Tag: ق لیگ

لاہور: حکمران جماعت کی اتحادی مسلم لیگ(ق) کے مرکزی رہنما و اسپیکر پنجاب اسمبلی چوہدری پرویزالہیٰ نے کہا ہے کہ اتحادیوں میں اختلاف کی سازشی تھیوری کامیاب نہیں ہوگی۔

تفصیلات کے مطابق میڈیا سے گفتگو کرتے ہوئے اسپیکر پنجاب اسمبلی چوہدری پرویزالہیٰ نے کہا کہ ہم حکومتی اتحادی ہیں اوررہیں گے،کوئی غلط فہمی پیدا نہیں کر سکتا۔

یہ بھی پڑھیں: ملک کے موجودہ حالات کو عمران خان کے سوا کوئی اور بہتر نہیں کرسکتا، پرویز الہیٰ

انہوں نے کہا کہ سیاسی حقیقتوں کوسامنے رکھتےہوئےہمیشہ درست بات کی، نوازشریف کے معاملے پربھی جوکہاعمران خان کےفائدےکیلئےکہا۔

پرویزالہیٰ کا کہنا تھا کہ دھرنوں کے دوران بھی ٹکراؤ روکنے کیلئے اپنا کردار ادا کیا ہے، سیاسی انتشارسے بچنے کیلئے مولاناسےرابطے درست ثابت ہوئے جب کہ امن وامان برقراررکھنے کا کریڈٹ وزیراعظم اوروزیرداخلہ کوجاتاہے۔

انہوں نے اس تاثر کو رد کیا کہ مسلم لیگ(ق) حکومتی اتحاد سے باہر آرہی ہے۔

گجرات: قائم مقام گورنر پنجاب چوہدری پرویز الہٰی نے کہا ہے کہ پاکستان اور غریب عوام کی ترقی ہمارا وِژن ہے، اس پر عمل کر کے ہی پاکستان ترقی کرے گا۔

تفصیلات کے مطابق گجرات میں شیف انٹرنیشنل کے زیر اہتمام چودھری سجاد حیدر میموریل اسپتال کے سنگِ بنیاد کی تقریب سے خطاب کرتے ہوئے پرویز الہیٰ نے کہا کہ عمران خان غریبوں کا درد رکھتے ہیں، ہماری سوچ ایک ہے۔

قائم مقام گورنر پنجاب کا کہنا تھا کہ پاکستان کی ترقی ہی ہم سب کی ترقی ہے، تاجر برادری عمران خان کے وژن میں تعاون کرے۔

چوہدری پرویز الہٰی نے کہا کہ نواز شریف اور شہباز شریف نے پورا ملک اجاڑ دیا، یہ اب اور کیا چاہتے ہیں، شریف خاندان ملکی معیشت کو دیوالیہ کرنے کے بعد اب اپنی مظلومیت کا رونا رو رہا ہے، آج عوام ان سے حساب مانگ رہے ہیں۔

انھوں نے کہا کہ وزیر آباد کارڈیالوجی اسپتال شروع نہ کرنے پر جو قیمتی جانیں ضایع ہوئیں، آج انھی کے لواحقین کی بد دعائیں شہباز شریف کا پیچھا کر رہی ہیں، اب وزیر اعلیٰ پنجاب نے اسپتال کو ترجیحی بنیادوں پر شروع کرنے کی یقین دہانی کرائی ہے۔

قائم مقام گورنر پرویز الہیٰ نے مزید کہا کہ چیئرمین ایف بی آر نے تاجروں کے مسائل پر غور کا یقین دلایا ہے۔

قبل ازیں، پاکستان مسلم لیگ ق کے صدر اور سابق وزیر اعظم چودھری شجاعت حسین نے شیف انٹرنیشنل کے زیر اہتمام چودھری سجاد حیدر میموریل اسپتال کا سنگ بنیاد رکھا۔

لاہور: مسلم لیگ ق کے صدر چوہدری شجاعت حسین نے چیئرمین سینیٹ صادق سنجرانی کو ٹیلی فون کر کے حمایت کی یقین دہانی کرا دی۔

تفصیلات کے مطابق ق لیگی رہنما چوہدری شجاعت نے صادق سنجرانی کو مکمل حمایت کی یقین دہانی کرا دی، انھوں نے کہا کہ صادق سنجرانی کے خلاف تحریکِ عدم اعتماد کا کوئی جواز نہیں۔

