Tag: لاڑکانہ

  • دہشت گردی ایک یا دو آپریشن سے ختم نہیں ہوگی، رضا ربانی

    دہشت گردی ایک یا دو آپریشن سے ختم نہیں ہوگی، رضا ربانی

    لاڑکانہ : چیئرمین سینیٹ میاں رضا ربانی نے کہا ہے کہ پانی کے معاہدے کے معاملے پر ورلڈ بینک اور عالمی قوتیں اپنا کردار بہتر طریقے سے ادا نہیں کررہی ہں، انڈیا کو اگر لاڈلا بچہ قرار دیا گیا تو اس کی اجازت نہیں دیں گے، پانی بند کیا گیا تو اسے جنگ تصور کیا جائے گا۔

    یہ بات انہوں نے گڑھی خدابخش بھٹو میں پیپلز پارٹی کے صوبائی صدر نثار کھوڑو، سعید غنی، وقار مہدی اور دیگر کے ہمراہ شہید ذوالفقار علی بھٹو، شہید محترمہ بینظیر بھٹو اور دیگرشہداء کی مزاروں پر حاضری کے بعد میڈیا سے گفتگو کرتے ہوئے کہی۔

    ان کا مزید کہنا تھا کہ پرویز مشرف جیسے شخص کا اس مقدس مزار پر نام لینے پر شرمندہ ہوں لیکن اس شخص نے غلط بیانات دے کر فوج اور عدلیہ کو متنازعہ بنانے کی کوشش کی ہے دونوں ادارے آئین کے مطابق بہتر کام کررہے ہیں۔

    میاں رضا ربانی نے کہا کہ اس خام خیالی میں نہیں رہنا چاہیے کہ دہشت گردی ایک یا دو آپریشن یا کچھ دنوں میں ختم ہوجائے گی اسے ختم کرنے کے لیے طویل جدوجہد کرنے پڑے گی جب تک ہم منفی سوچ کے خلاف نہیں لڑیں گے اس وقت تک دہشتگردی کو جڑوں سے اکھاڑنا مشکل ہے۔

    انہوں نے کہا کہ پوری قوم کو چاہیے کہ پاکستان کے جس بھی حصے میں رہیں وہ دہشتگردی، فرقہ واریت اور لسانی قوتوں کے خلاف یکجا ہوکر آگے بڑھیں۔

    چیئرمین سینیٹ میاں رضا ربانی نے کہا کہ ریگولیٹری اتھارٹیوں کو وزارتوں کے ماتحت کرنے پر وزیر قانون نے سینٹ میں قانونی پہلو پر بات کی ہے، جس پر میری رولنگ محفوظ ہے جو میں اگلے سیشن میں دوں گا۔

    انہوں نے کہا کہ وفاقی وزراء سینٹ کے اجلاس میں پہلے سے کچھ بہتر تعداد میں آرہے ہیں لیکن اب بھی ان کو حاضری بڑھانے کی ضرورت ہے۔

    انہوں نے کہا کہ بین الاقوامی سازش کے تحت شہید محترمہ بینظیر بھٹو کو شہید کیا گیا، وہ پاکستان کی تاریخ کا سیاہ ترین دن تھا، ملک اس حادثے کے بعد سے اب تک سنبھل نہیں سکا ہے، اگر محترمہ زندہ ہوتیں تو اندرونی اور بیرونی حالات یکسر مختلف ہوتے۔

    اسی لیے ہم سب پر یہ لازم ہے کہ پاکستان کو مسائل اور دہشت گردی سے نکالنے کے لیے محترمہ بے نظیر بھٹو کے اصولوں پر عمل پیرا ہوں۔

    ایک سوال کے جواب میں میاں رضا ربانی نے بتایا کہ پاناما پیپرز کے حوالے سے اپوزیشن کا بل پاس ہوکر قومی اسمبلی میں جا چکا ہے جب کہ حکومت کا داخل کیے جانے والا بل اسٹیڈنگ کمیٹی کے حوالے کردیا گیا ہے جو اس پر رپورٹ پیش کرے گی۔

