اسلام آباد : پاکستان تحریک انصاف کے سربراہ عمران خان نےعیدالفطر کے موقع پرقوم کو مبارکباد دی ہے۔
تفصیلات کے مطابق چیئرمی پاکستان تحریک انصاف نے سماجی رابطے کی ویب سائٹ ٹویٹرپراپنے پیغام میں کہا کہ اپنے اہلِ خانہ کے ساتھ عید منانے والے تمام پاکستانیوں کو عید کی خوشیاں مبارک ہوں۔
عمران خان نے ٹویٹرپراپنے پیغام میں کہا کہ آئیے سب دعا کریں کہ آئندہ برس ہمیں رمضان اور عید اس نئے پاکستان میں میسر آئیں جس میں ہم رب تعالیٰ کی دی گئی صلاحیتوں کے بل بوتے پرایسی قوم بننے کی راہ پرگامزن ہوں جس کا خواب ہمارے آباء واجداد نے دیکھا۔
خیال رہے کہ گزشتہ روز چیئرمین پاکستان تحریک انصاف نے سابق وزیراعظم نوازشریف کی اہلیہ بیگم کلثوم نواز کی صحت یابی کے لیے دعا کی تھی۔
سماجی رابطے کی ویب سائٹ ٹویٹر پر جاری اپنے بیان میں سربراہ پی ٹی آئی عمران خان کا کہنا تھا کہ ہماری دعائیں بیگم کلثوم نواز کے ساتھ ہیں، اللہ تعالیٰ بیگم کلثوم کو صحت عطا کرے۔
خبر کے بارے میں اپنی رائے کا اظہار کمنٹس میں کریں، مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں۔
لاہور: مسلم لیگ ن کے صدر میاں نوازشریف کا کہنا ہے کہ مجھے صرف اس لیے نا اہل قرار دیا گیا کہ بیٹے سے تنخواہ نہیں لی۔
تفصیلات کے مطابق نا اہل سابق وزیراعظم میاں نوازشریف نے لاہور میں میڈیا سے گفتگو کرتے ہوئے کہا کہ اللہ نےعزت بخشی اورمیں اللہ تعالیٰ کے فیصلے کے آگے سرجھکاتا ہوں۔
مسلم لیگ ن کے صدر نے کہا کہ پیغام عوام کے دلوں تک پہنچ گیا اور لوگ جواب دے رہے ہیں۔
نوازشریف نے کہا کہ مجھے صرف اس لیے نا اہل قرار دیا گیا کہ بیٹے سے تنخواہ نہیں لی، اب قوم فیصلہ سنارہی ہے، لودھراں کا الیکشن قوم کا فیصلہ ہے۔
سابق وزیراعظم نوازشریف نے کہا کہ لودھراں کے الیکشن کے بارے میں کون سوچ سکتا تھا۔
انہوں نے کہا کہ عدالتوں میں بیٹھے منصفین کوسوچنا چاہیے کہ اللہ کوجواب دہ ہونا ہے، جوانصاف کی کرسی پر بیٹھا ہے سب سے زیادہ ان کی جواب طلبی ہوگی۔
یاد رہے کہ گزشتہ روز پنجاب ہاؤس میں سابق وزیراعظم نوازشریف کا کہنا تھا کہ این اے 154 کے ضمنی الیکشن میں جس طرح لودھراں کی عوام نے بے پناہ محبت کا اظہار کیا ہے کہ وہ خود وہاں جا کرعوام کا شکریہ ادا کریں گے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
ملک بھر میں عیدالفطرآج مذہبی جوش وجذبے کے ساتھ منائی جا رہی ہےاس موقع پر ملکی سلامتی اور استحکام کےلیے خصوصی دعائیں مانگی جارہی ہیں۔
