لندن: برطانیہ میں 12 اور 13 سال کی دو کم سن لڑکیوں کے اچانک لا پتا ہونے کا پریشان کن واقعہ پیش آیا ہے۔
غیر ملکی میڈیا رپورٹس کے مطابق برطانیہ کے علاقے بکنگھم شائر میں دو کم سن طالبات اسکول جاتے ہوئے لاپتا ہو گئی ہیں، جن کی تلاش شد و مد سے جاری ہے۔
رپورٹس کے مطابق اسٹیپل کلیڈن سے تعلق رکھنے والی 13 سالہ ایلینا، اور 12 سالہ کیرا کو آخری بار بکنگھم میں منگل کی صبح تقریباً ساڑھے آٹھ بجے دیکھا گیا تھا، اور لاپتا ہونے کے وقت دونوں لڑکیوں نے اپنے اسکول کا یونیفارم پہن رکھا تھا۔
مقامی پولیس انسپکٹر اولیور برکسی نے ایک بیان میں کہا کہ وہ لڑکیوں کی جان کے حوالے سے بہت زیادہ فکر مند ہیں، کیوں کہ وہ منگل کے بعد سے نہیں دیکھی گئی ہیں، انھوں نے کہا ’’اطلاع ملنے کے بعد سے ہی انھیں تلاش کرنے کے لیے سر توڑ کوشش کی جا رہی ہے، تاہم اب ہمیں عوام کی مدد کی ضرورت ہے۔‘‘
پولیس نے عوام سے اپیل کی ہے کہ اگر انھیں لڑکیوں کے بارے میں کسی بھی قسم کی کوئی معلومات ہو تو وہ پولیس کو فوری طور پر آگاہ کر دیں، یا اگر انھیں کہیں دیکھ لیں تو 999 پر کال کریں۔
پولیس کی جانب سے لاپتا لڑکی کیرا کی تفصیل بھی جاری کی گئی ہے جس میں بتایا گیا ہے کہ کیرا کا قد تقریباً 5 فٹ 3 انچ ہے، اور وہ دبلی پتلی، لمبے لہردار گہرے بھورے بالوں والی لڑکی ہے۔
پولیس کی جانب سے لاپتا لڑکیوں سے بھی اپیل کی گئی ہے کہ اگر وہ کسی پریشانی میں نہیں ہیں اور خیریت سے ہیں، تو وہ اہل خانہ سے رابطہ کریں کیوں کہ سب ان کی سلامتی کے لیے پریشان ہیں۔
