پیرس اولمپکس 2024میں پاکستان کو گولڈ میڈل دلانے والے قومی ہیرو ارشد ندیم نے کہا ہے کہ میرے لیے دعائیں کرنے پر پوری قوم کا شکریہ ادا کرتا ہوں۔
لاہور ایئر پورٹ پہنچنے کے بعد میڈیا سے گفتگو کرتے ہوئے گولڈن بوائے کا کہنا تھا کہ میری کامیابی کے پیچھے کوچ کی محنت تھی۔
انہوں نے کہا کہ پاکستان بورڈ اور اپنے کوچ کا شکریہ ادا کرتا ہوں، پوری پاکستانی قوم اور والدین کی دعاؤں سے اللہ تعالیٰ نے عزت دی۔ ان کا کہنا تھا کہ گولڈ میڈل جیتنے پر بہت خوشی ہوئی، اسے حاصل کرنے کیلئے دن رات محنت کی۔
ارشد ندیم نے کہا کہ وزیراعظم کا بھی شکریہ، ان کا لگایا گیا پودا ہوں، یوتھ فیسٹیول میں بھرپور شرکت کی تھی، پنجاب اسپورٹس بورڈ، فیڈریشن اور دیگر سب کا شکرگزار ہوں، اولمپکس میں گولڈ میڈل جیتنے پر بہت خوشی ہے، آنے والے ایونٹس کی بھرپور تیاری کروں گا۔
واضح رہے کہ جیولین تھرو ایونٹ کے فائنل میں ارشد ندیم نے پاکستان کو 40 سال بعد گولڈ میڈل جتوایا ہے، ارشد ندیم اولمپکس کے انفرادی مقابلوں میں گولڈ میڈل جیتنے والے پہلے پاکستانی ایتھلیٹ ہیں۔
