Tag: لاہور ایئرپورٹ

لاہور: غیر ملکی ائیر لائن کی پرواز ایچ وائی 463 کی لاہور ایئر ہورٹ پر لینڈنگ کے دوران دو فضائی میزبان گرنے سے زخمی ہوگئیں۔

تفصیلات کے مطابق تاشقند سے آنے والی پرواز ایچ وائی 463 لاہور ایئرپورٹ پر لینڈ کر رہی تھی کہ اس دوران 2 ایئرہوسٹس توازن برقرار نہ رکھ سکیں اور پھسل کر گر پڑیں۔

واقعے پر طیارہ کے پائلٹ نے لاہور ایئرپورٹ پر سول ایوسی ایشن کنٹرول ٹاور سے رابطہ کیا اور پوری صورتحال سے آگاہ کیا، پائلٹ کی اطلاع پر سول ایوی ایشن اتھارٹی کے ڈاکٹر نے فوری طبی امداد فراہم کی۔

ابتدائی طبی امداد کے بعددونوں فضائی میزبانوں کو لاہور میں ایمبولنس کے ذریعے مقامی اسپتال منتقل کردیا گیا جہاں ان کا مزید علاج جاری ہے۔

لاہور: علامہ اقبال انٹرنیشنل ایئرپورٹ پر اے ایس ایف نے بیرون ملک منشیات اسمگلنگ کرنے کی کوشش ناکام بناتے ہوئے ملزم کو گرفتار کرلیا۔

تفصیلات کے مطابق لاہور ایئرپورٹ پر اے ایس ایف نے غیرملکی ایئرلائن کی پرواز کیو آر 629 کے ذریعے دوحہ جانے والے مسافر کے سامان سے 3 سو گرام اعلیٰ کوالٹی کی چرس برآمد کرلی۔

ایئرپورٹ سیکیورٹی فورس کے مطابق چرس ٹریولنگ بیگ میں مہارت سے چھپائی گئی تھی۔ اے ایس ایف حکام کا کہنا ہے کہ ملزم کو اینٹی نارکوٹکس فورس (اے این ایف) حکام کے حوالے کردیا گیا ہے۔

اسلام آباد ایئرپورٹ: بیرون ملک منشیات اسمگلنگ کی کوشش ناکام ، ملزم گرفتار

یاد رہے کہ گزشتہ ماہ نیو اسلام آباد ایئرپورٹ پر اے ایس ایف نے غیرملکی ایئرلائن کی پرواز کے ذریعے سعودی عرب جانے والے مسافر سے 03 کلو آئس ہیروئن برآمد کرکے گرفتار کیا تھا۔

ترجمان اے ایس ایف کے مطابق عملے نے شک کی بنیاد پر مسافر کی تلاشی لی تو یہ انکشاف ہوا کہ اس کے سامان میں موجود نمکو کے پیکٹس میں آئس ہیروئین چھپا کر رکھی گئی تھی۔

کراچی: ایئرپورٹ سیکیورٹی فورس نے علامہ اقبال انٹرنیشل ایئرپورٹ پر سونے کی اسمگلنگ کو ناکام بنا دیا۔

تفصیلات کے مطابق لاہور ایئرپورٹ پر اے ایس ایف نے سونے کی اسمگلنگ کو ناکام بنا دیا۔ اے ایس ایف کا کہنا ہے کہ امریکی خاتون پرواز 342 لاہور سے مسقط جا رہی تھی، دوران چیکنگ خاتون کے سامان سے 2 سونے کے بسکٹ برآمد ہوئے۔

اے ایس ایف نے خاتون مسافر کو کسٹم کے حوالے کر دیا، کسٹم نے سونے کے بسکٹ قبضے میں لے کرمسافر خاتون کو سفر کی اجازت دے دی۔

اس سے قبل گزشتہ ہفتے لاہور ایئرپورٹ پر اے این ایف نے کارروائی کرتے ہوئے لندن جانے والی پرواز کے مسافر کے سامان سے 20 کلو گرام سے زائد ہیروئن برآمد کی تھی۔

یاد رہے کہ گزشتہ ماہ علامہ اقبال انٹرنیشنل ایئرپورٹ پر تعینات کسٹم اہلکاروں نے چیکنگ کے دوران مسافر کے سامان سے 17 ہزار امریکی ڈالر، 25 ہزار 600 یوآن جبکہ 25 ہزار 780 بھارتی روپے برآمد کیے تھے۔

کسٹم حکام کا کہنا تھا کہ مسافر نجی ایئر لائن لائن کی پرواز 6018 سے ارمچی جا رہا تھا، مسافر کو حراست میں لے کر تفتیش شروع کر دی گئی۔

