کراچی : سندھ کی جیلوں میں قید معمولی نوعیت کے سیکڑوں قیدی اب عید الفطر اپنے گھر والوں کے ساتھ گزاریں گے، حکومت سندھ نے قیدیوں کی 4 ماہ کی سزا معاف کرنے کا اعلان کردیا۔
اے آر وائی نیوز کی رپورٹ کے مطابق عید الفطر کے موقع پر سندھ حکومت نے قیدیوں کی سزاؤں میں چار ماہ( 120 دن) کمی کا فیصلہ کیا ہے۔
اس حوالے سے وزیر جیل خانہ جات سندھ علی حسن زرداری نے بتایا ہے کہ قیدیوں کی سزا معاف کرنے کے فیصلے سے820 قیدی مستفید ہوں گے۔
انہوں نے کہا کہ مذکورہ معافی کا اطلاق ریاست مخالف سرگرمیوں میں ملوث قیدیوں پر نہیں ہوگا، اور نہ ہی جاسوسی، دہشت گردی، ریپ اور ڈکیتی مین ملوث کے قیدی اس رعایت سے مستفید ہوسکیں گے۔
یاد رہے کہ گزشتہ روز صدر پاکستان آصف علی زرداری نے عید الفطر کے موقع پر قیدیوں کے لیے خصوصی طور پر 200 دن کی سزا میں کمی کا اعلان کیا تھا۔
جس میں پنجاب کی 43 جیلوں سے 183 قیدیوں کو رہا کر دیا گیا، سزاؤں میں کمی کا سب سے زیادہ فائدہ سینٹرل جیل لاہور اور اڈیالہ جیل کے قیدیوں کو ہوا، سینٹرل جیل لاہور سے 196 قیدی رہا کیے گئے۔
