لاہور : ڈی آئی جی ٹریفک پولیس شہید مبین احمد نہ صرف یہ کہ فرض شناس آفیسر تھے بلکہ ایک زندہ دل و علم پرور شخصیت اور ایک نرم و حساس دل رکھنے والے انسان تھے۔

ڈی آئی جی ٹریفک مبین احمد کی یادیں ہی اب ان کے اہل خانہ، رفقاء اور ساتھی افسران کا انمول خزانہ بن گئی ہیں جس سے وہ ہر لمحہ شہید کی یاد کو تازہ کرتے رہیں گے۔

شہید مبین احمد ملک میں دہشت گردی، فرقہ واریت، اور انتہا پسندی پر دل گرفتہ نظر آتے تھے جس کا اظہار انہوں نے سماجی رابطے کی ویب سائٹ فیس بک پر اپنے ایک اسٹیٹس میں قتل و غارت گری سے بیزاری اور انسانیت سے محبت کے درس پر مشتمل غزل تحریر کی تھی جسے کافی لوگوں نے پسند کیا۔

کوئٹہ سے تعلق رکھنے والے شہید مبین احمد کو انہی اوصاف کے باعث ان کے ساتھی ، دوست اور اہلِ خانہ نرم دل اور خوش اخلاق آفیسر کی حیثیت سے جانتے ہیں اور اپنی منکسر المزاجی کے باعث وہ ہمیشہ لوگوں کے دلوں میں زندہ رہیں گے۔

احمد مبین اپنے کریئر کے دوران ڈی پی او قصور، ڈی آئی جی انویسٹی گیشن کوئٹہ ، ایس پی ماڈل ٹاؤن لاہور اور سی ٹی او لاہور کے عہدوں پر تعینات رہے جب کہ انہوں نے ابتدائی تعلیم مستونگ کیڈٹ کالج سے حاصل کی اور 1996 میں سول سروس کا امتحان پاس کرنے کے بعد فوج سے ریٹائرڈ ہو کر پولیس میں آئے تھے۔

اُن کی تدفین پر ہر آنکھ اشک بار اور ہر دل الم ناک تھا، شہید نے اپنے آخری لمحات بھی لوگوں کے درمیان ان کے مسائل حل کرتے ہوئے گذارے اور مال رود پر ٹریفک کو خود بحال کروایا۔

لاہور : لاہور دھماکے نے شادی کی تیاریوں میں مصروف دو گھرانوں میں صف ماتم بچھا دی، تیس سالہ فاطمہ اپنی شادی کی خریداری جب کے بلال امجد اپنی مہندی کی تیاریوں کے سلسلے میں مال روڈ پر موجود تھے کہ خود کش دھماکے کا شکار ہو گئے۔

لاہور دھماکے میں جاں بحق ہونے والوں کی جوں جوں تفصیلات سامنے آ رہی ہے ویسے ویسے اس ہولناک حادثے کی غم ناک صورت بھی سامنے آتی جا رہی ہیں ابھی 3 بیٹیوں کے فرض شناس باپ مبین احمد کا غم ہی ہلکا نہیں ہوا تھا کہ غم کی نئی داستانوں نے دل دہلا دیے۔

تیس سالہ فاطمہ کی ایک ماہ بعد ہی شادی ہونے والی تھی جس کے لیے وہ اپنے چھوٹے بھائی کے ساتھ شاپنگ کے لیے مال روڈ گئی تھی کہ خود کش دھماکے کا نشانہ بن گئیں جب کہ چھوٹا بھائی اسپتال میں موت و زندگی کی کشمکش میں مبتلا ہے۔

فاطمہ کے والدین جہاں اپنی بیٹی کے غم سے نڈھال ہیں وہیں اپنے جواں سال بیٹے کی شدید زخمی ہونے پر تشویش کا شکار بھی ہیں ان کا کہنا ہے کہ شادی کی تیاری میں مشغول گھرانے میں صف ماتم بچھ گئی ہے۔

خود کش حملے میں جوبیس سال کا بلال امجد بھی شہید by arynews

دوسری جانب لاہور ہی میں 24 سالہ بلال امجد بھی لقمہ اجل بن گیا جس کی آج رسمِ مہندی ادا ہونی تھی لیکن سہرا باندھنے کی خواہش مند والدین نے اپنے لختِ جگر کو منوں مٹی تلے دفن کیا۔

غم سے نڈھال بلال امجد کی ماں کا کہنا تھا کہ یہ کیسا ظلم ہے کہ جس بیٹے کا سہرا تیار ہے اسے کفن پہنایا گیا ہے ہماری تو جیسے دنیا ہی اجڑ گئی ہے اب ہم کس کے سہارے زندہ رہیں گے۔

لاہور : پاکستان پیپلز پارٹی پنجاب کے صدر قمر الزماں کائرہ نے کہا ہے کہ نیشنل ایکشن پلان پر عملدرآمد کرانا وفاقی حکومت کا کام تھا جس میں وہ بری طرح ناکام رہی ہے۔

قمر الزماں کائرہ لاہور میں میڈیا سے بات چیت کر رہے تھے انہوں نے کہا کہ نیشنل ایکشن پلان پر عمل در آمد کرانے پر ناکامی کا اعتراف وزیراعظم خود بھی کر چکے ہیں۔

انہوں نے کہا ہے کہ پنجاب میں امن و امان کی روز بہ روز مخدوش ہوتی صورتِ حال کے پیش نظر اگر رینجرز کی تعیناتی ضروری ہے ہو تو کسی دوسرے سانحہ کا انتظار کرنے کے بجائے فوری طور پر رینجرز کو تعینات کردینا چاہیے۔

قمر الزماں کا کہنا تھا کہ اگر پنجاب حکومت رینجرز کو تعینات نہیں کرنا چاہتی تو کم از کم پولیس کو ہی سیاسی دباؤ سے آزاد کر کے فری ہینڈ دے دیا جائے تو پنجاب پولیس بھی امن قائم کرنے میں ضرور کامیاب ہو جائے گی۔

انہوں نے کہا ہمیں اپنی فورسز پر فخر ہے اور سیکورٹی ادارے دہشت گردوں کو منہ توڑ جواب دینے کی بھرپور صلاحیت رکھتے ہیں اور دہشت گردی کے خلاف جنگ میں قربانیاں بھی دی ہیں۔

ہمارے دور میں دہشت گردی کے خلاف جنگ میں واضح کامیابیاں حاصل ہوئی تھیں اور ہمارے دور میں ہی سوات میں امن لایا گیا تھا جس کے لیے سیکیورٹی اداروں نے قربانیاں دیں۔