی منظوری دی گئی۔