تفصیلات کےمطابق ملک کے تمام چھوٹے بڑے شہروں، قصبوں اور دیہات میں عید الفطر کی نماز کے اجتماعات ہوں گےجس میں ملک کی سلامتی، ترقی، خوشحالی اوردہشت گردی کے خاتمے کے لئے خصوصی دعائیں مانگی جائیں گی۔
کراچی میں عید الفطر کے موقع پر شہر کی بڑی مساجد، عید گاہوں اور امام بارگاہوں کے باہر پولیس کی بھاری نفری تعینات کی جائے گی جبکہ پولیس کے علاوہ رینجرز اہلکار نے بھی ڈیوٹی انجام دیں گےاہم عیدگاہوں پر نمازیوں کو واک تھرو گیٹ سے اندر جانے کی اجازت دی جائے گی۔
عیدالفطر کے موقع پر شہر کے اہم عوامی مقامات، تفریحی گاہوں اور پارکوں کے باہر بھی پولیس کی اضافی نفری بھی تعینات کی گئی ہے۔
پنجاب کے دارالحکومت لاہور میں نماز عید الفطر کا سب سے بڑا اجتماع بادشاہی مسجد میں ہوگا۔عیدالفطر کے موقع پر پنجاب میں سیکیورٹی خدشات کی بنا پر سخت سکیورٹی پلان تشکیل دیا گیا ہے اور سیکیورٹی کے سخت انتظامات کیے گئے ہیں۔
اسلام آباد میں نماز عید کا سب سے بڑا اجتماع فیصل مسجد میں ہوگا جبکہ اس موقع پر سکیورٹی کے انتہائی سخت انتظامات کیے گئے ہیں۔
عیدالفطر کے موقع پر کوئٹہ اور پشاور میں بھی سکیورٹی کے سخت انتظامات کیے گئے ہیں، دونوں صوبائی دارالحکومتوں میں پولیس، رینجرز اور ایف سی کے اہلکار سیکیورٹی کے فرائض انجام دیں گے۔
واضح رہےکہ صدر ممنون حسین اور وزیر اعظم نوازشریف نے عید الفطر کے موقع پر عالم اسلام اور اہل پاکستان کو دل کی گہرائی سے مبارکباد پیش کرتے ہوئے کہا کہ عید پر دہشت گردی کے شکار پاکستانیوں کو یاد رکھا جائے۔
اگرآپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اوراگرآپ کو یہ مضمون پسند آیا ہے تو اسے اپنی فیس بک وال پرشیئرکریں۔
لاہور: فاسٹ باؤلر محمد عرفان کاکہناہےکہ کبھی اسپاٹ یا میچ فکسنگ نہیں کی لیکن کچھ لوگ تاثر دے رہے ہیں کہ میں نے فکسنگ کی۔
تفصیلات کےمطابق فاسٹ باؤلر محمد عرفان نےسماجی رابطے کی ویب سائٹ ٹوئٹر پر اپنے پیغام میں کہاہےکہ اسپاٹ فکسنگ سےمتعلق بروقت بورڈ کو آگاہ نہ کرنے کی غطی پر پوری قوم سےمعافی مانگتاہوں۔
فاسٹ باؤلر محمد عرفان کاکہناہےکہ کچھ لوگ تاثردےرہے ہیں کہ میں نےفکسنگ کی لیکن میری غلطی اتنی ہےکہ بروقت بورڈ کو نہیں بتایا۔
خیال رہےکہ گزشتہ ماہ پی ایس ایل فکسنگ اسکینڈل میں ملوث فاسٹ باؤلر محمد عرفان نے پی سی بی اینٹی کرپشن یونٹ کی چارج شیٹ کا جواب جمع کرا دیاتھا۔جس میں محمد عرفان نے اپنی غلطی تسلیم کی تھی۔
بعدازاں پی سی بی کی جانب سے فاسٹ باؤلر کو ایک سال کے لیے معطل کر دیا گیاتھاجبکہ ان پرچھ ماہ تک کرکٹ کھیلنے پابندی کےساتھ ان کا سینٹرل کانٹریکٹ بھی چھ ماہ کے لیے معطل کر دیا گیاتھا۔اور ان پر10 لاکھ روپےجرمانہ بھی عائد کیا گیاتھا۔