چوہدری شجاعت حسین نے چیئرمین سینیٹ سے کہا کہ میری اور پرویز الہٰی کی دعائیں آپ کے ساتھ ہیں، آپ کے خلاف عدم اعتماد کی کوئی تحریک کام یاب نہیں ہوگی۔

حمایت کی یقین دہانی پر صادق سنجرانی نے چوہدری شجاعت اور چوہدری پرویز الہٰی کا شکریہ ادا کیا۔

یہ بھی پڑھیں:  چیئرمین سینیٹ کے خلاف ممکنہ تحریک، حکومت اور اتحادی بھرپور مقابلے کے لیے تیار

خیال رہے کہ اپوزیشن جماعتیں چیئرمین سینیٹ صادق سنجرانی کے خلاف تحریک عدم اعتماد لانا چاہتی ہیں، اس سلسلے میں انھوں نے اے پی سی میں فیصلہ کیا اور چیئرمین سینیٹ کی تبدیلی سے متعلق رہبر کمیٹی تشکیل دی۔

دوسری طرف حکومت اور اتحادی جماعتوں نے چیئرمین سینیٹ کے خلاف اپوزیشن کی ممکنہ تحریکِ عدم اعتماد سے نمٹنے کی تیاریاں شروع کر دی ہیں۔

اس سلسلے میں آج چیئرمین سینیٹ کی رہایش گاہ پر اہم اجلاس منعقد ہوا، وزیر اعلیٰ بلوچستان جام کمال، سینیٹر اعظم خان سواتی، زبیدہ جلال اور بلوچستان عوامی پارٹی (بی اے پی) کے سینیٹرز کی بڑی تعداد بھی اظہار یک جہتی کے لیے صادق سنجرانی کی رہایش گاہ پہنچی۔

لاہور: احتساب عدالت نے چوہدری شجاعت اور چوہدری پرویز الہٰی کے خلاف انکوائری بند کرنے کی درخواست منظور کر لی۔

تفصیلات کے مطابق قومی احتساب بیورو (نیب) نے لاہور کی احتساب عدالت کو بتایا کہ پلاٹس ملازم نے خریدے، چوہدری شجاعت اور چوہدری پرویز الٰہی کا پلاٹس سے کوئی تعلق ثابت نہیں ہوا۔

نیب رپورٹ میں کہا گیا ہے کہ پلاٹس کی خریداری سے چوہدری برادران کا کوئی تعلق نہیں ہے، چوہدری برادران کے خلاف کسی قسم کے ثبوت نہیں ملے۔

خیال رہے کہ چوہدری برادران کے خلاف احتساب عدالت میں ایل ڈی اے سٹی میں 28 پلاٹس غیر قانونی طور پر خریدنے کا ریفرنس دائر کیا گیا تھا۔

یہ بھی پڑھیں: پلاٹس کی فروخت : چوہدری برادران کیخلاف نیب انکوائری بند کرنے کی منظوری

رواں سال جنوری میں قومی احتساب بیورو نے احتساب عدالت کو سفارش کی تھی کہ چوہدری برادران کے خلاف پلاٹس خریدنے کا کیس بند کر دیا جائے۔

نیب نے کہا تھا کہ چوہدری پرویز الہٰی اور چوہدری شجاعت حسین کے خلاف اس کیس میں کوئی دستاویزی یا زبانی شواہد نہیں ملے۔

واضح رہے کہ نیب چوہدری برادران کو نا جائز اثاثہ جات کیس میں بھی طلب کر چکا ہے، چوہدری برادران اپنے اور اہل خانہ کے تمام اثاثہ جات کی تفصیلات نیب کو جمع کرا چکے ہیں۔

یاد رہے کہ چوہدری برادران کے خلاف مذکورہ کرپشن کیس نیب کے 179 میگا کرپشن کیسز میں شامل ہیں جنھیں 2015 میں دائر کیا گیا تھا۔ ریفرنس کے مطابق چوہدری برادران پر 2.428 ارب کے غیر قانونی اثاثہ جات، آمدن سے زائد اخراجات اور نا جائر بھرتیوں کے الزامات ہیں۔

