لاہور : سندر کے علاقے میں تیز رفتار کار نے شہریوں کو روند ڈالا، جس کے نتیجے میں تین افراد جاں بحق اور ایک زخمی ہوگیا۔

تفصیلات کے مطابق لاہور میں سندر کے علاقے میں اوورسپیڈنگ کرتے تیز رفتار کار نے موٹرسائیکل سمیت 3 افراد کو کچل دیا، جبکہ ایک شخص شدید زخمی ہو گیا۔

حادثے کی وجہ مبینہ طور پر اوور اسپیڈنگ اور غیر قانونی ریس بتائی گئی ہے۔

پولیس اور عینی شاہدین نے بتایا کہ دو کاریں شاہکام فلائی اوور سے بحریہ ٹاؤن کی طرف ریس لگاتے ہوئے جا رہی تھیں، اسی دوران ایک کار فلائی اوور سے اترتے وقت بے قابو ہو کر پہلے ایک موٹرسائیکل کو ٹکر مارتی ہے، جس کے بعد کار سڑک کنارے کھڑے ریڑھی بانوں پر چڑھ دوڑی۔

حادثے میں موقع پر موجود چار ریڑھی بانوں میں سے دو افراد موقع پر ہی جاں بحق ہو گئے، جبکہ تیسرے زخمی شخص کو جناح اسپتال منتقل کیا گیا جہاں وہ زخموں کی تاب نہ لاتے ہوئے دم توڑ گیا۔ چوتھا شخص شدید زخمی حالت میں زیر علاج ہے۔

ریس لگانے والی دوسری کار موقع سے فرار ہو گئی، جبکہ پولیس نے جائے وقوعہ سے شواہد اکٹھے کر کے تحقیقات کا آغاز کر دیا ہے اور ملزم کی گرفتاری کے لیے سی سی ٹی وی فوٹیج اور دیگر ذرائع سے مدد لی جا رہی ہے۔

لاہور: موٹر سائیکل سوار میاں بیوی فلائی اوور سے گر کر جاں بحق ہوگئے ، ابتدائی تحقیقات میں بتایا گیا کہ شہری کو دل کا دورہ پڑا اور موٹر سائیکل بے قابو ہو کر باؤنڈر وال سے ٹکرا گئی۔

تفصیلات کے مطابق صوبائی دارالحکومت لاہور میں ایک دلخراش واقعے پیش آیا، جہاں موٹرسائیکل سوار میاں بیوی اکبر چوک فلائی اوور سے گر کر جاں بحق ہو گئے۔

پولیس کا کہنا تھا کہ 65 سالہ شیخ افضل اور ان کی 60 سالہ اہلیہ عابدہ نور اقبال ٹاؤن سے فیروز پور روڈ پر واقع اپنی رہائش گاہ جا رہے تھے جب یہ سانحہ پیش آیا۔

حادثے کی ابتدائی اطلاعات کے مطابق فلائی اوور سے اترتے ہوئے شیخ افضل کو دل کا دورہ پڑا، جس کے باعث وہ موٹرسائیکل پر قابو نہ رکھ سکے اور تیز رفتاری کے باعث موٹرسائیکل باؤنڈری وال سے ٹکرا گئی ، جس سے دونوں میاں بیوی فلائی اوور سے نیچے گر گئے۔

عابدہ نور موقع پر ہی جاں بحق ہو گئیں، جبکہ شیخ افضل کو شدید زخمی حالت میں اسپتال منتقل کیا گیا، جہاں وہ جانبر نہ ہو سکے۔

مزید پڑھیں : ٹریفک حادثات میں میاں، بیوی اور بیٹی سمیت 6 جاں بحق

دونوں میاں بیوی اقبال ٹاؤن میں واقع اپنے گھر واپس جا رہے تھے تاہم اہل خانہ نے غم کی حالت میں کسی بھی قانونی کارروائی سے انکار کر دیا ہے۔

پولیس نے جائے حادثہ کا معائنہ کر کے ابتدائی رپورٹ تیار کر لی ہے، جبکہ لاشیں ورثا کے حوالے کر دی گئی ہیں۔

ادھر لاہور کے مختلف علاقوں میں پیش آنے والے دیگر ٹریفک حادثات میں مزید پانچ افراد جاں بحق جبکہ متعدد زخمی ہو گئے۔ شاہکام فلائی اوور پر ایک کار کی ٹکر سے موٹرسائیکل سوار ہلاک اور دو افراد زخمی ہو گئے۔

لاہور : ڈی جی فوڈ اتھارٹی نے مرغی کا گوشت خریدنے والے شہریوں کو خبردار کردیا اور کہا پہلے سے ذبح شدہ گوشت خریدنے سے گریز کریں۔

تفصیلات کے مطابق ڈی جی فوڈ اتھارٹی عاصم جاوید کی ہدایت پر لاہور بھر میں فوڈ سیفٹی ٹیموں نے ملاوٹ مافیا کے خلاف بھرپور کارروائی کرتے ہوئے گوشت کی دکانوں اور سپلائرز کے خلاف کریک ڈاؤن شروع کر دیا۔

ترجمان فوڈ اتھارٹی نے بتایا کہ شہر کے مختلف علاقوں میں 42 میٹ شاپس اور گوشت سپلائرز کی چیکنگ کی گئی، جن میں سے 2 کے خلاف مقدمات درج کیے گئے، جبکہ 2 پر بھاری جرمانے عائد کیے گئے۔

کارروائی کے دوران 65 ہزار کلو گوشت کی چیکنگ کی گئی، جن میں سے 1610 کلو ناقص گوشت اور مردہ مرغیاں تلف کر دی گئیں۔

شیرشاہ کے علاقے میں ایک گاڑی سے مردہ مرغیاں برآمد ہوئیں، جنہیں موقع پر ہی تلف کر دیا گیا، فوڈ اتھارٹی کی ٹیم نے ملزم کو موقع پر گرفتار کر کے اس کے خلاف قانونی کارروائی کا آغاز کر دیا۔

مزید پڑھیں : فاسٹ فوڈ ریسٹورنٹس کو سپلائی کیا جانیوالا مردہ مرغیوں کا گوشت پکڑا گیا

ڈی جی فوڈ اتھارٹی عاصم جاوید نے کہا کہ متعدد دکانوں میں صفائی کے ناقص انتظامات دیکھنے میں آئے اور ملازمین کے میڈیکل سرٹیفکیٹس بھی موجود نہیں تھے، جو فوڈ سیفٹی قوانین کی سنگین خلاف ورزی ہے۔

انہوں نے خبردار کیا کہ بیمار یا مردہ مرغیاں سپلائی کرنا ایک سنگین جرم ہے اور اس گھناؤنے کاروبار میں ملوث عناصر کے خلاف سخت ایکشن لیا جائے گا۔

ان کا کہنا تھا کہ بین الاقوامی معیار کے مطابق گوشت کی تیاری اور ترسیل کے نظام پر کام جاری ہے، اور جعلساز مافیا کے خاتمے کیلئے تمام وسائل بروئے کار لائے جا رہے ہیں۔

ڈی جی فوڈ اتھارٹی نے عوام سے اپیل کی کہ وہ پہلے سے ذبح شدہ گوشت خریدنے سے گریز کریں اور مرغی ہمیشہ اپنی آنکھوں کے سامنے ذبح کروائیں تاکہ محفوظ اور حلال گوشت کا حصول یقینی بنایا جا سکے۔