پی سی بی ہیڈکوارٹرز میں اپنے وکیل اور بورڈ حکام کے ساتھ پریس کانفرنس کرتے ہوئےمحمد عرفان نےکہا تھاکہ میں اپنی غلطی تسلیم کرتا ہوں اور قوم سے معافی مانگتا ہوں۔
یاد رہےکہ محمد عرفان نے پاکستان کی جانب سے 4 ٹیسٹ میچ، 60 ون ڈے انٹرنیشنل، اور 20 ٹی ٹوئنٹی میچ کھیلے ہیں۔
واضح رہے کہ رواں سال فروری میں کھیلے جانے والی پاکستان سپر لیگ کے سیزن ٹو کے آغاز پر پاکستانی کھلاڑیوں شرجیل خان، خالد لطیف، ناصر جمشید، شاہ زیب حسن خان اور محمد عرفان پراسپاٹ فکسنگ کا الزام عائدکیاگیا تھا۔
اسلام آباد: ملک بھرمیں یوم پاکستان ملی جوش و جذبے سے منایا جا رہا ہے، وفاقی دارالحکومت میں دن کا آغاز اکتیس اور صوبائی دارالحکومتوں میں اکیس، اکیس توپوں کی سلامی سے ہوا۔
تفصیلات کےمطابق پاکستانی قوم آج یومِ پاکستان آج جوش وخروش سےمنارہی ہے۔ دن کاآغازوفاقی دارالحکومت میں اکتیس اور صوبائی دارالحکومتوں میں اکیس اکیس توپوں کی سلامی کے ساتھ ہوا۔
یوم پاکستان پرمساجد میں نمازِفجر کے بعد ملکی ترقی خوشحالی اوریکجہتی کے لیے خصوصی دعائیں کی گئیں۔
یومِ پاکستان کی پریڈ براہ راست دیکھئے
یوم پاکستان کی پروقارتقریب اورفوجی پریڈ
اسلام آباد کے شکرپڑیاں پریڈ گراؤنڈ کے مقام پر شاندار فوجی پریڈ جاری ہے، پریڈ میں تینوں مسلح افواج کےچاک وچوبند دستے پرفارمنس کا مظاہرہ کررہے ہیں۔
فوجی پریڈ کی اس پروقارتقریب میں مہمان خصوصی صدرپاکستان ممنون حسین، وزیر اعظم نوازشریف اورآرمی چیف جنرل قمرجاوید باجوہ سمیت دیگرمسلح افواج کے سربران، وزیر دفاع خواجہ آصف سمیت دیگررہنما اورغیرملکی سفیرشریک ہیں۔
چین کی تینوں مسلح افواج، سعودی عرب کی اسپیشل فورسز کا دستہ بھی اس پریڈ میں شریک ہے۔ تقریب میں ترکی کا ملٹری بینڈ ترانوں پرسربکھیرے گا۔ یومِ پاکستان کی اس خصوصی تقریب میں جنوبی افریقہ کی نیشنل ڈیفنس فورس کےسربراہ بھی شریک ہیں۔
پریڈ کے مہمان خصوصی صدر مملکت ممنون حسین صدارتی بَگھی پرسوار ہوکر پریڈ گراؤنڈ پہنچے، جہاں وزیر اعظم اور تینوں مسلح افواج کے سربراہان نے ان کا استقبال کیا۔
یوم پاکستان کی تقریب کا باقاعدہ آغاز قومی ترانے سے کیا گیا جس کے بعد صدر ممنون حسین نے جیپ میں سوارہوکرمسلح افواج کے دستوں کا معائنہ کیا۔
ایئر چیف مارشل کا شاندار فلائی پاسٹ
ایئر چیف مارشل سہیل امان نے شاندار فلائی پاسٹ کا مظاہرہ کرتے ہوئے صدر مملکت ممنون حسین کو سلامی دی۔ انہوں نے ایف 16 طیارے میں فلائی پاسٹ کا مظاہرہ بھی کیا۔