  • حکمران قومی دولت لوٹ کر آف شور کمپنیاں بنا رہے ہیں، عبدالغفورحیدری

    حکمران قومی دولت لوٹ کر آف شور کمپنیاں بنا رہے ہیں، عبدالغفورحیدری

    لاڑکانہ : ڈپٹی چیئرمین سینیٹ مولانا عبدالغفور حیدری نے کہا ہے کہ حکمران قومی دولت لوٹ کر آف شور کمپنیاں بنا کر دولت ملک سے باہر منتقل کررہے ہیں، ایسے حالات میں ملک کس طرح ترقی کرسکتا ہے۔ اقلیتوں کے لیے پیش کئے جانے والے بل پر شدید افسوس ہے، مولانا فضل الرحمٰن سمیت جے یو آئی کے کسی رہنما کی بیرون ملک تو ملک میں ہی کوئی کمپنی نہیں۔

    ان خیالات کا اظہار انہوں نے لاڑکانہ میں جے یو آئی کے شہید رہنما ڈاکٹر خالد محمود سومرو کی برسی کے موقع پر شہید اسلام کانفرنس سے خطاب کرتے ہوئے کیا۔

    مولانا عبدالغفور حیدری نے کہا کہ جے یو آئی کو عوامی خدمت سے روکنے کی کوشش کی جارہی ہے جو ناقابل برداشت ہے، ایسی قوتوں کو کہنا چاہتا ہوں کہ جے یو آئی کو ایک موقعہ دیا جائے ہم مختصر عرصے میں ملک کو ترقی کی راہ پر گامزن کریں گے۔

    شہید اسلام کانفرنس سے خطاب کرتے ہوئے علامہ غفور حیدری کا مزید کہنا تھا کہ 20 فیصد سے بھی کم لوگ ملک کے وسائل پر قابض اور عیاشیاں کررہے ہیں جبکہ 35 فیصد افراد غربت کی لکیر سے بھی نیچے ہیں۔ وہ سیاسی رہنما جنہوں نے انتخابات سے قبل کرپشن کرنے والوں کے پیٹ پھاڑ کر پیسے نکالنے کی باتیں کیں وہ خود اقتدار میں آکر کرپشن کرنے میں مصروف ہوچکے ہیں۔

    2018 کے انتخابات میں جے یو آئی نہ صرف بڑی قوت بن کر سامنے آئے گی بلکہ وڈیروں اور چودھریوں کا راج ختم کرتے ہوئے غریب افراد کا راج قائم کیا جائے گا۔ مولانا عبدالغفور حیدری نے کہا کہ سندھ اسمبلی کی جانب سے اقلیتوں کے لیے پیش کئے جانے والے بل پر شدید افسوس اور بل پاس ہونے پر ممبران کی جہالت پر بھی افسوس ہے، نہ انہیں آئین ساز ادارے کا پتہ ہے نہ قانون کے پتہ۔

    انہوں نے کہا کہ پیپلز پارٹی کی قیادت سے اپیل ہے کہ اس قانون کو فوری طور پر واپس لیں ورنہ ایسا نہ ہو کہ سو پیاز بھی کھانے پڑیں اور سو جوتے بھی۔

    مولانا عبدالغفور حیدری نے کہا کہ ملک میں مغربی روایات قائم کرکے شرمناک کھیل کھیلا جارہا ہے۔ جمعے کے بابرکت دن کو بلیک فرائی ڈے قرار دے کر مغرب کی روایت قائم کی گئی۔ رمضان میں تاجر اشیائے خوردونوش کی قیمتیں مہنگی کردیتے ہیں انہوں نے بلیک فرائے ڈی پر آدھی قیمت پر اسٹال لگائے۔

    ، ملک میں بسنے والے 10 فیصد افراد یورپ کو خوش کرنے کے لیے سیکیولر اسٹیٹ بنانے چاہتے ہیں لیکن 90 فیصد لوگ چاہتے ہیں کہ ملک میں اسلامی ریاست قائم ہو جے یو آئی ملک کو سیکیولر اسٹیٹ بنانے نہیں دے گی ہم ایسے عناصر کے خلاف سیسہ پلائی دیوار ہیں۔

    انہوں نے کہا کہ افسوس ناک امر ہے کہ جس ملک میں آرمی چیف روزانہ دہشتگردوں کی پھانسی کی سزاؤں پر دستخط کرتے ہیں وہیں پاکستان کے عظیم لیڈر شہید ڈاکٹر خالد محمود سومرو کے پکڑے جانے والے قاتلوں کو قتل کے اعتراف اور دو سال گذرنے کے باوجود کیفر کردار تک نہیں پہنچایا جارہا ہے اسے کیا سمجھا جائے کہ ملکی عدالتیں انصاف کے تقاضے پورے نہیں کررہی؟

