لاہور سمیت پنجاب کے مختلف شہروں میں شدید بارشوں کا سلسلہ جاری ہے، موسلا دھار بارش کے باعث پانی اسپتال اور گھروں میں بھی داخل ہو گیا ہے۔
اے آر وائی نیوز کے مطابق لاہور میں ہونے والی دھواں دھار بارش سے سروسز اسپتال کی ایمرجنسی میں پانی داخل ہوگیا، اسپتال کی ایمرجنسی میں بارش کا پانی جمع ہونے سے مریضوں کو سخت اذیت کا سامنا ہے۔
رپورٹس کے مطابق لاہور کے نواحی علاقے چوہنگ میں بھی موسلا دھار بارش کاسلسلہ جاری ہے، علاقے تاج پورہ میں بارش کا پانی گھروں میں داخل ہو گیا۔
محکمہ موسمیات کا کہنا ہے کہ لاہور میں وقفے وقفے سے بارش کا سلسلہ جاری ہے اور مون سون بارشوں کا سلسلہ 6 اگست تک جاری رہنے کا امکان ہے۔
لاہور کے علاوہ پنجاب کے شہروں شیخوپورہ، قصور، پاکپتن، سرگودھا، جہلم، مری، راولپنڈی، اسلام آباد میں بھی موسلا دھار بارش سے نشیبی علاقے زیر آب آ گئے۔
لاہور ائیرپورٹ پر سب سے زیادہ 337 ملی میٹر بارش ریکارڈ کی گئی جبکہ نشتر ٹاؤن میں 250 ملی میٹر بارش ریکارڈ ہوئی۔
ترجمان موٹروے پولیس کا کہنا ہے کہ قومی شاہراہوں پر موسلا دھار بارش کا سلسلہ وقفے وقفے سے جاری ہے، مانگا منڈی، پتوکی، رینالہ خورد اور اوکاڑہ کے مقامات پر بارش ہو رہی ہے جبکہ موٹر وے ایم 3 پر فیض پور سے ننکانہ صاحب تک بارش ہے۔
اس کے علاوہ موٹروے ایم 2 پر پنڈی بھٹیاں، شیخوپورہ، کالا شاہ کاکو اور ٹھوکر نیازبیگ تک بارش کا سلسلہ جاری ہے۔
لیسکو حکام کے مطابق لاہور میں بارش سے 400 سے زائد فیڈر ٹرپ کر گئے ہیں، بارش کا سلسلہ رکنے کے بعد بجلی کی بحالی کا کام شروع کیا جائے گا۔
کراچی میں طوفانی بارش، نشیبی علاقے زیر آب
واٹر اینڈ سیوریج بورڈ کے اعداد و شمار کے مطابق لاہور ائیر پورٹ پر ہونے والی بارش 44 سال میں ریکارڈ کی گئی سب سے زیادہ ہے۔