ایئرچیف مارشل کی جانب سے فلائی پاسٹ کے بعد پاک فضائیہ کے جے ایف تھنڈر طیاروں نے شاندار فلائی پاسٹ کا مظاہرہ کیا۔
صدرپاکستان کا فوجی پریڈ سے خطاب
صدرِمملکت نے یوم پاکستان کی تقریب سے خطاب کرتے ہوئےکہاکہ آپ سب کویوم پاکستان مبارک ہو،آج کا دن ایک عزم کی کہانی بیان کرتا ہے۔
تقریب سے خطاب کرتے ہوئے صدر ممنون حسین نےکہا کہ پاکستان اپنے تمام ہمسایہ ممالک سے پرامن دوستانہ تعلقات چاہتا ہے، مگر بھارت کی جارحیت نے خطے کے امن کو داؤ پرلگادیا ہے۔
صدرمملکت نے کہا کہ پاکستان بھارت کے ساتھ خطے میں امن اورترقی کے لیے مذاکراتکرنے کوتیار ہے، مگرساتھ ہی پاکستان مقبوضہ جموں وکشمیر کے عوام کی اخلاقی حمایت جاری رکھے گا۔
صدر پاکستان نے کہا کہ پاکستان گزشتہ کئی سال سے دہشت گردی کے خلاف لڑرہا ہے، پاک فوج اورعسکری و سیکیورٹی اداروں کی کوششوں سے امن کا قیام ممکن ہوا۔
صدرممنون حسین نے کہا کہ پاکستان معاشی ترقی کی جانب گامزن ہے، ہمارا مقصد علاقائی اورعالمی امن کو یقینی بنانا ہے۔
صدر مملکت نے یوم پاکستان کی تقریب میں شرکت پرچین، ترکی اور سعودی عرب کے فوجی دستوں کو خوش آمدید کہتے ہوئے کہا کہ دوست ممالک کی جانب سے فوجی دستوں کو بھیجنے پران کا شکریہ ادا کرتے ہیں۔
چین اورسعودی عرب کے دستوں کی سلامی
یوم پاکستان کی فوجی پریڈ میں سعودی عرب اور چین کےچاک وچوبند فوجی دستوں نے بھی سلامی دی۔
سعودی عرب کے فوجی دستےنےسب سے پہلےسلامی دی، جس کے بعد چین کے فوجی بینڈ نے پرفارمنس کا مظاہرہ کیا،چینی دستے میں بری وفضائی فوج کے اہلکار بھی شامل تھے۔
فوجی پریڈ میں چین اورسعودی عرب کی فوج کے اعلیٰ عہدیداروں نے بھی شرکت کی۔
پریڈ میں ترکی کے فوجی بینڈ ’مہتر‘ نے بھی پرفارمنس کا مظاہرہ کیا،ترکی کے بینڈ نے اپنے روایتی لباس اور سازوں کے ساتھ سلامی دی۔
ترکی کے مہتر فوجی بینڈ کی بنیادی 1299 میں رکھی گئی تھی،اس بینڈ کا شمار دنیا کےقدیم ترین بینڈز میں ہوتا ہے۔ترک بینڈ نے’جیوے جیوے پاکستان‘ کی دھن پر پرفارمنس کی۔
پریڈ کے دستے میں مین بیٹل ٹینک الخالد اور الضرار بھی شامل
الخالد ٹینک کیمیائی اور ایٹمی حملے سے بچنے کی صلاحیت رکھتا ہے،جبکہ الضرار ٹینک بھی جدید ترین ٹینکوں میں شمار ہوتا ہے۔
پریڈ کےدوران ریڈارز،ٹینکس اور فوجی انفارمیشن ٹیکنالوجی (آئی ٹی) سےمنسلک دیگر جدید روایتی اورغیر روایتی ہتھیاروں کو بھی پیش کیاگیا۔
