Tag: لاک ڈاؤن

کراچی: شہر قائد کے 2 علاقوں گلشن اقبال اور کلفٹن میں 2 سپر اسٹورز سیل کر دیے گئے۔

تفصیلات کے مطابق انتظامیہ نے کرونا وائرس وبا کے ایس او پیز کی خلاف ورزی پر گلشن اقبال اور کلفٹن میں قائم دو سپر اسٹورز سیل کر دیے۔

دونوں سپر اسٹورز سماجی فاصلے کی پابندی کی خلاف ورزی پر سیل کیے گئے، سپر اسٹورز کی انتظامیہ نے اس سلسلے میں سندھ حکومت کی ہدایات کو بالکل نظر انداز کیا، گلشن اقبال میں سپر اسٹور اس ماہ دوسری بار سیل کیا گیا۔

اے آر وائی نیوز کے مطابق ان سپر اسٹورز پر عوام کا رش لگا رہتا تھا، تاہم ان کے علاوہ کراچی کی دیگر مارکیٹوں میں بھی سندھ حکومت کے ایس او پیز پر عمل درآمد نہیں کیا جا رہا ہے، رش کی صورت حال ہر جگہ دکھائی دیتی ہے۔

رپورٹ کے مطابق کراچی کے جوڑیا بازار میں بھی ہر وقت لوگوں کا ہجوم دکھائی دیتا ہے تاہم سندھ حکومت نے ابھی تک وہاں کوئی کارروائی نہیں کی ہے۔ کرونا وائرس کی وبا کے تیز رفتار پھیلاؤ کے پیش نظر سندھ حکومت کو تمام مارکیٹوں کی سخت نگرانی کرنے کی ضرورت محسوس کی جا رہی ہے۔

سندھ میں آج مزید 4 مریض جاں بحق، 298 نئے کرونا کیسز رپورٹ

خیال رہے کہ سندھ میں کرونا وائرس کے پھیلاؤ کو قابو کرنے کے لیے سماجی فاصلے کی پابندی پر سختی سے عمل درآمد کرایا جا رہا ہے، کیوں کہ آج بھی صوبہ سندھ میں کو وِڈ نائنٹین کے مزید 4 مریض جاں بحق ہو گئے ہیں، جب کہ صوبے میں 298 نئے کیسز رپورٹ ہوئے، صوبے میں مریضوں کی تعداد 3671 ہو گئی ہے۔

کراچی: شہر قائد سمیت سندھ بھر میں لاک ڈاؤن 32 ویں روز بھی جاری ہے، لاک ڈاؤن کے دوران ڈبل سواری پر پابندی سے کوئی مستثنیٰ نہیں، پولیس حکام نے اہل کار و افسران کو بھی موٹر سائیکل پر ڈبل سواری سفر نہ کرنے کی ہدایت جاری کر دی۔

اے آر وائی نیوز کے مطابق کراچی پولیس حکام نے اپنے اہل کاروں کو ہدایت کی ہے کہ ان کے لیے شٹل سروس شروع کر دی گئی ہے، یہ سروس ساؤتھ، ایسٹ، سینٹرل اور ملیر میں جاری ہے، ویسٹ زون کے اہل کاروں کو بھی پک اینڈ ڈراپ سروس دی جار ہی ہے، اہل کاروں کو تھانوں اور دفاتر کے قریب چھوڑا جا رہا ہے۔

ادھر کراچی شہر میں ایکسپورٹ سیکٹر کی مختلف صنعتوں کو کھلنے اور جزوی کاروبار کی اجازت دی گئی ہے، فیکٹریز کے لیے سخت ایس او پیز جاری کی گئی ہیں، ملازمین کو حفاظتی اقدامات کے بعد داخلے کی اجازت دی جا رہی ہے۔

شہریوں کے لیے بھی ڈبل سواری پر پابندی برقرار ہے، تمام استثنیٰ اور رعایت ختم کی جا چکی ہے، تعلیمی ادارے، سرکاری دفاتر، مارکیٹیں اور پبلک ٹرانسپورٹ بند ہیں، پٹرول پمپس، دواؤں اور اشیائے ضروریہ کی دکانیں اوقات مقررہ میں کاروبار کر سکتی ہیں۔

صدر آل سٹی تاجر اتحاد اور صوبائی وزیر سعید غنی آمنے سامنے

پولیس اور رینجرز کی جانب سے شہر کے مختلف مقامات پر ناکہ بندی ہے، شہریوں کو پوچھ گچھ کے بعد آمد و رفت کی اجازت دی جا رہی ہے، تاہم چند علاقوں میں ناکوں پر آزادانہ آمد و رفت بھی جاری ہے۔

تاجروں کے ایک دھڑے نے یکم رمضان سے کاروبار کھولنے کا اعلان کیا ہے، تاہم حکومت سندھ نے واضح طور پر کہا ہے کہ اس کی اجازت نہیں دی جائے گی، گزشتہ روز آئرن اور ٹمبر مارکیٹس کھلنے پر پولیس نے تاجروں پر تشدد بھی کیا تھا اور چند نمایاں تاجروں کے خلاف مقدمات بھی درج کر کے انھیں گرفتار کیا گیا تھا۔