    اس موقع پر جے یو آئی کے مرکزی اور صوبائی رہنماوٴں نے بھی خطاب کیا۔ کانفرنس میں سندھ بھر سے جے یو آئی کے سینکڑوں کارکنوں کی بڑی تعداد نے شرکت کی۔

  • لاڑکانہ میں پل ٹوٹنے سے تانگہ دریائے دادو میں گر گیا

    لاڑکانہ میں پل ٹوٹنے سے تانگہ دریائے دادو میں گر گیا

    لاڑکانہ : لنک روڈ پر واقع باڈہ پل کا کچھ حصہ خستہ حالی کی وجہ سے ٹوٹ جانے کی وجہ سے تانگہ دریا میں جا گرا جس کے سبب دو افراد جاں بحق ہو گئے۔

    تفصیلات کے مطابق لاڑکانہ لنک رود پر واقع باڈرہ پل کا لچھ حصہ درمان میں سے ٹوٹ گیا اوراُس پر سے گذرنے والا ٹانگہ سواریوں سمیت دریا میں جا گرا جس کے باعث دو افراد جاں بحق ہو گئے ہیں جاں بحق ہونے والی افراد کی لاشوں کو دریا سے نکال کر قریبی واقع تعلقہ اسپتال میں منتقل کر دیا گیا ہے۔

    حادثے کو گذرے ایک گھنٹہ ہونے کے باوجود اب تک جائے وقوعہ پراب تک انتظامیہ کی جانب سے کوئی نمائندوں کے نہ پہنچنے کے باعث امدادی کارروائی کا آغاز نہیں ہو سکا ہے تا ہم مقامی دیہاتیوں کی جناب سے اپنی مدد آپ کے تحت دریا میں ڈوبنے والے افراد کو ریسکیو کیے جانے کا عمل جاری ہے۔

    اس موقع پر لوگوں کی کافی تعداد جائے وقوعہ پرپہنچ گئے اور امدادی کاموں میں حصہ لیا،علاقہ مکینوں نے پل کی خستہ حالی اور انتظامیہ کی غفلت و لاپرواہی کے خلاف نعرے بازی کی اور حکومت سے پل کی تعمیر نو کا مطالبہ کیا۔

  • لاڑکانہ اور کچے کے علاقے میں جرائم پیشہ افراد کیخلاف آپریشن کا فیصلہ

    لاڑکانہ اور کچے کے علاقے میں جرائم پیشہ افراد کیخلاف آپریشن کا فیصلہ

    شکار پور: سندھ حکومت نے آپریشن کا دائرہ کار اندرون سندھ تک پھیلانے کا فیصلہ کرلیا۔ گرینڈ آپریشن پولیس کرے گی ضرورت پڑنے پر فوج کی مدد لی جاسکتی ہے۔

    تفصیلات کے مطابق سندھ حکومت نے دہشت گردوں کے خلاف آپریشن کا دائرہ صوبے کے دیگرعلاقوں تک بڑھانے کا فیصلہ کرلیا ہے۔

    شکارپور میں شہید اہلکار کے اہل خانہ سے تعزیت کے بعد وزیر اعلیٰ سندھ سید مراد علی شاہ نے میڈیا سے گفتگو کرتے ہوئے کہا ہے کہ سکھر اورلاڑکانہ کے کچے کے علاقے میں جرائم پیشہ افراد کیخلاف آپریشن ہوگا،اورجرائم پیشہ افراد سے سختی سے نمٹا جائے گا۔


    Decision to extend circle of operation in Sindh by arynews

    گرینڈ آپریشن کی منظوری سندھ کابینہ کے اجلاس میں دی گئی جس کا احوال مولا بخش چانڈیو نے میڈیا کو سنایا، صوبائی وزیر اطلاعات نے میڈیا کو بتایا کہ گرینڈ آپریشن پولیس کرے گی تاہم اس میں رینجرز کا تعاون بھی شامل ہوگا۔

    ذرائع کے مطابق گرینڈ آپریشن کا آغاز لاڑکانہ اور سکھر کےکچے کےعلاقوں سےہوگا۔ دریا میں پانی کی روانی کم ہوتے ہی ڈاکوؤں، دہشت گردوں اوران کے سہولت کاروں کےخلاف کارروائی شروع کی جائے گی۔