یوم پاکستان کی فوجی پریڈ میں ساٹھ کلو میٹر تک ہدف کو نشانہ بنانے والے نصر میزائل، 900 کلو میٹر تک ہدف کو نشانہ بنانے والےشاہین میزائل پیش کیے گئے۔
اس کے علاوہ 1300 کلو میٹر تک روایتی اور غیر روایتی ہتھیاروں کے ساتھ ہدف کو نشانہ بنانے والے غوری میزائل سمیت کروز میزائل بابر اوردیگرمیزائل بھی پیش کیےگئے۔
روایتی اورغیر روایتی ہتھیاروں کےساتھ دشمن کو2700 کلومیٹر تک نشانہ بنانے والےشاہین تھری میزائل کو بھی پیش کیاگیا۔
چاروں صوبوں کی ثقافت کا عکس
یوم پاکستان کی پریڈ میں پاکستان کے چاروں صوبوں پنجاب، سندھ، خیبرپختونخوا اور بلوچستان سمیت گلگت بلتستان اور آزاد کشمیر کی روایتی ثقافتی پریڈ بھی پیش کی گئی۔
چاروں صوبوں کی جانب سے پیش کی جانے والی ثقافتی پریڈ میں جہاں علاقائی ثقافت کو پیش کیا گیا، وہیں صوبے کےمشہور اور تاریخی جگہوں کے ماڈل بھی پیش کیےگئے۔
آرمی ایوی ایشن کا فلائی پاسٹ
آرمی ایوی ایشن کی جانب سےفلائی پاسٹ میں کوبرا، پوما، فینک اور ایم آئی 17سمیت 19ہیلی کاپٹرز نے حصہ لیا۔سب سے پہلےدن اور رات کےدرمیان آپریشن کے لیےمفید کوبرا ہیلی کاپٹرز کے ذریعے فلائی پاسٹ کیا گیا۔
کوبراہیلی کاپٹرز کے بعد’فینک‘ ہیلی کاپٹرز کی جانب سے فلائی پاسٹ پیش کیا گیا، یہ ہیلی کاپٹرز فوج کی جانب سے فوری نقل و حرکت اور آپریشن کے لیے استعمال کیے جاتے ہیں۔
فوجی پریڈ کی تقریب میں سب سے آخر میں ایم آئی 17 ہیلی کاپٹرز کی جانب سے بھی فلائی پاسٹ کا مظاہرہ کیا گیا۔
پاک فضائیہ کے شیردل فارمیشن کا دلکش فضائی مظاہرہ
پریڈ کے دوران پاک فضائیہ کےشیردل فارمیشن نے دلکش فضائی مظاہرےمیں 6 طیارے شامل تھےجنہوں نے ایک ساتھ اور علیحدہ علیحدہ آسمان کی بلندیوں میں مظاہرہ کیا۔
پاک فضائیہ کے طیاروں نے مظاہرے کے دوران فضائوں میں لہراتے ہوئے رنگ بکھیرے اور پریڈ اوینیو سے باہر اور ہزاروں کلو میٹرز کی بلندی تک مظاہرہ کیا۔
واضح رہےکہ اسلام آباد میں پریڈ کے موقع پرسیکیورٹی اقدامات کے تحت جڑواں شہروں میں صبح 5 بجے سے دن 3 بجےتک موبائل فون سروس معطل رہے گی۔
اسلام آباد: وزیراعظم پاکستان کا کہناہےکہ اگردہشت گرد سمجھتے ہیں کہ وہ ہماری قوم کےعزم کو کمزورکرسکتے ہیں تو یہ ان کی غلط فہمی ہوگی۔
تفصیلات کےمطابق وزیراعظم میاں محمد نوازشریف نےسرحدپارسے کیےجانے والے دہشت گردحملے میں جام شہادت نوش کرنے والے پاک فوج کے اہلکاروں کی شہادت پرگہرے دکھ کا اظہارکیاہے۔
وزیراعظم نےکہاکہ سرحدوں اور شہروں میں وردی میں ہمارے چوکس جوانوں کی وجہ سے پاکستان مضبوط سے مضبوط ترہوگا۔
