لاہور: امیر جماعت اسلامی حافظ نعیم الرحمان نے کہا ہے کہ قوم پرستی کی بنیاد پر تقسیم ناقابل قبول ہے، بلوچستان کا مقدمہ لڑیں گے۔
جماعت اسلامی پاکستان کے امیر کا کہنا تھا کہ اہل بلوچستان کا مقدمہ مینار پاکستان پر لڑیں گے، ریاست کا مطلب عوام ہے، پاکستان مسلم لیگ ن اور پیپلز پارٹی فارم 47 کی بنیاد پر قابض ہیں، آج سے حق دو عوام کو تحریک کے دوسرے مرحلے کا آغاز کررہے ہیں۔
حافظ نعیم نے کہا کہ مایوس ہوکر گھر بیٹھنا مسائل کا حل نہیں، ہر خاص و عام کو دعوت دیتا ہوں کہ جماعت اسلامی کے ممبر بنیں۔
امیر جماعت اسلامی پاکستان حافظ نعیم نے کہا کہ بجلی کے بل بم بن چکے ہیں، صحت اور تعلیم مہنگی ہوچکی ہے جبکہ روزگار کے مسائل بڑھ رہے ہیں۔
اسلام آباد: جماعت اسلامی کے سابق سینیٹر مشتاق احمد گرفتار
اس سے قبل حافظ نعیم الرحمان کا کہنا تھا کہ جماعت اسلامی رابطہ عوام مہم چلا رہی ہے، حکومت نے دھرنے پر ہم سے معاہدہ کیا، کچھ لوگوں نے ہمارے معاہدے پر پروپیگنڈا کر کے حکومت کی حمایت کی۔
ان کا کہنا تھا کہ حیران ہوں نواز شریف وفاق کے بجائے صوبے کی سیاست کر رہے ہیں، امیر جماعت اسلامی نے مطالبہ کیا کہ آئی پی پیز کا فرانزک آڈٹ ہونا چاہیے اور عوام کو بجلی کے بلوں میں مستقل ریلیف ہونا چاہیے۔
حافظ نعیم کا کہنا تھا کہ فضل الرحمان اب اس نتیجے پر پہنچے جس پر ہم کافی دیر پہلے پہنچ چکے ہیں کہ سیاسی اتحادوں کا کوئی فائدہ نہیں کیونکہ ماضی میں کوئی فائدہ نہیں ہوا۔
