Tag: لاپتہ لیڈیز

بالی ووڈ انڈسٹری کے معروف اداکار عامر خان نے کہا کہ ہر فلموں میں اداکاری نہیں کرسکتا اس لیے نئے ٹیلنٹ کو موقع دینے کا فیصلہ کیا ہے۔

گزشتہ دنوں کرن راؤ کی ہدایت کاری میں بننے والی فلم لاپتہ لیڈیز کی سپریم کورٹ میں ججز، ان کے خاندانوں اور اہلکاروں کےلیے اسکریننگ کی گئی اس دوران انہوں نے پریس کانفرنس کرتے ہوئے نیئ ٹیلنٹ سے متعلق گفتگو کی۔

اداکار عامر خان نے فلم ’لاپتہ لیڈیز‘  کو پروڈیوس کرنے سے متعلق گفتگو کرتے ہوئے کہا کہ انہوں نے یہ فیصلہ ابھرتے ہوئے ٹیلنٹ کے لیے مواقع پیدا کرنے کے لیے کیا ہے، اب مجھے احساس ہوگیا ہے کہ اب میں ہر کہانی میں کام نہیں کرسکتا۔

عامر خان نے بتایا کہ کورونا وائرس کی وبا کے دنوں میں میرے پاس اپنے کیریئر کے بارے میں غور و فکر کرنے کا کافی وقت تھا، اس وقت میری عمر 56 سال تھی اور میں نے سوچا کہ شاید میرے پاس کام کرنے کے لیے مزید 15 سال ہوں گے اور میں 70 سال کی عمر تک کام کرتا رہوں گا مگر اس کے بعد کیا ہوگا؟۔

عامر خان کا کہنا تھا کہ جب میں نے اس بارے میں سوچا تو میں نے ارادہ کیا کہ جو کچھ گزشتہ برسوں کے دوران میں نے سیکھا ہے اسے آنے والے نئے ٹیلنٹ میں منقل کروں گا، جس کے بعد میں نے فلم پروڈیوس کرنے کا فیصلہ کیا۔

عامر خان نے کہا کہ میں ایسی کہانیاں لانا چاہتا ہوں جو میرے دل کو چھوئیں، میں تمام فلموں میں کام نہیں کرسکوں گا، لیکن میں انہیں پروڈیوس کرسکتا ہوں۔

بالی ووڈ اداکار عامر خان نے مزید کہا کہ میں نئے لکھاریوں، ہدایت کاروں، فنکاروں اور دیگر لوگوں کو پلیٹ فارم دینا چاہتا ہوں، اسی لیے لاپتہ لیڈیز میرا پہلا پروجیکٹ ہے، اور میری کوشش ہے کہ میں سالانہ 5 فلمیں پروڈیوس کروں۔