نوازشریف نے کہا وردی میں ہمارے مردوں ہماری سرحدوں پر اور ہمارے شہری مراکز میں چوکس ہیں کیونکہ کہ پاکستان میں زیادہ کامیاب اور مضبوط ہو جائے گا۔انہوں نےکہا کہ آپریشن ردالفساد ملک میں موجود دہشت گردوں کےساتھ ساتھ بیرون ملک سے دہشت گردی کرنے والوں کے خلاف ہے۔
واضح رہےکہ وزیراعظم نوازشریف نے کہاکہ جان کی قربانی دینے والے جوان قوم کے اصل ہیرو ہیں۔انہوں نےکہاکہ قوم دہشت گردوں کےمذموم عزائم ناکام بنانےکےلیےپاک فوج کےساتھ کھڑی ہے۔
لاہور: وفاقی وزیر اطلاعات پرویز رشیدکا کہنا ہے کہ وزیر اعظم نوازشریف کی حکومت نے حج کے مقدس فریضے کے لیے بہترین سہولتیں فراہم کیں۔
تفصیلات کےمطابق پنجاب کے دارالحکومت لاہور میں میڈیا سے گفتگو کرتے ہوئے وفاقی وزیراطلاعات کا کہنا تھا کہ وزیراعظم نوازشریف اور اپنی طرف سے پوری قوم کو حج کی مبارکباددیتا ہوں۔
وفاقی وزیر پرویز رشید کا کہنا تھا کہ نوازشریف کی حکومت میں چارحج ہوئے ہماری حکومت میں جب بھی حاجی حج کرکے آئے تو انہوں نے انتظامات کی تعریف کی۔
انہوں نےکہا کہ اللہ کا شکر ہے کہ مسلم لیگ ن کی حکومت میں حج کی سعادت سستی ہوئی.سرکاری حج کے اخراجات اور سہولت بھی بہتر ہوئی۔
پرویز رشید نے مزید کہاکہ حج کے مقدس مہینے میں عمران خان نے دو وعدے کئے ، ایک وعدہ حج پر تشریف لےجانے کا کیا دوسرا رائیونڈ جانے کا ،عمران حج پر اس لئے نہیں گئے کہ اللہ نے انہیں اجازت نہیں دی ،دوسری وجہ یہ بھی ہو سکتی ہے کہ عمران خان کا شیطان سے مل مکا ہو گیا۔
پرویز رشید نے کہا کہ سب لوگوں کی خواہش ہوتی ہے کہ سرکاری حج کے انتظامات سے مستفید ہوں کیوں کہ پیسے بھی کم خرچ ہوتے ہیں۔
واضح رہے کہ پرویز رشید کا کہنا تھا کہ ہماری حکومت سے پہلے سرکاری حج پر زیادہ پیسے خرچ ہوتے تھے لیکن وزیراعظم نوازشریف نے حج کے اخراجات میں کمی کی تاکہ زیادہ سے زیادہ عوام اس سے مستفید ہوسکے۔
اسلام آباد: صوبہ پنجاب کے وزیر قانون رانا ثنا اللہ کا کہنا ہے کہ حکومت،قانون نافذ کرنے والے ادارے اور پوری قوم دہشت گردی کے خلاف جنگ لڑ رہی ہے جس میں ہمیں اہم کامیابیاں بھی حاصل ہوئی ہیں.
تفصیلات کے مطابق صوبائی وزیر قانون پنجاب نے کہا کہ پاکستانی مسلح افواج نے آپریشن ضرب عضب کے ذریعے ملک سے دہشت گردی کے جڑ سے خاتمے کا کام شروع کردیا اور اس سلسلے میں شمالی اور جنوبی وزیرستان سے دہشت گردوں کا صفایا کیا جا چکا ہے.
انہوں نے کوئٹہ میں وکلاء پر ہونے والے حملے کی شدید مذمت کرتے ہوئے کہا کہ دہشت گردی کے خلاف ہمارے قانون نافذ کرنے والے اداروں نے لازوال قربانیاں دی ہیں.
