کراچی: جاپان کے قائم مقام قونصل جنرل نے پاکستانیوں سے محبت کا اظہار کرنے کے لیے اپنی ’اردو دانی‘ کا ہنر خوب صورتی سے آزمایا، جنھیں ویڈیو میں سنا جا سکتا ہے۔
تفصیلات کے مطابق کراچی میں جاپانی قائم مقام قونصل جنرل ناکاگاوا یاسوشی نے اردو زبان میں قرارداد پاکستان کی مبارک باد دی ہے، اس سلسلے میں انھوں نے خاصا طویل ویڈیو پیغام جاری کیا ہے۔
ناکاگاوا یاسوشی نے کہا ’’پاکستانی بھائیوں اور بہنوں کو سلام پیش کرتا ہوں، 23 مارچ کا دن پاکستان کے لیے تاریخی لحاظ سے بہت اہم اور فخر کا دن ہیں۔‘‘
قائم مقام قونصل جنرل نے کہا ’’میں اپنی طرف سے قونصل جنرل جاپان ہاتوری ماسارو اور پورے جاپانی قونصل خانے کے عملے کی جانب سے پاکستانیوں کو مبارک باد پیش کرتا ہوں۔‘‘
یوم پاکستان پر گورنر سندھ اور وزیر اعلیٰ کی مزار قائد پر حاضری
ناکاگاوا یاسوشی نے مزید کہا ’’قونصل جنرل جاپان ہاتوری ماسارو نے خصوصی پیغام جاپان سے پاکستانیوں کے لیے بھجوایا ہے، یہ دن پاکستان اور اس کے عوام کے لیے امن، استحکام اور خوشیوں کی ماند ہے۔‘‘
واضح رہے کہ آج ملک بھر میں یوم پاکستان ملی جوش وجذبے کے ساتھ منایا جا رہا ہے، دن کے آغاز پر وفاقی دارالحکومت میں 31 اور صوبائی دارالحکومتوں میں 21 توپوں کی سلامی دی گئی۔