اسلام آباد: پاکستان مسلم لیگ ق کے صدر چودھری شجاعت حسین نے کہا ہے کہ دہشت گردی کے عفریت کے خاتمے اور ریاست کی بقا و سلامتی کے لیے فوجی عدالتیں ضروری ہیں۔

تفصیلات کے مطابق چودھری شجاعت حسین نے کہا ہے کہ دہشت گردی کے عفریت کے مکمل خاتمے، ریاست کی بقا اور سلامتی کے لیے فوجی عدالتوں کی مدت میں توسیع پر کوئی تنازع نہیں ہے۔

سابق وزیر اعظم نے میڈیا سے گفتگو کرتے ہوئے کہا کہ نیشنل ایکشن پلان پر مجھ سمیت، آصف علی زرداری، میاں نواز شریف، مولانا فضل الرحمن اور دیگر پارٹی سربراہوں نے دستخط کیے تھے۔

یہ بھی پڑھیں:  حکومت نیشنل ایکشن پلان سے متعلق ایوان کو بریفنگ دے: اپوزیشن کا مطالبہ

انھوں نے کہا کہ پی پی پی اور مسلم لیگ (ن) کے جو رہنما آج فوجی عدالتوں کی مخالفت کر رہے ہیں انھیں یاد رکھنا چاہیے کہ نیشنل ایکشن پلان پر ان کے لیڈروں نے بھی دستخط کیے تھے۔

ایک سوال کے جواب میں چودھری شجاعت نے کہا کہ 18 ویں ترمیم نے آنے والی نسلوں کے ساتھ ظلم کیا، تعلیم کو صوبوں کے حوالے کر کے بڑی زیادتی کی گئی۔

انھوں نے کہا کہ یکساں قومی نصاب ہمارے بچوں اور پاکستان کی ضرورت ہے، ہمیں عصبیت اور نفرتوں سے پاک ایک ایسے قومی نصاب کی ضرورت ہے جو تمام صوبوں میں یکساں پڑھایا جا سکے اور اس سے قومی یک جہتی کو فروغ ملے۔

لاہور: اسپیکر پنجاب اسمبلی پرویز الہٰی سے وزیرِ اعظم عمران خان کے معاون خصوصی نعیم الحق نے ملاقات کی، جس میں اس بات پر اتفاق ہوا کہ پنجاب میں مشاورت سے معاملات دیکھے جائیں گے۔

تفصیلات کے مطابق وزیرِ اعظم عمران خان کے معاون خصوصی نعیم الحق نے پنجاب اسمبلی کے اسپیکر پرویز الہٰی سے خصوصی ملاقات کی۔

ملاقات میں پنجاب کی مجموعی صورتِ حال پر تبادلہ خیال کیا گیا اور مشاورت سے چلنے پر اتفاق ہوا، پرویز الہٰی کی وزیرِ اعظم سے گزشتہ دنوں ہونے والی ملاقات بھی اہم قرار دی گئی۔

ق لیگی رہنما اور نعیم الحق ملاقات میں آئندہ کے لائحہ عمل کے حوالے سے بھی تفصیلی تبادلہ خیال کیا گیا، انھوں نے اس بات پر اتفاق کیا کہ پنجاب میں عوام کی فلاح و بہبود کو مد نظر رکھتے ہوئے اقدامات کیے جائیں گے۔

یہ بھی پڑھیں:  وزیر اعظم، اسپیکر پنجاب اسمبلی ملاقات، اہم امور پر تبادلہ خیال

یاد رہے کہ دو دن قبل اسپیکر پنجاب اسمبلی اور وزیر اعظم عمران خان کے درمیان ملاقات ہوئی تھی، جس میں‌ پنجاب میں قانون سازی، ترقیاتی منصوبوں سے متعلق بات چیت ہوئی اور پی ٹی آئی اور مسلم لیگ ق میں رابطوں‌ کو مزید بڑھانے پر اتفاق ہوا۔

اس موقع پر وزیر اعظم عمران خان نے کہا کہ ترقیاتی ایجنڈے کو عملی جامہ پہنانے کے لیے رابطے بڑھائیں، وزیر اعظم نے قانون سازی میں پنجاب اسمبلی کے کردار اور کارکردگی کو سراہا۔