اسلام آباد : ترجمان دفتر خارجہ نفیس زکریا نے کہا ہے کہ بھارت جنگی جنون میں اندھا ہو چکا ہے اور لائن آف کنٹرول کی مسلسل خلاف ورزی کا مرتکب ہو رہا ہے۔

تفصیلات کے مطابق لائن آف کنٹرول پر بھارتی جارحیت کا سلسلہ جاری ہے اور گزشتہ شب نکیال سیکٹر میں بلا اشتعال فائرنگ کا سلسلہ رات 9 بجکر 50 منٹ پر شروع ہوا جس کے نتیجے میں دو بچے زخمی ہو گئے۔

ترجمان دفتر خارجہ نفیس زکریا نے بھارتی جارحیت کی مذمت کرتے ہوئے کہا ہے کہ بھار ت کی جانب سےایک بار پھر سیز فائرمعاہدے کی خلاف ورزی کی گئی ہے اورنکیال سیکٹر میں شہری آبادی کو نشانہ بنایا گیا جس کے باعث لوگوں میں خوف و ہراس پھیل گیا جب کہ دو بچے اندھا دھند فائنفنگ کی زد میں آکر زخمی ہو گئے۔

ترجمان دفترخارجہ کا کہنا تھا کہ زخمی بچوں کو فوری طبی امداد دے دی گئی ہے جب کہ علاقے میں اب بھی خوف وہراس پایا جاتا ہے اس کے باوجود مقامی افراد کے حوصلوں میں کمی نہیں آئی ہے۔

دفتر خارجہ کے ترجمان کے مطابق گزشتہ شب 9 بجکر50 پرشہری آباد کونشانہ بنایا گیا تھا جس میں زخمی ہونے والے بچوں کمی عمریں 9 اور 14 سال ہیں جس سے صاف ظاہر ہوتا ہے کہ بھارت جنگی جنون میں مبتلا ہو چکا ہے۔

ترجمان دفترخارجہ نے زخمی بچوں کے اہل خانہ سے افسوس کا اظہار کرتے ہوئے عالمی برادری سے بھارتی جارحیت کا نوٹس لینے کی اپیل کی ہے۔

اسلام آباد : وزیر دفاع خواجہ آصف نے کہا ہے کہ دہشت گردی کے خلاف جنگ نتیجہ خیز مرحلے میں ہے بھارت ہوش کے ناخن لے۔

وفاقی وزیر دفاع خواجہ آصف نے اپنے ایک بیان میں کہا ہے کہ بھارت ہوش کے ناخن لے اور لائن آف کنٹرول کی مسلسل خلاف ورزی سے باز آجائے ورنہ اسے یہ چھیڑ چھاڑ مہنگی پڑ سکتی ہے۔

وفاقی وزیر نے کہا کہ دلیر پاکستانی فوج ہر قسم کی جارحیت کا منہ توڑ جواب دینا جانتی ہے اور بھارت کی جانب سے کسی قسم کی جارحیت سے بھارت کو لینے کے دینے پڑ سکتے ہیں اس لیے لائن آف کنٹرول پر اشتعال انگیزی سے باز رہے۔

انہوں نے کہا کہ بھارت نے مقبوضہ کشمیر میں دہشت اور بین الاقوامی قوانین برائے انسانی حقوق کی دھجیاں بکھیر دی ہیں اور ہزاروں لوگوں کو پلٹ گن کا نشانہ بنایا گیا جب کہ ڈھٹائی کے ساتھ دوسرے ممالک پر دہشت گردی میں ملوث ہونے کا بے بنیاد الزام لگا رہا ہے۔

وفاقی وزیر دفاع نے لائن آف کنٹرول پر مختلف سیکٹر میں بلا اشتعال فائرنگ کر کے خطے میں کشیدگی پیدا کرنا چاہتا ہے تاکہ مقبوضہ کشمیر میں بھارتی مظالم پر عالمی برادری کی توجہ ہٹا سکے جس میں بھارت کبھی کامیاب نہیں ہو سکے گا۔