    ذرائع کے مطابق آپریشن کےدوران ضرورت پڑنے پر فوج بھی طلب کی جاسکتی ہے۔

    علاوہ ازیں وزیراعلیٰ سندھ نے شکارپورمیں عید کے اجتماع کو خودکش دھماکے سے اڑانے کی کوشش ناکام بنانے اور اپنی جان کا نذرانہ پیش کرنے والے پولیس کانسٹیبل محمد رفیق کی بیوہ کو پچاس لاکھ روپے امداد اور بیٹے کو پولیس میں نوکری دینے کا اعلان کیا ہے۔

     

  • بلاول بھٹو نے عید کا دوسرا روز بھی لاڑکانہ میں گذارا

    بلاول بھٹو نے عید کا دوسرا روز بھی لاڑکانہ میں گذارا

    لاڑکانہ : چیئرمین پاکستان پیپلزپارٹی بلاول بھٹو زرداری نے نوڈیرو ہائوس میں عید کے دوسرے روزبھی پارٹی رہنماؤں، کارکنوں اور عوام سے ملاقاتیں کرتے ہوئے گذارا۔

    تفصیلات کے مطابق پاکستان پیپلز پارٹی کے چئیرمین بلاول بھٹو زرداری سے سابق وزیراعلیٰ سندھ سید قائم علی شاہ، صوبائی وزرا نثار احمد کھوڑو، ہزار خان بجارانی، مکیش چاولہ، رکن صوبائی سندھ میر نادر خان مگسی اور دیگر رہنماؤں سمیت عوام کی بڑی تعداد نے ملاقاتیں کیں۔

    ملاقات کے دوران علاقہ مکینوں نے اپنے مسائل بلاول بھٹو کے سامنے پیش کیے جنہیں چیئرمین پیپلزپارٹی نے بہ غورسُنا اور موقع پر ہی ان مسائل کے سدباب کے لیے احکامات جاری کیے۔

    اس موقع پر پیلپز پارٹی کے رہنماؤں نے چیئرمین بلاول بھٹو سے پارٹی کی تنطیم سازی سمیت مختلف امور پر تبادلہ خیال کیا گیا اس موقع پرپارٹی رہنماؤں نے پارٹی چیئرمین کو مختلف تجاویز بھی پیش کیں۔

    بلاول بھٹو کا کہنا تھا کہ پارٹی اورعوام کے بہترمفادات میں جو بھی تجاویز سامنے آئیں گیں ان پر غور کیا جائے گا۔

    ان کا کہنا تھا کہ ان ملاقاتوں سے ایک نئی عوامی رابطہ مہم کا عملی طور پر آغاز کردیا گیا ہے جس کو ملک بھر تک وسیع کیا جائے گا۔ پارٹی کے تمام منتخب نمائندوں اورعوام کی سوچ ایک ہی ہونا چاہیے جس کے ذریعے عوامی مسائل جلد حل ہوسکیں گے۔

    بلاول بھٹو کا مزید کہنا تھا کہ بلدیاتی انتخابات میں پارٹی کی کامیابی کے بعد ضمنی انتخابات میں بھی عوام نے پیپلز پارٹی کے امیدواروں کے حق میں فیصلے دیئے ہیں اور ان کامیابیوں کا سلسلہ مستقبل میں بھی جاری رہے گا۔

  • لاڑکانہ :کریکردھماکہ،1اہلکار جاں بحق،سیاسی شخصیات کی مذمت

    لاڑکانہ :کریکردھماکہ،1اہلکار جاں بحق،سیاسی شخصیات کی مذمت

    لاڑکانہ : صوبہ سندھ کے شہر لاڑکانہ میں میروخان چوک کے قریب کریکر دھماکے میں رینجرز کا 1 اہلکار جاں بحق جبکہ رینجرز کے چار اہلکاروں سمیت دو راہگیر زخمی ہوگئے.

    تفصیلات کے مطابق لاڑکانہ میں میروخان چوک کے قریب کریکر دھماکے میں رینجرز کاایک اہلکار جاں بحق اور چار اہلکاروں سمیت دو راہگیرزخمی ہوگئے،دھماکے میں رینجرز ہیڈکوارٹرز کے قریب گاڑی کو نشانہ بنایاگیا.

