Tag: قومی اسمبلی کا افتتاحی اجلاس

اسلام آباد :قومی اسمبلی کے افتتاحی اجلاس کے دوران مسلم لیگ ن کے قائد نواز شریف پر ایک نامعلوم شخص نے بوتل پھینک دی۔

تفصیلات کے مطابق قومی اسمبلی کے افتتاحی اجلاس کے دوران مسلم لیگ ن کے قائد نواز شریف کی جانب بوتل اچھالی گئی۔

رول آف ممبرز کے دستخط کے دوران نواز شریف پر بوتل پھینکی گئی تاہم خوش قسمتی سے اچھالی گئی بوتل نوازشریف کے اوپر سے گزر گئی۔

اس سے قبل قومی اسمبلی کا اجلاس ہنگامہ آرائی سے شروع ہوا،ن لیگ اور سنی اتحاد کونسل کے ممبران اسپیکر ڈائس کے پاس آمنے سامنے آگئے۔

لیگی ارکان کی جانب سےایوان میں”گھڑی چور گھڑی چور "کے نعرے لگائے گئے جبکہ سنی اتحادکونسل ارکان نے ‘آئی آئی پی ٹی آئی اورکون بچائےگا پاکستان’ کے نعرے لگائے۔

سنی اتحادکونسل اراکین نے نواز شریف کیخلاف ‘چور چور’ کے بھی نعرے لگائے۔

خیال رہے شریف سات سال بعد قومی اسمبلی میں واپس آئے ہیں، انہیں الیکشن کمیشن آف پاکستان نے این اے 130 لاہور کے حلقہ این اے 130 سے فاتح قرار دیا تھا، تین بار کے سابق وزیر اعظم نے پی ٹی آئی کی حمایت یافتہ آزاد امیدوار یاسمین راشد کو شکست دی تھی۔

اسلام آباد : قومی اسمبلی کے افتتاحی اجلاس میں شرکت کے لئے ارکان کی آمد کا سلسلہ جاری ہے، اس موقع پر ریڈ زون میں سیکیورٹی کے سخت انتظامات کئے گئے ہیں۔

تفصیلات کے مطابق سولویں قومی اسمبلی کا افتتاحی اجلاس آج ہونے جارہا ہے ، ارکان کی پارلیمنٹ ہاؤس میں آمد کا سلسلہ جاری ہے۔

ن لیگ کے قائد میاں نواز شریف، شہباز شریف ، حمزہ شریف سمیت دیگر ن لیگی ارکان پارلیمنٹ پہنچ گئے جبکہ عمر ایوب ، بیرسٹر گوہر ، محمد علی جان سمیت دیگر ارکان بھی پہنچے۔

قومی اسمبلی کے افتتاحی اجلاس کے موقع پر ریڈ زون میں سیکیورٹی کے سخت انتظامات کئے گئے ہیں ، غیر متعلقہ افراد کا پارلیمنٹ کے اطراف، شاہراہ دستور پر داخلہ بند ہے جبکہ پولیس کی بھاری نفری تمام داخلی راستوں پر تعینات ہیں۔

مخصوص کارڈز، اسٹیکرز والی گاڑیوں کو پارلیمنٹ کی حدود میں داخلے کی اجازت ہوگی۔

قومی اسمبلی کا افتتاحی اجلاس اسپیکر قومی اسمبلی راجا پرویز اشرف کی زیر صدارت ہوگا، جس میں نو منتخب ارکان قومی اسمبلی حلف اٹھائیں گے، اجلاس میں تلاوت کلام پاک اور نو منتخب ارکان کی حلف برداری ہو گی۔