صوبائی وزیر قانون رانا ثناءاللہ کا کہنا تھاکہ دہشت گردی ایک عالمی مسئلہ ہے اور فرانس اور دیگر ممالک میں ہونے والے دہشت گردی کے واقعات سب کے سامنے ہیں.
رانا ثنااللہ نے مزید کہا کہ موجودہ حکومت ملک سے دہشت گردی کے جڑ سے خاتمے کے لیے اہم اقدامات کر رہی ہے اوراسی وجہ سے دہشت گردی کے واقعات میں مجموعی طور پر کمی واقع ہوئی ہے.
انہوں نے مزید بتایا کہ پنجاب بھر میں کیے جانے والے مختلف آپریشنز میں اب تک 200 کے لگ بھگ ملزمان گرفتار بھی کیے جا چکے ہیں.
پشاور: آرمی چیف جنرل راحیل شریف کا کہنا ہے کہ عوام نےدہشت گردوں کو خود سے الگ کردیا ہے،ڈی جی آئی ایس پی آر کا کہنا ہے کہ آپریشن متاثرین کی گھروں کو واپسی اگلے سے شروع ہوجائے گی۔
پشاور میں آرمی چیف جنرل راحیل شریف کی زیرصدارت اعلیٰ سطح صوبائی کمیٹی کا اجلاس ہوا، جس میں قومی ایکشن پلان پرعملدرآمد کا جائزہ لیاگیا، آرمی چیف جنرل راحیل شریف کا کہنا تھا کہ کے پی کے اور فاٹا کےعوام نےبےحد قربانیاں دی ہیں اور عوام کےحوصلے بلند ہیں۔
ان کا کہنا تھا کہ دہشت گردوں کیخلاف جدوجہدمیں بہادر قبائلی ساتھ ہیں،آرمی چیف کاکہناتھاکہ سانحہ پشاورپر پوری قوم متحد ہے اور آخری دہشت گرد کے خاتمے تک جدوجہدجاری رہےگی، انھوں نے ایف سی کے لیےایف سی کو چار ہزار کلاشنکوف دینے کا اعلان بھی کیا۔
اس سے قبل ڈی جی آئی ایس پی آر عاصم سلیم باجوہ کا سماجی ویب سائٹ ٹوئٹر پر ایک پیغام میں کہنا تھا کہ آپریشن ضرب عضب کے متاثرین کی واپسی کا عمل اگلے ماہ سے شروع ہوجائے گا جو مرحلہ وار ہو گا۔ ان کا کہنا ہے کہ متاثرین کی واپسی کے عمل میں فوج، کے پی کے کی صوبائی حکومت اور فاٹا انتظامیہ معاونت کریں گے۔
لاہور: آرمی چیف جنرل راحیل شریف نے کہا ہے کہ اپنی سرزمین سے دہشت گردی کا ہرقیمت پرخاتمہ کردیں گے جس کے لئے سب کو ملکر جدو جہد کرنی ہوگی۔
لاہور میں اعلیٰ سطح اجلاس کا اجلاس ہوا جس میں آرمی چیف جنرل راحیل شریف اور وزیر اعلی پنجاب شہباز شریف نے شرکت کی ، جس سے خطاب میں آرمی چیف جنرل راحیل شریف نے کہا کہ دہشت گردی کے خلاف جنگ کسی قیمت پرہارنے کاسوچ بھی نہیں سکتے، پنجاب سے ہرقیمت پر شدت اور انتہاپسندی ختم کریں گے۔
ڈی جی آئی ایس پی آر کے اعلامیہ میں کہا گیا ہے کہ اعلیٰ سطح اجلاس میں قومی ایکشن پلان پر عملدرآمد کے لئے صوبائی سطح پر کمیٹیاں قائم کر دی گئی ہیں ۔
اعلیٰ سطح اجلاس میں آرمی چیف،وزیراعلیٰ پنجاب کے علاوہ ڈی جی آئی ایس پی آر، پنجاب کے کورکمانڈرزاور ڈی جی آئی ایس آئی بھی شریک ہوئے، قانون نافذ کرنے والے اداروںکے نمائندوں نے بھی شرکت کی۔
