Tag: لاک ڈاؤن

اسلام آباد : عوامی مسلم لیگ کے سربراہ شیخ رشید نے کہا ہے کہ دو نومبر کو اسلام آباد میں بھرپور لاک ڈاؤن ہوگا, سرکیں ایئرپورٹ اور اور ریلوے اسٹیشن سمیت ہرچیز بند ہوگی،جس نے جو کرنا ہے کرلے، اس موقع پرملکی سیاسی تاریخ بدلنے جا رہی ہے۔ اٹھائیس اکتوبر کو لال حویلی سے اس کا ٹریلر چلے گا۔

ان خیالات کا اظہار انہوں نے اے آر وائی نیوز سے خصوصی گفتگو کرتے ہوئے کیا، شیخ رشید کا کہنا تھا کہ دو نومبر کا اسلام آباد میں عوام کا ایک جم غفیر ہوگا جو سڑکیں گاڑیاں اور ایئر پورٹ اور ریلوے اسٹیشن کو بند کر دیں گے۔

کیونکہ ملک پر چوروں نے قبضہ کرلیا ہے، یہ قبضہ چھڑانا ہوگا مرنا ہوگا مارنا ہوگا اور جو بچے گا وہی سیاست کرسکے گا، جس نے جو کرنا ہے کرلے ہم بند کرکے دکھائیں گے۔

انہوں نے کہا کہ ساری اپوزیشن کو نواز شریف نے جس قیمت پر خریدا ہے اس سے پوری قوم کی آنکھیں کھل جانی چاہیئں۔ جس کیخلاف لوگ باہر نکلیں گے اس کی چھوٹی سی جھلک 28 اکتوبر کو آپ لال حویلی میں دیکھیں گے جس میں عمران خان ، شاہ محمود اور جہانگیر ترین کو بھی ہم نے بلایا ہے۔

انہوں نے بتایا کہ عوام کا ایک سمندر ہوگا، اگر ہمارا راستہ روکا گیا تو وہیں دھرنا دیا جائے گا، ایک سوال کے جواب میں انہوں نے کہا کہ ہم سب یہ چاہتے ہیں کہ احتجاج پر امن ہو لیکن حکومت خود اپنے پاؤں پر کلہاڑی مارنے کی ماہر ہے۔

انہوں نے کہا کہ وزیر اعظم اور آرمی چیف کی آج ہونے والی ملاقات بھی کامیاب نہیں گئی ہے، نیشل سیکیورٹی کے مسئلے پر سیاست کرنا اور اس کو نطر انداز کرنا مسئلے کا حل نہیں ہے۔