    دھماکے میں زخمی ہونے والے پانچ اہلکاروں سمیت دو راہگیروں کو چانڈکا میڈیکل اسپتال منتقل کیا گیاتھا،زخمیوں میں رینجرز کے ایک اہلکار کی حالت تشویش ناک تھی جسے آئی سی یو میں منتقل کیا گیا،لیکن دوران علاج رینجرز اہلکار جاں بحق ہوگیا.

    دھماکے کے بعد سیکورٹی اداروں نے علاقے کو گھیرے میں لے لیا تھا،ذرائع کےمطابق دو مشتبہ افراد کوحراست میں لیاگیا.

    حملے میں ملوث ملزمان کو جلد گرفتار کرلیاجائے گا،ڈی جی رینجرز سندھ

    نماز جنازہ میں ڈی جی رینجرز ،ڈی آئی جی،کمشنر،ایس ایس پیزسمیت بڑی تعداد میں شہریوں نے شرکت کی،نماز جنازہ کے موقع پر شہید اہلکار کے اہلخانہ غم سے نڈھال تھے.

    ڈی جی رینجرز میجرجنرل بلال اکبر نے کہا کہ دہشت گردی میں کون ملوث ہے ابھی کہنا قبل از وقت ہوگا،انہوں نے کہا کہ ملزمان کو جلدگرفتار کرلیاجائےگا.

    میجر جنرل بلال اکبر نے کہا کہ مجرم جہاں بھی ہوں پولیس کے ساتھ کارروائی کی جائے گی،ان کا کہنا تھا کہ صوبے بھر میں کارروائی کے لیے صوبائی اور وفاقی حکومت دونوں کی حمایت حاصل ہے.

    ڈی جی رینجرز سندھ کا کہنا ہے کہ ایسے واقعات امن وامان کی صورت حال کو خراب کرنے کے لیے کیے جاتے ہیں،انہوں نے کہا کہ شہیدوں کی قربانیاں رائیگاں نہیں جائیں گی.

    وزیراعظم نوازشریف کی لاڑکانہ حملے کی مذمت

    وزیراعظم نوازشریف کی لاڑکانہ میں رینجرز پر ہونے والےحملےکی شدید مذمت کی اور حملے میں شہید ہونےوالے اہلکار کے بلند درجات کے لیے دعا کی.

    وزیراعظم نواز شریف نے کہا کہ اللہ تعالی پسماندگان کو نقصان برداشت کرنے کا حوصلہ دے،انہوں نے حملے میں زخمی ہونےوالے اہلکاروں کی جلد صحت یابی کے لیے بھی دعا کی.

    وزیراعلیٰ سندھ مراد علی شاہ نے لاڑکانہ میں ہونے والے دھماکے کا نوٹس لے لیااور آئی جی سندھ سے رپورٹ طلب کرلی،وزیراعلیٰ سندھ نے آئی جی کو ملزمان کو فوری گرفتار کرنے کا حکم دیا.

    وزیراعلیٰ سندھ مراد علی شاہ نے لاڑکانہ دھماکے کی مذمت کرتے ہوئے واقعے کو بزدلانہ کارروائی قراردے دیا.

  • رینجرزکو اختیارات صرف کراچی کے لئے دیئے تھے، قائم علی شاہ

    رینجرزکو اختیارات صرف کراچی کے لئے دیئے تھے، قائم علی شاہ

    لاڑکانہ : وزیراعلیٰ سندھ سید قائم علی شاہ نے کہا ہے کہ رینجرز کو کراچی کے سوا کسی اور شہر میں کارروائی کا اختیار نہیں۔ رینجرز کے اختیارات میں توسیع کیلئے پارٹی قیادت کی ہاں کا انتظار ہے۔

    ان خیالات کا اظہار انہوں نے لاڑکانہ میں ہنگامی پریس کانفرنس سے خطاب کرتے ہوئے کیا، قائم علی شاہ نے کہا کہ 4 سنگین جرائم پر قابو پانے کے لئے رینجرز کو اختیارات صرف کراچی کے لئے دیئے تھے۔

    رینجرز اور پولیس کو اپنے اختیارات سے تجاوز نہیں کرنا چاہئیے، وزیراعلیٰ سندھ کا کہنا تھا کہ چیف جسٹس سندھ ہائیکورٹ سجاد علی شاہ کے بیٹے اویس شاہ کے اغواء سے متعلق کافی قیاس آرائیاں ہوئیں، شکر ہے کہ وہ خیریت سے بازیاب ہو گئے۔

