ڈاؤ کی قائم مقام وائس چانسلر پروفیسر جہاں آرا حسن کو ’ڈوگانا‘ نارتھ امریکا کی جانب سے لائف ٹائم اچیومنٹ ایوارڈ دیا گیا ہے۔
تفصیلات کے مطابق قائم مقام وائس چانسلر ڈاؤ پروفیسر جہاں آرا حسن کو امریکی ریاست ٹیکساس کے شہر ڈیلاس میں ڈاؤ گریجویٹس ایسوسی ایشن آف نارتھ امریکا ’ڈوگانا‘ کی جانب سے لائف ٹائم اچیومنٹ ایوارڈ دیا گیا۔
ڈاؤ یونیورسٹی انتظامیہ نے پروفیسر جہاں آرا حسن کو لائف ٹائم اچیومنٹ ایوارڈ ملنے پر دلی مبارک باد پیش کی ہے، جہاں سے انھوں نے 1979 میں گریجویشن کی تھی، اور وہ ڈاؤ یونیورسٹی کی پہلی پی ایچ ڈی ڈاکٹر بھی رہیں، تین دہائیوں پر محیط کیریئر میں انھوں نے تدریس، تحقیق اور انتظامی میدان میں نمایاں خدمات انجام دیں۔
وہ 2012 میں ڈاؤ یونیورسٹی کی پہلی پی ایچ ڈی گریجویٹ بنیں، گائناکالوجی کے شعبے میں وہ ہائر ایجوکیشن کمیشن کی منظور شدہ پہلی پی ایچ ڈی سپروائزر بھی ہیں، ان کے 50 سے زائد سائنسی مقالہ جات بین الاقوامی جرائد میں شائع ہو چکے ہیں، کووِڈ 19 کے دوران بطور میڈیکل سپرنٹنڈنٹ اور آئی سی یو ڈائریکٹر انھوں نے مؤثر قیادت کی۔
’’دوا اصلی ہے یا جعلی‘‘ 3 ماہ میں اس کی پہچان کا موثر نظام لا رہے ہیں، وزیر صحت
ان کی قیادت میں ڈاؤ اسپتال نے سندھ ہیلتھ کیئر کمیشن سے کامیابی سے منظوری حاصل کی، پروفیسر جہاں آرا کے دور میں ڈاؤ یونیورسٹی کو 6 نئے سیکنڈ فیلوشپ پروگرامز کی منظوری ملی، ڈاؤ میں اس وقت 35 سے زائد فرسٹ فیلوشپ پروگرامز جاری ہیں۔
پروفیسر جہاں آرا نے اعزاز اپنی فیملی، اساتذہ، ساتھیوں اور اداروں کے نام منسوب کیا، اور کہا کہ یہ لمحہ اُن کے لیے اعزاز سے بڑھ کر ایک جذباتی موقع ہے۔
