برما : میانمار اور تھائی لینڈ میں خوفناک زلزلہ سے عمارتیں لرز اٹھیں، نظام زندگی درہم برہم ہوگیا، اب تک 150افراد کے ہلاک ہونے کی اطلاعات موصول ہوئیں ہیں، تعداد میں بڑا اضافہ متوقع ہے۔
غیر ملکی خبر رساں ادارے کی رپورٹ کے مطابق میانمار میں 7.7 شدت کا زلزلے ریکارڈ کیا گیا ہے جس کی وجہ سے کئی کثیر منزلہ عمارتیں منہدم ہوگئی ہیں۔
میانمار میں آنے والے 7.7 شدت کے زلزلے نے بڑے پیمانے پر تباہی مچادی جس کے اثرات بنکاک تک دیکھے گئے، زلزلے کے بعد شدید آفٹر شاک بھی محسوس کیے گئے۔
قیامت خیز زلزلے کے نتیجے میں تھائی لینڈ کے شہر بینکاک میں عمارتوں کو نقصان پہنچا ہے اور میانمار کے دارالحکومت نیپیڈو میں سڑکیں آمد و رفت کے لیے بند ہیں۔
منہدم ہونے والی ایک زیرِ تعمیر عمارت میں 70 مزدوروں کے پھنسے ہونے کی اطلاع ہے، تاہم امدادی ٹیموں کو سینکڑوں ہلاکتوں کا خدشہ ہے۔
رپورٹ کے مطابق زلزلے کا مرکز میانمار کے شہر منڈلے کے قریب تھا اور زمین میں اس کی گہرائی 10 کلومیٹر تک ریکارڈ کی گئی ہے۔
تباہ کن زلزلے کے نتیجے میں کئی رہائشی عمارتیں زمیں بوس ہوگئیں جس کے بعد سیکڑوں افراد ملبے تلے دب گئے اور شہر کا پورا نظام بری طرح تباہ وبرباد ہوگیا۔
اطلاعات کے مطابق میانمار حکومت نے فوری طور پر زیادہ متاثرہ 6 علاقوں میں امدادی کارروائیوں کیلیے ایمرجنسی نافذ کرتے ہوئے فوج تعینات کردی ہے۔
اس کے علاوہ فوجی حکومت نے عالمی برادری اور امددی تنظیموں سے فوری اقدامات کرتے ہوئے امداد کی پرزور اپیل کی ہے۔
سرکاری میڈیا کے مطابق زلزلے سے پانچ شہروں اور قصبوں میں عمارتیں منہدم اور دو پل بھی گرگئے، اب تک مجموعی طور پر 150 ہلاکتوں کی اطلاعات ہیں جبکہ 1ہزار سے زائد افراد زخمی ہوئے، حکام نے ہلاکتوں میں اضافے کا خدشہ ظاہر کیا ہے۔