    انہوں نے بتایا کہ امجد صابری قتل کیس کی تفتیش میں پیش رفت ہوئی ہے، خالد محمود سومرو قتل کیس میں بھی ملزمان پکڑے گئے۔

    پی پی رہنما عبدالقادر پٹیل کی گرفتاری سے متعلق پوچھے گئے سوال کے جواب میں وزیر اعلیٰ سندھ نے کہا کہ عبدالقادر پٹیل کی گرفتاری وزیرداخلہ اور آئی جی کا فرض ہے، وہ انسداد دہشت گردی کی عدالت سے فرارہوئے، پولیس کو انہیں پکڑنا ہوگا۔

    سید قائم علی شاہ نے کہا کہ کراچی میں اسٹریٹ کرائمز کی وارداتیں ہورہی ہیں اس پرقابوپارہے ہیں، پولیس کوجدید ہتھیاروں سے لیس کریں گے۔

     

  • لاڑکانہ: رینجرز کی کارروائی، 20 ملزمان گرفتار، بھاری تعداد میں اسلحہ برآمد

    لاڑکانہ: رینجرز کی کارروائی، 20 ملزمان گرفتار، بھاری تعداد میں اسلحہ برآمد

    لاڑکانہ : وزیر داخلہ سندھ کے حلقے میں رینجرز نے کارروائی کرتے ہوئے اسد کھرل کے قریبی ساتھی سمیت 20 افراد گرفتار کر کےملزمان کے قبضے سے راکٹ لانچر سمیت بھاری تعداد میں اسلحہ برآمد کرلیا۔

    تفصیلات کے مطابق صوبائی وزیرداخلہ سندھ کے حلقے میں پولیس اور رینجرز نے مشترکہ کارروائی کرکے بدنام زمانہ ڈاکو اسد کھرل کے قریبی ساتھی پٹھان ابڑو کوگرفتار کر کے اس کے قبضے سے راکٹ لانچر برآمد کرلیا، ملزمان کو مزید تفتیش کے لیے نامعلوم مقام پر منتقل کردیا گیا ہے۔

    قانون نافذ کرنے والے ادرے کے مطابق گرفتار ملزم کی نشاندہی پر مزید 19 افراد کو حراست میں لیا گیا ہے جبکہ دیگر ملزمان کی گرفتار ی کے لیے چھاپے مارے جارہے ہیں جبکہ مرکزی ملزمان اعجاز ابڑو اور منظور مینگل کی گرفتاری کے لیے قانون نافذ کرنے والے ادارے متحرک ہوگیے ہیں۔

    واضح رہے تین روز قبل رینجرز کی جانب سے لاڑکانہ میں کارروائی کی گئی تھی جس میں  اسد کھرل کو گرفتار کیا گیا تھا، تاہم رینجرز کی جانب سے الزام عائد کیا گیا تھاکہ وزیر داخلہ سندھ سہیل انور سیال اور اُن کے بھائی طارق سیال نے مقامی پولیس اور 200 سے زائد کارکنان کے ہمراہ مداخلت کر کے ملزم کو فرار کروادیا تھا۔

    بعد ازاں ڈی جی رینجرز نے وزیر اعلیٰ سندھ قائم علی شاہ سے ملاقات میں اپنے تحفظات کا اظہار کیا اور لاڑکانہ میں پیدا ہونے والی صورتحال پر طارق سیال اور اسد کھرل کی گرفتاری کے لیے احکامات جاری کرنے کی استدعا کی تھی، ترجمان رینجرز کی جانب سے اسد کھرل کےمعاملے پر باقاعدہ اعلامیہ بھی جاری کیا گیا تھا۔

  • دادو کینال نہر سے 20 سالہ خاتون کی لاش برآمد

    دادو کینال نہر سے 20 سالہ خاتون کی لاش برآمد

    لاڑکانہ : لاڑکانہ کے قریب دادو کینال نہر سے 20 سالہ خاتون طاہرہ ڈیتھو کی ایک دن پرانی لاش ملی ہے، مقتولہ کو اس کے شوہر نے نہر میں دھکا دیا تھا.۔

    تفصیلات کے مطابق نوڈیرو کے قریب دادو کینال نہر سے 20 سالہ خاتون طاہرہ ڈیتھو کی لاش برآمد ہوئی ہے،جسے فوری طور پرنوڈیرو اسپتال منتقل کردیا گیا ہے، اسپتال انتظامیہ کا کہنا ہے کہ لاش 36 گھنٹے پرانی ہے۔

