Tag: لاشیں برآمد

کراچی: محمود آباد میں ایک گاڑی سے ایک لڑکے اور خاتون کی لاش برآمد ہوئی ہے،لاشوں کا پوسٹ مارٹم کرنے کے لیے جناح اسپتال منتقل کردیا گیا ہے۔

تفصیلات کے مطابق محمود آباد کے علاقے میں ایک گاڑی میں سے خاتون اور ایک لڑکے کی لاشیں برآمد ہوئی ہیں تاہم  موت کی وجہ تاحال معلوم نہیں ہوسکی ہے جب کہ جسم پر تشدد کے نشانات بھی نہیں ہیں۔

گاڑی میں لاشوں کی موجودگی پر علاقہ مکینوں نے پولیس کو اطلاع دی جس پر پولیس نے جائے وقوعہ پر پہنچ کر لاشوں کو پوسٹ مارٹم کے لیے جناح اسپتال منتقل کردیا ہے جب کہ گاڑی کو تحویل میں لے کر تحقیقات کا آغاز کردیا ہے۔

پولیس حکام کا کہنا ہے کہ ملنے والی لاشوں کی شناخت ہو گئی ہے لڑکے کی شناخت راشد کے نام سے ہوئی ہے جوکہ محمود آباد کا رہائشی ہے جب کہ خاتون کی شناخت عیدالنساء کے نام سے ہوئی ہے جو دہلی کالونی کی رہائشی تھی۔

پولیس کا مزید کہنا تھا کہ خاتون عید النساء شادی شدہ تھی اور تین روز سے لاپتہ تھی جس کی گمشدگی کی درخواست اس کے شوہر نے تھانے میں  جمع کرا رکھی تھی تاہم ابھی تک یہ معمہ حل طلب ہے کہ ہلاک ہونے والی خاتون اور لڑکے کا آپس میں کیا تعلق تھا اور ان کی موت کیسے واقع ہوئی؟