اسلام آباد : قومی سلامتی کی پارلیمانی کمیٹی کے اجلاس کا مقام تبدیل کرتے ہوئے قومی اسمبلی سیکرٹریٹ کے ملازمین کو چھٹی دے دی گئی، پارلیمنٹ ہاؤس کی عمارت قومی سلامتی کے اجلاس سے قبل خالی کرائی جائے گی۔
تفصیلات کے مطابق قومی سلامتی کی پارلیمانی کمیٹی کے آج ہونے والے اجلاس کا مقام تبدیل کردیا گیا ، ذرائع کا کہنا ہے کہ اجلاس کمیٹی روم 2کی بجائے قومی اسمبلی ہال میں ہوگا ، شرکاکی تعداد زیادہ ہونے کی وجہ سے اجلاس قومی اسمبلی ہال میں ہوگا۔
ذرائع کا کہنا ہے کہ قومی سلامتی کے اجلاس کے موقع پر قومی اسمبلی سیکرٹریٹ کے ملازمین کو چھٹی دے دی گئی اور قومی اسمبلی کے دفاتر کوبندکردیاگیا، عمارت میں غیر متعلقہ افراد کے داخلے پر پابندی ہوگی۔
ذرائع کے مطابق سینیٹ سیکرٹریٹ کے ملازمین کو بھی چھٹی دے دی گئی، پارلیمنٹ ہاؤس کی عمارت قومی سلامتی کے اجلاس سے قبل خالی کرائی جائے گی۔
ترجمان قومی اسمبلی کا کہنا ہے کہ اجلاس کے حوالے سے تمام تر انتظامات مکمل کرلیے ہیں۔
خیال رہے قومی سلامتی کی پارلیمانی کمیٹی کا ان کیمرہ اجلاس آج سہہ پہر تین بجے ہوگا، جس میں آرمی چیف جنرل قمر جاوید باجوہ اور ڈی جی آئی ایس آئی پارلیمانی کمیٹی میں شرکت کریں گے جبکہ پارلیمانی جماعتوں کے نمائندے بھی شریک ہوں گے۔
اجلاس میں ڈی جی آئی ایس آئی لیفٹیننٹ جنرل فیض حمید شرکا کو بریفنگ دیں گے، اجلاس میں ملک کی داخلی صورتحال سمیت افغانستان،بھارت اورمقبوضہ کشمیرسےمتعلق امور پر بریفنگ دی جائے گی، جبکہ امریکا کی جانب سے فضائی اڈوں کے مطالبے اور خطے کے امور کا بھی تفصیلی جائزہ لیا جائے گا۔