    تھانہ نوڈیرو کی پولیس کے مطابق مقتولہ طاہرہ ڈیتھو نواحی گاوٴں نظر ڈیتھو کی مکین تھی جس کو گذشتہ روز اس کے شوہر شفقت ڈیتھو نے گھریلو تنازعے پر دادو کینال نہر میں پھینک کر فرار ہو گیا ہے،جس کے باعث پولیس نے ملزم شفقت ڈیتھو کے باپ اور بھائی کو گرفتار کر لیا ہے۔

    تاہم اب تک پولیس نے قتل کا باضابطہ اندارج نہیں کیا ہے،علاقہ مکینوں کا کہنا ہے کہ پولیس کی سست روی نے ملزم شفقت ڈیتھو کو فرار ہونے کا موقع دیا،ملزم پہلے بھی اپنی اہلیہ ہر تشدد کرتا رہتا تھا۔

    دوسری جانب گذشتہ روز نوڈیرو شہر کا رہائشی 10 سالہ محمد علی سولنگی اپنے دوستوں کے ہمراہ رائیس کینال میں نہاتے ہوئے ڈوب گیا جس کی تلاش گذشتہ روز سے جاری تھی آج باقرانی کے قریب دادو کینال سے بچے کی لاش دیکھ کر اہل علاقہ نے پولیس کو اطلاع دی۔

    پولیس نے جائے وقوعہ پر پہنچ پر دادو کینال سے نکالا جس کی شناخت نوڈیرو کے رہائشی 10 سالہ محمد علی سولنگی عرف آغا کے نام سے ہوئی ہے، پولیس نے ضروری کاروائی کے بعد لاش ورثائے کے حوالی کردی،معصوم بچے کی لاش گھر پہنچنے پر کہرام مچ گیا۔

  • ادارے اپنی ناکامیوں کا ملبہ ہمارے سرڈال دیتے ہیں، چیف جسٹس آف پاکستان

    ادارے اپنی ناکامیوں کا ملبہ ہمارے سرڈال دیتے ہیں، چیف جسٹس آف پاکستان

    لاڑکانہ: چیف جسٹس آف پاکستان جسٹس انور ظہیر جمالی نے کہا ہے کہ ’’پاکستان کو ابھی تک ایسی قیادت نہیں مل سکی جو ملک کو ترقی کی جانب گامزن کر سکے۔

    ان خیالات کا اظہار انہوں نے لاڑکانہ ڈسٹرکٹ بار میں منعقدہ تقریب میں بطور مہمان خصوصی خطاب کرتے ہوئے کیا، تقریب سے خطاب کرتے ہوئے چیف جسٹس نے کہا کہ ’’ملک میں تیس سال مارشل لاء نافذ رہا اور اس دوران ذاتی مفادات کے لیے قانون سازی کی گئی‘‘۔

    انہوں نے مزید کہا کہ ملک میں کوئی بھی ادارہ اپنے ذمہ داریاں پوری نہیں کرتا اور  پھر اُس کی ناکامی کا ملبہ عدلیہ کے سر پر ڈال دیا جاتا ہے۔

    چیف جسٹس کا کہنا تھا کہ بدقسمتی سے  پاکستان میں فلاحی ریاست کا قیام آج تک شرمندہ تعبیر نہیں ہوسکا۔

    دوسری جانب لاڑکانہ بار ایسوسی ایشن کی جانب سے جسٹس انور ظہیر جمالی کی خدمت اعلیٰ نسل کا عربی گھوڑا اور بکرا نطورِ تحائف پیش کیے گئے۔

    اس موقع پر انہوں نے تحائف وصول کرنے سے معذرت کرتے ہوئے کہا کہ ’’میں دس ہزار روپے سے زائد مالیت کے تحائف وصول نہیں کرسکتا‘‘۔

    ’’چیف جسٹس نے مزید کہا کہ اگر میں یہ تحائف وصول بھی کرلوں تو ان کے کھانے پینے کا خیال نہیں رکھ سکتا مگر نشانی کے طور پر ان کے ساتھ تصاویر بنوا کر اپنےکمرے میں لگالوں گا۔ چیف جسٹس آف پاکستان نے مذکورہ قیمتی تحائف شکریہ کے ساتھ واپس لوٹا دئیے۔

    CJ returns gifts of Larkana Bar by arynews