کراچی: مانچسٹر سے لاہور آنے والی پرواز میں شور شرابا کرنے پر لاہور ایئر پورٹ پر برطانوی شہری رفیق کو حراست میں لے لیا گیا۔

تفصیلات کے مطابق مانچسٹر سے لاہور آنے والی پرواز کے عملے کی شکایت پر مسافر کو گرفتار کر لیا گیا، پی کے 710 سے لاہور پہنچنے والا مسافر نشے کی حالت میں تھا۔

ایئر پورٹ ذرایع کا کہنا ہے کہ مسافر نے عملے سے تلخ کلامی کی اور نازیبا الفاظ استعمال کیے، رفیق نامی برطانوی شہری دوران پرواز مسلسل غل غپاڑہ مچاتا رہا۔

عملے نے طیارے میں مسافر کی نقل و حرکت سے کپتان کو آگاہ کیا جس پر کپتان نے لاہور ائیر پورٹ پر لینڈنگ سے قبل پی آئی اے کی سیکورٹی اور اے ایس ایف کو آگاہ کر دیا۔

ترجمان پی آئی اے کے مطابق طیارہ لینڈ ہوتے ہی پی آئی اے کی سیکورٹی اور اے ایس ایف نے رفیق نامی مسافر کو حراست میں لے لیا، پی آئی اے نے مسافر رفیق کو بلیک لسٹ کرنے کے حوالے سے فائنل وارننگ بھی جاری کر دی ہے۔

ذرایع کا کہنا ہے کہ دوسری ائیر لائنز اس قسم کی حرکات کرنے پر مسافر کو بلیک لسٹ کر دیتی ہیں۔

دریں اثنا، معلوم ہوا ہے کہ برطانوی شہری رفیق کی جانب سے اپنی حرکات پر شرمندگی کا اظہار کیا گیا، مسافر اور اس کے عزیز نے تحریری طور پر معافی نامہ بھی اے ایس ایف کو جمع کرا دیا۔

طیارے کے کپتان نے معافی نامے کے بعد برطانوی مسافر کو معاف کر دیا، جس پر اے ایس ایف نے مسافر کو گھر جانے کی اجازت دے دی۔

لاہور: علامہ اقبال انٹرنیشنل ایئر پورٹ پر طیاروں کی لینڈنگ ٹچ کے لیے مختص رن وے کا حصہ خراب ہو گیا ہے، جس کی مرمت کے لیے انتظامیہ نے ہیڈ کوارٹر سے اجازت طلب کر لی ہے۔

تفصیلات کے مطابق علامہ اقبال ایئر پورٹ انتظامیہ نے ہیڈ کوارٹر کو خط میں طیاروں کے اترتے وقت کے رن وے کے مخصوص حصے کے خراب ہونے کا انکشاف کیا ہے۔

خط لاہور ایئر پورٹ منیجر کی جانب سے لکھا گیا، خط کی کاپی اے آر وائی نیوز نے حاصل کر لی ہے، خط میں کہا گیا ہے کہ رن وے کا متاثرہ حصہ طیاروں کا لوڈ اٹھانے کے قابل نہیں رہا۔

خط کے مطابق 36 آر اور 18 ایل نامی مرکزی رن وے کے مسلسل استعمال سے کچھ حصہ خراب ہو گیا ہے۔ خط میں ٹینگو نامی ٹیکسی وے کے قریب حصے کی مرمت کے لیے ہیڈ کوارٹرز سے اجازت طلب کی گئی۔

یہ بھی پڑھیں:  لاہور ایئرپورٹ کے بعد کراچی ایئرپورٹ کا اسکینر بھی خراب ہونے کا انکشاف

ایئر پورٹ منیجر کے مراسلے میں کہا گیا ہے کہ متاثرہ ایل مرکزی رن وے مختص دن اور ٹائمنگ میں دستیاب نہیں ہوگا، ائیر بس 300 اور بوئنگ 777 طیاروں سے کم وزن کے طیارے 36 ایل رن وے استعمال کریں گے۔

مراسلے کے مطابق سیکنڈری رن وے کو مرمتی کام کے دوران استعمال کیا جا سکے گا، ایمرجنسی کی صورت میں متعلقہ رن وے 15 منٹ میں استعمال کے لیے دستیاب ہو سکے گا، جب کہ رن وے کی مرمت کے دوران فضائی آپریشن متاثر نہیں ہوگا۔

مراسلے میں کہا گیا کہ رن وے کا مرمتی کام 5 دن کے اندر مکمل کیا جائے گا، مرمتی کام مختص دنوں میں مخصوص اوقات کار میں جاری رہے گا۔

دریں اثنا، ذرایع نے کہا ہے کہ سی اے اے ہیڈ کوارٹرز کا نوٹم جاری ہوتے ہی مرمتی کام کا فوری آغاز ہوگا۔